2 Corintios 12 - Diósïri Karakata P´urheepecha Jimbo

Páblueri p'ikuarhenhekuecha

¹ Nájkirukani no uékani jaka k'éramakorheni, Diósïrini arini ambe jánhastatarasti.

² Krístueri jakajkutini ma míteska enga iauani auandarhu pánhapka, témbeni t'ámu uéxurhinistia. Diósï mítesti eka tsípiti pánhapka o ánimajku.

³ Ji achetini míteska (Diósïristi enga tsípiti pánhapka o ánimajku)

⁴ Eska sési jándu péranhaspka ka eska jini mámaru ambe kurhaspka enga nónema jánhaskajka néna uandantani.

⁵ Indeni acheti jimbo k'óru k'éramakorhesïnga, ji no k'éramakorhesïnga, jimbokani ji ísku nemeska.

⁶ Nájkiruka ísïpiringa, ekani k'éramakorhepiringa. K'óru no uéksïnga k'éri xarharani,

⁷ indeni kánekua sési ambe jimbo engani exeranhaka. Ka támu jimbokarini ambe ma nósesi p'ikuastaxaka, enajkirini Nóambakiti ma ch'urhurheni jaki.

⁸ Achani tanimu xanhari kómarhiskia eskarini kénditacheaka,

⁹ ka imarini arhisti: “Jucheti kóntperakuajkurisï uétarhenchajka; jucheti uinhapekua xarharsïndi jima enga uétarheni jarhajka.” Jimbosïni sánderu tsípejka engani no uinhapeni p'ikuarheraaka, jurajkue Krístueri uinhapekuarini ts'iueratantani.

¹⁰ Jíchkani tsípesïnga no uinhapeni p'ikuarherani engani Krístu jimbo uinhamarhenhajka o ekani uétarhenchajka o ekani kómu nitamajka, jimbokani ts'iuentasïnga jiáni engani uétarhenchani jarhajka.

¹¹ Ísku jatintsïni jukari ambe uandaraska, chájtsïnisï sési ambe uandachentapiringa, nájkirukani ji nómbe méka, no sapichu ambeska inde k'érati arhistatspirichani japarini.

¹² Chájtsï exeska eskani uandakua párini jámaska, no kuatantaparini ka k'érati milagruechani úaparini.

¹³ Tumina ambejkuksïnisï no kurhacheka, sántsïni puáchentsï je engaksïni nómbe ma kurhacheka ísï eska máteru tangorhekuechani.

Páblu Korintu nikuekani uandasïndi

¹⁴ Ka iásï, tanimu úni jámanksïni niraxamkia p'urhembeni, ásïjtu uandanhea je jimbokaksïni chánksïnisï exekuekani jaka, no chári ambe. Sapichaksï no tátjembani uandanheani jarhasïndi, tátechaksïsï uájpechani míndakuajti.

¹⁵ Ji nitamakorhetarakua tsípekua jinguni pájtakorhexaka, ka ji jamberisïni íntskukorhentaaka jimbokaksïni xáni xénhchasïnga. ¿Andijtsïnisï cha no májkueni xénhchajki?

¹⁶ Chájtsï míteska eskaksïni no uékaspka tumina jimbo uandanheatani. Andisï uandanhani jaki jimajkani eskaksïni nóna andakorhexamempka.

¹⁷ ¿Andi jíksïni máteru axacheaski tumina kurhacheni?

¹⁸ Engani Títuni kómarhipka eska máteru tatecha jinguni nipiringa. ¿Euaspiksïni ambe ma? ¿Andi nóksï májku mintsita jinguni jámaski, ísï eskani ji na jámaka?

¹⁹ ¿Nema uandaxaki eskani jucha nónentaxaka? No ísïsti tatecha ka nanecha, jucha Diósïni japarini Krístueri ambechisï uandantajka, jimbokaksïni sési jurhendakuekaxaka.

²⁰ Chéxaka niárani ka nósesiksïni xénterani, ka chájtsïni jíndeni nósesi erokani, ekajtsï ikiatsperani jaka, o ipurhperani, o arhirperani, ójtsï teparakorheni jarhani, ójtsï arhinhchperani jarhani, ka arhukperatintsï jámani jarhani.

²¹ Chéxaka Diósïni japarini k'uratsetakorheni, jimbokani uenhejchaaka chánksïni xérini eskajtsï útasï ísku jándini jámaxaka ka eskajtsï útasï k'amanharhintaxaka.