1 Juan 5 - Diósïri Karakata P´urheepecha Jimbo

Jakajkukuarhu uénasïndi xénhchperata

¹ Ne engaksï jakajkuka eska Jesusi Krístueska, imaksï Diósï uájpesti; ka ne enga tátjembani xénhchkajka, tátjemberi uájpechantu xénhchaasïndi.

² Engachi Diósïni xénhchajka ka kurhandirakunchi imani ambe enga ima juramujka, ísïchi mítesïnga eskachi Diósï uájpechantu xénhchaasïnga.

³ Ka xarhatasïngachi eskachi Diósïni xénhchasïnga engachi kurhandirakuaka, ka no úkua jukasti imeri juramukuechani kurhandirakuani.

⁴ Jimboka ne enga Diósï uájpeka, parhakpeni anapuechani andaasïndi, ka juchari jakajkukua andaastia parhakpeni anapuechani.

⁵ Ka ne enga jakajkujka eska Jesusi Diósï uájpeska, parhakpeni anapuechani andaastia.

⁶ Jesukristusï juchantsïni jinguni itsï ka iurhiri jimbo juti: Ka no itsï jimbojku, sánderu sáni itsï ka iurhiri jimbosï juti; ka Espiritu uandantaxati jimboka Espíritu imeska enga ísïka.

⁷ Tanimuksï uandantasïndi:

⁸ Espiritu ka itsï ka iurhiri, ka taniperanksï terukutasïndi.

⁹ Ekachi jakajkujka enga nema uandantajka, Diósïri uandakua sánderu jakajkukuesti, ka arinisï Diósï uandajti, enga Uájperi ambe uandantajka:

¹⁰ Ne enga Diósï Uájpani mintsikajka, uandantskuani mítesti ka ima jinguni jámaxati. Ka ne enga Diósïni no jakajkukujka, Diósïni chkuándira úntani jarhasïndi, jimboka Diósïnisï no jakajkukuni jaka, enga Uájperi ambe uandantajka.

¹¹ Ka aristi uandantskua: Diósïjtsïni méntkisï anapu irekua íntskusti ka indeni jásï irekua Uájpa jinguni jarhasti.

¹² Ne enga Diósï Uájpani kámani jaka, indeni jásï irekuajtu kámaxatia; k'óru ne enga Diósï Uájpani no kángorheni jaka, no jatsikorhetixati indeni jásï irekua.

K'amarhukutarakua

¹³ Íni ambeksïni karachexaka chánksïni engajtsï jakajkujka Diósï Uájpani, eskajtsï míteaka, eskajtsï méntkisï anapu irekuani jatsikorhetixaka.

¹⁴ Diósïnchi k'amak'amasï mintsikasïnga, jimboka engachi kurhakuska ísï eska ima na uéjka, imajtsïni kurhasïndi.

¹⁵ Ka engachi míteka eskajtsïni kurhasïnga ambe engachi kurhakujka, t'uínchi intsïnhatini janhasïngia ambe engachi kurhakujka.

¹⁶ Eka nema exejka erachi jémbani eska no uarhikua ambe k'amanharhintaxaka, uétarhesïndi arhijpekuni ka Diósï imani tsípekua íntskuati, eka no uarhikueka. Ma k'amanharhintskua jarhasti enga uarhikueka, ka indeni jimbo no uandaxaka eskajtsï kómarhijpekuaka.

¹⁷ Iámendu nósesi úkua k'amanharhintskuesti; k'óru jarhasti k'amanharhintskua enga no uarhikueka.

¹⁸ Míteskachi eska ne enga Diósïri kueraakatekia, nóteru k'amanharhintaxakaia, jimboka Diósïri Kueraakata eranguni jarhasïnga, ka Nóambakiti nóteru p'árhesïndia.

¹⁹ Míteskachi eskachi Diósïriska ka eskaksï iámendu parhakpeni anapuechani Nóambakiti juramukuaxaka.

²⁰ Míteskajtuchi eska Diósï Uájpa jurhaska ka eskajtsïni kurhangutarakua íntskuska engachi jimbo Diósïni míteaka, imani enga ísïka. Juchachi imani jinguni jarhaska enga ísïka, Uájpa Jesukristuni; imasï Diósïti enga ísïka ka enga méntkisï tsípekueka.

²¹ Uátsïticha, diósï eratakatechani ásï andarheraa je.