1 Juan 3 - Diósïri Karakata P´urheepecha Jimbo

¹ Exe je na engajtsïni Táte xáni xénhchaka; jamberi úeksïndi eskachi Diósï uájpa arhinhaaka, ka jindeskachi. Jimbojtsïnisï parhakpeni anapuecha no míteti, jimbokaksï ima Diósïni no míteska.

² Xénchakatecha, náuejkichi Diósï uájpekia, nótki xarharasïndi tátsekuachi ambeuaia, mítetixakachi k'óru eskachi jucha Jesukristueni járhantaaka, jiájkani enga ima xarhantaaka, jimbokachi jiákani k'óru sési exeaka ima néna enga jáxeka.

³ Ka ne enga Jesukristuni mintsikani jaka, jángorhentasïndi pímbinhaxekorhentani májkueni eska ima na pímbinhaxeka.

⁴ Ne enga k'amanharhintajka, Diósïri juramukuanisï no kurhandirakujti, jimboka k'amanharhintskueska Diósïri juramukuani no kurhandirakuni.

⁵ Chájtsï míteska eska Jesukristu parhakpeni k'amanharhintskuechani jurhaska euajpeantaani, ka eska ima nómbema k'amanharhintstiska.

⁶ Ne enga ima jinguni jámani jaka, nóteru k'amanharhintasïndia; ka ne enga útasï k'amanharhintani jaka, nómeni exeristi Jesusini ka nójtu mítesti.

⁷ Jucheti uátsïticha, ásïksïni nema támu jánhaste: Ne enga sési ambe újka imasï kaxumbititi, ísï eska Krístu na kaxumbeka;

⁸ Ne enga k'amanharhintani jaka ima nóambakitiristi, jimboka nóambakiti uénani jámantkisï k'amanharhintani jaka. Ka Diósï Uájpa indenimendusï úni juti: Nóambakitiri úkuani xerentani.

⁹ Nónema enga Diósï uájpeka k'amanharhintasïndi, jimboka Diósï jimbanhe irekua íntskuskia; ka jimboka Diósï uájpeskia, nóteru úatia k'amanharhintani.

¹⁰ Sóntku jánhaskorhesïndi ne engaksï Diósï uájpejka ka ne engaksï nóambakiti uájpejka; ne enga nósesi ambe újka o enga erachi jémbani no xénhchajka, ima no Diósï uájpesïndi.

Xénhchperakueri juramukua

¹¹ Ka kurhaskajtsïa uénani jámanitki arini aiangperakuani: Eskachi xénhchperaaka.

¹² Ju je no Kainini jámani, ísï nóambakiti uájpeni, erachi jémbani atasti uándikuni. Ka ¿Andisï uandikupkia? Jimboka ima nósesi ambe niátasïrempka ka jimboka erachi jémba sési ambe úsïrempka.

¹³ Erachicha, ásï nósesi xe je engaksïni parhakpeni anapuecha íkimchaska,

¹⁴ juchachi mítetixaka eskachi uarhikuani jurajkuskia ka eskachi iásï tsípekuarhu jarhaskia, jimbokachi juchari erachichani xénhchaasïnga. Ne enga no xénhchpejka, uarhirixati.

¹⁵ Ne enga erachi jémbani ikimchajka atajpitisti, ka mítetixakajtsï eska nóma atajpiti sési jásï tsípekua intsïnhaaka.

¹⁶ Míteskachi néna xénhchpeni, jimboka Jesukristu juchantsïni jimbo tsípekua íntspeska. Jimbochisï juchajtu máteruechani jimbo tsípekua íntspeaka.

¹⁷ Eka nema jatsikorherika ka exeni jarhani eska erachi jémba uétarhenchaxaka ka ima nómbema p'ikuarhenheni, ¿Nénasï úaia Diósï imeri mintsitarhu jarhani?

¹⁸ Jucheti uátsïticha, xénhchpeni no uandakua jimbojkuesïndi, enga sési jimbo xénhchperanhajka; sési jánhasïndi ka sési ambe únhasïndi.

¹⁹ Ísïchi jámani jánhaskaaka eskachi ima jinguniska enga ísïka, ka Diósïni jingunichi sési p'ikuarhenheni jauaka;

²⁰ jimboka ekajtsïni juchari mintsita nósesi ambe p'ikuarhenhetani jarhajka, Diósï sánderu k'éristi eska juchari mintsita, ka ima iámendu ambe mítetixati.

²¹ Xénhchakatecha, engachi sési p'ikuarhenheni jarhajka, úsïngachi Diósïni no chérheparini andarherani;

²² ka imajtsïni iámendu ambe íntskuati eskachi xáni ambe kurhakuska, jimbokachi imeri juramukuani kurhandirakuni jauaka, ka jimbokachi imani ambe úni jarhasïnga enga ima uéjka.

²³ Ka imeri juramukua arhisïndi eskachi Uájpa Jesukristuni jakajkukuaka, ka eskajtuchi xénhperaaka eskajtsïni ima na juramucheka.

²⁴ Ne engaksï Diósïri juramukuechani kurhandirajkia, ima jingunistiksïa, ka imajtu imechani jinguni irekaxatiia. Ka Espirituni jimbochi jánhaskasïnga engajtsïni íntskuka, eska ima jucha jinguni irekaxakaia.