2 Corintios 10 - Diósïri Karakata P´urheepecha Jimbo

Jurhentperakua Páblueri

¹ Máruksï uandaxati eskani ji chésïnga uandani engani cha jinguni jarhajka ka eskani iauani jatintkuni sési xékorhesïnga, k'óruksïni Krístueri kaxumbekua jimbo kómarhisïnga

² eskajtsïni no jiáni ch'urhumukuaka engani ji jima jauaka, jimboka iásï k'óruni arhinharhikuantauaka indeni engaksï uandajka eskani jucha jukari ambe kurhajkorhesïnga.

³ Nájkirukachi parhakpeni anapueka, jucha no parhakpeni anapu ambeni andakuekaxamka,

⁴ jimbokachi no parhakpeni anapueni uarhipexaka, juchari uinhapekua Diósïristi ka iámendu jásï arhinharhikperakuani andasïndi,

⁵ ka sési xékorhekuani xerentasïnga, indechani engaksï no jiókorhejka Diósïri mímixekuani, jucha Krístuni andarhetantasïnga ka kurhandiratarani náki uéjki jásï parhakpeni anapu eratsekuani,

⁶ ka jiájkani k'óruchi maiampetarauakia imechani engaksï no kurhandiraaka, jiájkani engajtsï cha iámu kurhanguakia.

⁷ ¡Jurhengorhe je mítpentani! Eka nema uandajka eska Krístueriskia, ménderu uénte arini ambe eratsentani: Enga ima Krístu jingunikia, eskachi juchajtu Krístueriska.

⁸ No arhiati ekani jukari sési xekorheni jaka, no k'uratsesïnga jimbokaksïni no k'amajkukuexaka, Acharini sésikua íntskusti jarhuatanksïni,

⁹ ásï uanda je eskaksïni karakata jimbo chérakuekaxaka.

¹⁰ Jimbokaksï máru uandaxaka eskani karakata jimbojku xukajpesïnga, ka jimbokani etekiska ka támu pájpamesïnga.

¹¹ Indejtsïni jiáni kurhajchakorheati engachi jima jauaka, eskachi no karakata jimbojku uandakua axasïnga.

Páblu no inchakutspiristi

¹² Jucha no tekapiriga jandiojku k'éramakorheni jarhani ísï eskaksï máru na jámka. Indeksï tandojtsïtixati engaksï k'éramakorhentku tángorhentajka.

¹³ Jucha, no k'éramakorheaka, sánderu sánichi p'íngukorheaka eskajtsïni Diósï xántku jiáretajka, enga úka indejtsïni arhisti eskaksïni janocheraka chánksïni.

¹⁴ Jimbo, nóchi uénhexaka, jiájkani k'óruchi uénheni japiringa engachi no sóntku jupiringa chánksïni jinguni. Jucha urhetaksïni péracheska Krístueri ambakiti aiangperakuani.

¹⁵ Nóchi máteru nemeri ánchekorhetani míngorhekuekaxaka, uéksïngachi eskajtsï Dósïni sánderu jakajkuaka ka jurhendanksïni mámaru ambeteru

¹⁶ ka ambakiti aiangperakuanchi iauani jamberi nirani uandantani, nóchi arhinhani eskachi k'éramakorhexaka máteruechani inchaakukuatini.

¹⁷ Eka nema k'éramakorhejka, Achani jimbo k'éramakorhe.

¹⁸ Jimboka no p'itsïkorhenhasïnga k'éramakorhenhani Achasï uandajti nésï sési jámani jaki.