1 Pedro 2 - Diósïri Karakata P´urheepecha Jimbo

Diósïri ireta jimbanhe

¹ Ísï jimbo, ásteru nósesi ambe u je, ka ásteru k'arhajpe je, ásteru chkuándira je, ka ásteru epurhpe je, ásteru uadatspe je.

² Ísï eskaksï charhakuecha na jámka engaksï kángorhenhatintku jarhajka ambakiti etsukua uékani, chájtu májkueni ambakiti uandakua jirinhantsï je, eskajtsï indeni jimbo uinhapeaka ka p'ímutantskorhentsï,

³ ekajtsï cha ts'émutini jakaia eska Acha ambakeska.

⁴ Jesusini andarhera je, tsakapuni enga tsípekueka ka engaksï tsïntsïricha no jaiapanhentaka, ka Diósïri jimbo kánekua ambakitisti.

⁵ Chájtujtsï ísïska eska tsakapu tsípiticha, enga Diósï jakajkutichani jimbo tiósta ma újka, eskajtsï táta kaxumbiti marhuatspiriuaka, eskajtsï Jesukristuni jimbo Espiritueri ambe aiatspentaaka enga Diósï jaiapanheantauaka.

⁶ Karakataka arhisïndi: Ixu Sióni k'énharhi tsakapu ma erakukata péraxaka, sési jásï ma, ka ima enga íni mintsikaaka no k'uratsetanhaati.

⁷ Chánksïni jimbo engajtsï jakajkutika k'éri ambesti; k'óru no jakajkutichani jimbo, ima tsakapu engaksï tsïntsïricha no jaiapanhentapka, tsumbindikua úkorhentasti,

⁸ no jakajkutichaksï imani tsakapurhu atakorhesïndi, jimbokaksï uandakuani no jakajkusïnga; ka indenksïsï uétarhenchani jápti.

⁹ Ka chájtsï sïrukua erakukateska, chájtsï sési jimbo Diósïri tátecheska, Diósïri ireta erakukata, kaxumbiticha, engajtsï úandantaaka Diósïri k'érikuani, cha engaksïni Diósï pájpakandekuarhu uératini ióarhintaaka ka imeri t'ímarhandekuarhuksïni pérani.

¹⁰ Cha engajtsï urhetku no imeri iretepka ka engajtsï iásï Diósïri iretekia, chánksïni engaksïni Diósï no p'amojkuempka, iásïksïni p'amojkusïndia.

¹¹ Pámpiricha, arhixakaksïni, eskajtsï na jimbo parhakpeni terutsemaaka, ásteru nósesi ambe tsiti je, jimboka inde chéti tsípekua jingunksï uarhiperasïnga.

¹² Kaxumbe je, no jakajkutichani japarini, eskaksï ima engaksïni nósesi úrini arhiparhatani jaka, chánksïni sési ambe úni exerini, Diósïni k'éri ambe arhiaka jiájkani enga ima arhijpeaka imani ambe jimbo enga xáni únhaka.

Juramutichani kurhajchaa je

¹³ Achani jimbo, parhakpeni anapu juramukuani kurhajcha je: Irechani kurhajcha je, jimboka ima juramukua jatsiska,

¹⁴ juramutichantu kurhajchaa je, jimboka k'éri juramuti axaaska eskaksï no ambarhati k'uiripuechani atauaka ka ambarhatichani sési arhiani.

¹⁵ Diósï íni ambesï uéjti: Eskajtsï sési ambe úparini, pínasku jatsiantauaka imani engaksï no jánhaskajka ka tandosïksï.

¹⁶ Chájtsï úsïnga jandiojku jángorheni, ka no jimbokajtsï újkia iámu ambe úni, úakajtsï nósesi ambe úni, sánderu sáni Diósïri jántspirini jáma je.

¹⁷ Iámenduechani janhanharhia je, ka erachichani xénhchaa je, Diósïni chénharhi je, ka irechani janhanharhi je.

¹⁸ Jántspiricha, janhanharhia je chári ánchetpirichani, ka no imechantku engaksï sési arhistatspejka, iámechantu ísï engaksï kánekua uinhamarhetspejka.

¹⁹ Jimboka Diósï újchakurasïnga neni enga tekaantka ka ísku úndani útasï nósesi kánhaani.

²⁰ Nómbema sésisti tekaantani engajtsï atanhani janhaaka nósesi ambe úrini. K'óru Diósïri jimbo sésisti engajtsï sési ambe úrini útasï atanhaaka ka cha tekaantani.

²¹ Nóchkajtsï íni jimbosï ióarhinha andi, Krístujtu cha jimbo nósesi nimakorhespti, ka exerastiksïni néna engajtsï jámaaka.

²² Krístu nómeni k'amanharhintasti ka nójtu méni tandosï újpesti;

²³ engaksï Krístuni útakuni jarhempka, ima nónemani útakuntasïrempti; nómbe ma arhiantasïrempti chéraani uékani imechani engaksï nósesi kántani jarhempka, sánderu sáni Diósïni jurajkukusïrempti, imani enga arhijpejka eska na k'uanijka.

²⁴ Krístu juchari k'amarhintskuechani ichaparhaaspti enga cháparhatanhapka, ka juchari k'amanharhintskua k'amajkuatinia, juchachi irekaaka ísï eska na k'uanijka; Krístu atanhasti ka chájtsï ambakeranhantaska.

²⁵ Chájtsï karichi kuátakateni jámaxapka, k'órujtsï iásï karichi eranguti jinguni niántaskia enga chári tsípekuani eranguni jarhajka ka exeni jarhani.