2 Corintios 4 - Diósïri Karakata P´urheepecha Jimbo

Krístueri uandakua pári no xénhchanhasïndi

¹ Juchachkani íni ambe ánchetanhaska, ka nóchi kuatantasïnga jimboka kóntperata méska.

² Ka nójtuchi k'uratsesïnga óchi jirikorheparini jámani, Diósïri karakatanchi nónemani támisï jánhastaska, andijtsïni no kurhanguche iámenduecha jimbokani jucha sési jurhentpeska ambe enga ísïka Diósïni japarini.

³ Ka eka nema juchari ambakiti aiangperakuani útasï no kurhanguni jaka, nóchka kurhanguati jimboka tsînchekorhetixaka;

⁴ indeksï no jakajkutisti, Diósï parhakpeni anapu kurhangukua pátakuasti, ka Krístueri t'íntskuanksï no exesïndi, enga jimbo újka Diósï exenhani.

⁵ No juchari ambeksïnisï aianguni jámka, arhixamkaksïni eska Jesukristu Acheska, ka eska Jesusini jimbo jucha chári jántspiriska.

⁶ Jimboka ima Diósï enga uandaka eska pájpakandu t'ímarhandepiringa, juchari mintsitechantu t'ímarhandu pérasti, ka ísï jámanchi sési kurhanguni Diósïri k'érikuani enga Krístu uénharhimajka.

Jesusi uinhaperpentasïndi

⁷ Ka indeni xáni ambakiti ambechi kakakua jatakuarhu patsasïnga eska ísï jámani xarharaaka eska inde xáni k'éri uinhapekua no juchariska; eska Diósïriska.

⁸ Jimbochisï no p'ikurheramajka ambe uéjkijtsïni úcheni jarhani, ka nauékijtsïni úkua jatajchakuni jarhani, nóchi uandanheasïnga;

⁹ ka nóchi jandiojku p'ikuarherasïnga engachi jupinhani kánhaaka; ka nauéjkijtsïni kuáskuni, nójtsïni uándikusïndi.

¹⁰ Méntkisïchi jucha jinguni xarhatasïnga Jesusiri uarhikuani, uékanchi eska ísï jámani Jesusiri tsípekuajtu juchari anhanhatakuarhu xarharaaka.

¹¹ Ka náuejkichi tsípiti jámani jaka, jucha Jesusini jimbo méntku uarhikuarhu jámaxaka, jimbokachi uéksïnga eska Jesusiri tsípekua juchari k'uiripuekuarhu xarharaaka, enga ísku uarhiaka.

¹² Uarhikua juchantsïni jinguni jámaxati, ka tsípekua cha jinguni jarhasti.

¹³ Ka engachi exentaaka enga karakata arhijka: “Jakajkuska, jimbosïni uandaka” juchajtuni jakajkusïnga ka jimbochisï uandajka,

¹⁴ míteparini eska ima enga Acha Jesusini tsítantaka, eskajtsïni juchantsïntu Jesusi jinguni tsítantaaka ka ima jinguntsïni péntaati márku, chánksïni ka juchantsïni

¹⁵ Ka iámu i ambe jimbosï úkorheati, eskaksï uánekua intsïnhaaka kóntperata, ka eskaksï ísï jámani uáneaka engaksï Diósïni japanhekuntaaka ka k'éri ambe arhini.

¹⁶ Jimbosïni jucha no kuatantajka, ka náuejki juchari anhanhatakua k'amakurhini jaka, jucha inchanhekua mándani pauani sánderu jimbanhentaxaka.

¹⁷ I nósesi nitamakorhekua enga nitamamaaka, eskachi na sánderu úkorhenchapajka, ísïchi sánderu kánekua k'érikua intsïnhasïnga,

¹⁸ jimbokani jucha no imani ambe xésïnga enga exekorhejka, jucha imani ambesïni exejka enga no xarharajka, jimboka ima ambe enga xarharajka ísku nónesïnga ka ima ambe no xarharajka, ima ambe k'óru méntkisïsïndi.