1 Timoteo 3 - Diósïri Karakata P´urheepecha Jimbo

Urhejtsïkpiticheri jángua

¹ I ambe ísïsti, eka nema terujtsïkurhinchani jaka, ambakiti ánchekorhetasï uéjti.

² K'uanisïndi eska terujtsïkuri ma xanharku tembuchatiuaka, ka eska kaxumbitiuaka ka eska janhanharhinhaaka, eska sési irekorheaka ka eska sési eropeaka chéni jémbo ka eska jakajkukueri ambe sési jurhentpeaka.

³ Eska no kauicheuaka ka no uarhipitini, ka eska no tumina kánhchaaka.

⁴ Eska sési juramuaka chéni jembo ka sési t'arhexerhaani uájpechani kaxumbekua jinguni.

⁵ Jimboka eka nema, no jarhamekua jatsika chéni jémbo, ¿Andi nena úaia Diósïri jakajkutichani jarhamekua jinguni kuájchakuani?

⁶ Jimbanhe jakajkuti ma no úati terujtsïkurini, jimboka k'éramakorheaka ka tátsekua májkueni jámani eska Nóambakiti.

⁷ Támu, k'uanisïndi eskaksï no jakajkutichajtu janhanharhiaka, ka ísï nónema ambe arhiparhataati ka Nóambakiti no andaati.

Néksïsï ua tióstarhu jarhojpirini

⁸ Úetarhesïndi eskaksï tiósïo anapu jarhojpiricha sési jásï k'uiripueuaka, no chkuándireni, ka no kauicheni o tumina nósesi andakata kánhchani.

⁹ Ka eskaksï sési úraaka Diósïri jakajkukuani sési jásï eratsekua jinguni.

¹⁰ Urheta k'uanisïndi eskaksï ts'éjkunhaaka, ka engaksï nómbema arhikua jukaska, jiájkanksï uátia tiósïo jarhojpirini.

¹¹ Nanechatuksï engaksï tiósïo jarhojpenhchaaka, k'uanisïndi eskaksï no arhinhchpitiuaka, ka eskaksï kaxumbeaka ka eskaksï janhanharhinhaaka ka eskaksï iámendu ambe jimbo mintsinharhikueuaka.

¹² Eskaksï tiósïo jarhojpiricha ma xanharku tembuchatiuaka, eskaksï uájpecha kurhajchaaka ka eska chéni jémbo kurhajchanhaaka.

¹³ Jimbokaksï tiósïo jarhojpiricha engaksï sési ánchekorhejka, k'érikuarhu péranhaka ka sésiksï irekaati jimbokaksï Krístu Jesusini jakajkusïnga.

Tiósïo jángua

¹⁴ Íni ambekini karachexaka mintsikaparini eskakini sóntku p'urhembeaka,

¹⁵ ekani ambe ióndani jauaka nirani, ka nóchi exejperantani jarhani, mítetiniri jauakakia nénaksï kaxumbekua jinguni jámaa Diósïri k'umanchekuarhu, ima engaksï jakajkuticheka engaksï patsajka ka kuájpeni ambe enga ísïka.

¹⁶ Indeni jimbochisï jucha Diósïni íntskukorhentajka irekani, ka enga xáni k'éka inde enga ísïka engachi iásï xarhatamenhani jaka: Krístu k'uiripu úkorhesti, ka Espiritu Sántu jimbo andani uerasti, ka ánjelichaksï exesti, ka imeri ambe iámu parhakpeni mítekorhesti, ka iámenduechaksï jakajkusti, ka t'ímarhandekuarhu eronhantasti.