1 Timoteo 6 - Diósïri Karakata P´urheepecha Jimbo

¹ Iámendu jántspiricha ka ánchekorhetspiricha, janhanharhia je chári ánchetpirichani ka nónema Diósïni nósesi arhiati ka níjtu juchari jurhentperakuani.

² Eka nemeri ánchetpiri Diósïni jakajkutika, sánderu janhanharhi jimbokaksï jakajkukua jimbo erachiska, ka sánderu sési marhuaku, jimbokari Diósï jákakutinisï ma marhuakuni jaka. Íni amberisï jurhetpeaka ka arhijtsïkpeni.

Arini ambejtu arhistatspe ka jurhentpe

³ Eka nema ísku ambe ma jurhentpeni jaka, imani ambe enga no Acha Jesukristueri jurhentpekua,

⁴ ima k'éramakorhesïndi ka nómbema mítesti, ka ísku ambe ma uémuskorhesïndi uandani, ka ima ambe epurhurperata ka uarhiperata ka arhinhchperata ambe k'amarhukuerasïndi.

⁵ Ka xárhati k'uiripuechaksï no úsïndi terukutsperani, níjtu sési kurhangutsperani jimbokaksï tuminajkuksï erarhukujka engaksï Diósïni marhuakuni arhimetajka.

⁶ Ka ísïsti, enga ma Diósïni marhuakujka ma kánekua andasïndi, k'óru no tuminasï ma andajti, ma sési irekorhekuajtsï andajti.

⁷ Jimbokachi nóma jatsikorherini andajpenuska ka nómachi pájtakorheaka uárhikuarhu.

⁸ T'irekuajku ka xukuparhakuajku engachi jatsikorheaka, indeni jingunkuchi sési jauaka;

⁹ K'óru engaksï tumina káneranhchakorheni uéjka, nóna jatiniksï amdakuntati tumina ka ísï jámani iámendu ambeksï tsïjpakorhesïndi.

¹⁰ Jimboka iámendu nósesi jásï ambe, tumina kánhchakuarhu uénasïnka ka máruksï támu pérasïndia jakajkukuani, ka kánekuaksï nósesi nitamakorhenhchasïndi.

Timoteueri p'imarheta

¹¹ Ka t'u Timoteo engari Diósïni marhuakujka, jarhare xárhati ambe kánchakua ka sési irekorhe Diósïni jakajkuparini ka marhuakuparini.

¹² Jakajkukua jimbo anhatsekorhe, ka jángorhe tsípekua andakorheni enga nómeni k'amakurhiaka, jimbokinisï Diósï uandajpati jimajkani engari k'uiripu japarini xáni sési uandakorhentapka chéti jakajkukueri ambe.

¹³ Diósï japarinkini arhixaka, enga iámendu ambeni kueraka ka enga tsípekua íntspejka ka ístu Jesukristuni jimbo enga Ponsio Pilatuni japarini jángueri ambe uandantapka, ka arhixakakini

¹⁴ eskarini kurhandiracheaka ka kaxumbeni ka ísïkini nónema úati ambe arhiparhatani, ísï jáma, jiájkani jamberi enga juchari Acha Jesukristu junguaaka.

¹⁵ Niáraati ima jurhiatekua enga ima junguaaka na enga jatini juchari Diósï ísï uékaaka, imajkusï sési jimbo irecheti ka Acheni.

¹⁶ Imajkusï nómeni uarhiati ka k'éri t'ímarhandekuarhu irekasti enga nónema exeni jaka, ¡Mentku ísï imeristi k'érikua ka uinhapekua!. Ka ísïsti.

¹⁷ Arhia jatsikorherichani eskaksï no k'éramakorheaka ka eskaksï no jámaka jatsikorhekuani mintsinharhini, eskaksï Diósïnisï mintsikaaka engajtsïni iámendu ambe kóndejka engachi jucha uétarhenchajka.

¹⁸ Eskaksï sési ambe niátani jauaka, ka eskaksï sési niátakuechani kánerakorheauaka, ka mintsita jinguniksï ambe jarhojpeni.

¹⁹ Ka ekaksï ísï úska, kánerakorheatiksï ambakiti ambe, enga méntku ísï marhuauaka ka imecheri tsípekua nómeni k'amakurhiati.

Uandanutskua

²⁰ Timoteu, jángorhentsï sési úni indeni ambe engari mintsinharhinhaka ka ísku kurha, imani engaksï uémuskorhejka, engaksï no Diósïri ambe uandajka.

²¹ Máru engaksï indeni ambe uandajka, jarharhestiksïa jákajkukuani. Eskakini Acha Diósï kóndeaka.