1 Juan 1 - Diósïri Karakata P´urheepecha Jimbo

Tsípekueri uandakua

¹ Karachentaxakaksïni enga xáni ambe uénani jámantki jápka, ka imantu ísï engachi xáni ambe kurhaka, ka engachi xáni ambe juchari jimbo exekorheka, ka engachi xáni tsípekueri Uandakua ambe p'árheka,

² jimboka Tsípekua xarharaska, ka juchachi exeska ka xarhataxakachi ka méntkisï anapu tsípekueri ambechi uandantaxaka, enga Diósï Táte jinguni jápka ka engajtsïni xarhacheka.

³ Indeni ambeksïni aianguxamka engachi xáni ambe exeka ka kurhani, eskajtsï ísï jámani chájtu jucha jinguni májkuentatini jauaka. Eskani jucha Táte jinguni ka Uájpa Jesukristu jinguni na májkuentatini jaka.

⁴ Íni ambechi karantaxaka eskachi ísï jámani sánderu kánekua tsípeaka.

T'ímarhandu irekani jarhani

⁵ Ka indeni aiangperakuachisï Jesusini kurhajchaka, engaksïni iásï chánksïni aianguntani jaka: Eska Diósï t'ímarhandekueska, ka eska ima nósani p'ájpakandekua jukaraska.

⁶ Ekachi uandaparini jámka eskachi ima jinguni májkuentatixaka, ka jinichi p'ájpakandu irekani jarhani, chkuándirasïngachi ka nóchi ísï irekaxaka eska néka.

⁷ Ka engachi t'ímarhandu irekani jarhajka, ísï eska Diósï na t'ímarhandu jaka, ísïchi k'óru májkuentatixaka, ka Uájpa Jesusiri iurhirijtsïni iámendu járhati k'amanharhintskuechani p'ikurhentasïndi.

⁸ Engachi uandajka eskachi k'amanharhintskua nóma jukaraska, jandiojkuchi tandosï úkorhesïnga ka ima enga ísïka no jucha jinguni jarhasti,

⁹ k'óru engachi p'amongorhentaska, úakachi mintsikani jarhani eskajtsïni Diósï púachentaaka. Ima enga nómeni jurajpejka ka kaxumbitini. Ka eskajtsïni iámu pímbinhajkuntajka.

¹⁰ Engachi uandajka eskachi nómeni k'amanharhintaska, Diósïnichi chkuándira úntaxaka ka imeri uandakua nótki jucha jinguni jámaxati.