2 Corintios 5 - Diósïri Karakata P´urheepecha Jimbo

¹ Jimbokachi mítetixaka eska, eka i juchari irekorhetarakua k'amakurhiaka, jatsikorhetixakachi enga Diósïrika: Irekorhekua enga méntkisïuaka, engaka no parhakpeni anapu úka, ka enga auandarhu jaka.

² Ka ísïchi jámaparini k'arhanguntasïnga, uékaparini eskachi intsínhantaaka aundarhu anapu xukutantskuani,

³ ísï jámani, ekachi ambe euanhantaska íni xukuparhakuani, nóchi patsikjasï pakaraaka.

⁴ Náuejkijtsï no jakajkuni, jucha k'arhanguntasïnga engachi íni irekorhetarakuani kámani jaka. Jimbokachi uékapiringa eskachi no euanhantapiringa irekorhekuani, sánderu sáni eskajtsïni auandarhu anapu irekorhetarakua intskupiringia ka ísï jámani ima enga uarhijka tsípekua intskupirindia.

⁵ Diósïjtsïnisï íni ambe úrajti, ima engajtsïni Espiritu urhemakia íntskuni ka engajtsïni indeni jimbo aianguni jaka eskajtsïni íntskuaka engajtsïni aiachetini jaka.

⁶ Jimbo, méntkisï tsipeparini, ka míteparini eska, engachi útasï juchari anhatakuarhu jámani jauaka, eskachi Achani kánekua jarharetinderu irekaxaka,

⁷ ka jakajkukua jimbochi irekaxaka, nóchi úekasïnga urheta exeni.

⁸ Tsípeparinchkachi jámaxaka ka sánderu sánchi uéksïngia jurajkuni íni anhanhatakuani ka Achani jinguni irekania.

⁹ Jimbochisï jángorhentajka jaiapanherantani íni anhanhatakua jinguni o nóteru íni anhanhatakuarhia.

¹⁰ Jimboka uétarhesïnga eskachi iámenduecha Jesukristueri juramukuarhu péranhaaka, eskajtsïni exeaka, ka eska jima táchani intsïnhaaka ambe enga parhakpeni irekorheparini andakorheka, sési ambe o nósei ambe.

Diósïni andarhentani

¹¹ Mítetinchka eska Acha janhanharhikueska, jángorhentaskachi máteruechani inchajtsïtaani. Diósïjtsïni sési mítesti, ka mintsikaxakachi eskajtsïni chájtu sési míteka.

¹² Nóksïni arhixaka ménderu eskani jucha xáni ambakitiska, cha uanda je jucha náxani k'éri ambeski, ka úakajtsï indeni kuámukuani engaksï sési xékorhejka ka jiniksï mintsitani no exekorheni.

¹³ Juchachkani Diósï jimbo miákua tsîtaskia; cha jimboterkuchisï miákua jatsika.

¹⁴ Krístueri xénhchperakuajtsïni ísï pérasti, jimbokajtsïni iámu andajtsïteraska eska iámu uarhinhaska, enga májku uarhika iámenduecha jimbo.

¹⁵ Ima iámenduechani jimbo uarhisti, eska ísï jámani nóteru jandiojku irekorhenhaakia, eska sánderu sáni imani jimbo irekanhaakia enga uarhika ka tsíntani imechani jimbo.

¹⁶ Jimajkani iásï uénani nóteruchi k'uiripuni ma chúxapaxaka. Ekachi Krístuni k'uiripueni mítepka iásïchi nóteru ísï míteskia.

¹⁷ Jimbo, ne enga Krístu jingunikia, jimbanhe kuerakatestia; urhetku anapu ambe irekua nitamastia ka iámu ambe jimbanhentasti.

¹⁸ Ka Diósïristi iámendu i ambe, engajtsïni Krístuni jimbo púachentaka, ka engajtsïni míndaka púatsperantskueri ambe uandantani,

¹⁹ jimboka Diósï Krístuni jimbo parhakpeni anapuechani púakuantaxapka, nóteru k'amanharintskua ambe exekuaparini, sánderu sáni juchantsïni axasti púatsperantskueri ambe uandantani.

²⁰ Krístueri jarhojpiriskachi ka Diósïksïni juchantsïni jimbo uandajpantaxati, juchachkaksïni Krístuni jimbo kómarhixaka: ¡Andarhentsï jéta Diósïni!.

²¹ Ima enga nómeni k'amanharhintstipka iámu juchari ambe k'amanharhitanhantaspti, ka Diósïjtsïni imeri Uájpa jimbo puáchentastia.