2 Corintios 6 - Diósïri Karakata P´urheepecha Jimbo

¹ Juchachkani Diósïni marhuakuxamka ka p'ímarexakaksïni eskajtsï imeri kóntperakuani no ísku kurhauaka,

² jimboka Diósï uandasïnga: “Ióntkikini kurhajchaspkia; ka p'ímutantskuarhukini jarhuataska.” Iásïstichkia, p'ímutantskua janostia.

Páblu iámu ambe tekantasti

³ Nónemajtsïni úati arhini eskachi nósesi jurhendaska, jimbokachi nónemani támisï arhistakuska,

⁴ jucha íntskukorhentaska Diósïni marhuakuni, ka jukari jamberichi tekantaska engachi xáni nósesi kánhaka óchi ambe uétarhenchani óchi uandanheani

⁵ óchi k'uikirhenhani óchi k'atanhani óchi arhinharikunhani ambe o eranderanchi ánchekorheni nómbe t'irerini,

⁶ pímbinharhatichi jurhengorheparini, tekantaparini, p'amojpeparini, Espiritu Santuni jinguni ka ambakiti xénhchperakua jinguni,

⁷ ka iámendu ambechi sési uandantasïnga, Diósïri juramukuanchi sési marhuataska engachi kuájpetakorhetaraka óchi sési jánhastpetarani,

⁸ ménichani jiókorhenhasti ka ménichani nómbe, ménichani sési xénhasti ka ménichani nómbe; chkuándirajtsïni úntasti nájkirukani jucha sési uandantaka;

⁹ nójtsïni kurhasti nájkirukajtsïni míteka; uarhikuaterkueskachia ka útasteruchi tsípiti jarhaska; uarhirintsïni jurajkuntasti ka jucha útasï manakorheni jarhani,

¹⁰ jucha mískorhetini níkxaxaka ka k'óruchi tsípexaka; nájkirukachi uánekua jatsikorheri úani jaka, ka jucha nómbe ma jatsikorherini eranhasïnga, nándini jucha nómbe ma uétarhenchani jaki.

¹¹ ¡Exe je Korintu anapuecha! Juchaksïni sési iámu ambe aiángukorheska; juchari mintsitanksïni iámumendu mítacheska

¹² juchari mintsita cha jinguni no míkorhexati, chári mintsitasï jucha jinguni no mítakorheni jati.

¹³ Kurhachajtsïni je, jucheti uatsïtinksïni arhixaka, chájtujtsïni mítache je chári mintsitani.

Nósesi úrichani kúrheani

¹⁴ Ásï jáma je no jakajkutichani kúrheani, ¿Nénajtu kaxumbekua ikimperakua jinguni jeuekorhea? ¿Nénajtu t'íntskua pájpakandekuani pámbea?

¹⁵ ¿Andi Krístu Nóambakiti jinguniua? O ¿Andi jakajkuti no jakajkuti jinguniua?

¹⁶ ¿Andi tiósïoksï jaua diósï eratakatecha? Jimbokachi juchasï Diósïri tsípitiri tiósteka, jimboka Diósï uandaska: “Íni ireta jinguni jámaaka; Ji indecheri Diósïuaka ka indeksï jucheti ireteuati.”

¹⁷ Ísï jimbosï arhijti: “Jarharea je ka támu ireka je, ikichakua ambe ásï p'arhe je, ka jíksïni sési erontaka.

¹⁸ Ka ji chári táteuaka, ka chájtsï jucheti uatsïtiuaka. Acha enga iámu uinhapekua jatsika, ísï uandasti.”