1 Corintios 8 - Diósïri Karakata P´urheepecha Jimbo

Diósï eratakatecheri ambe

¹ Ka k'éjtsïtakueri ambe xéntatini, engaksï diósï eratakatecha uándikumenhajka ka k'éjtsïtamenhanksï, indeni ambechi mítetixaka jimbokachi iáminduecha míteskia. Ambe enga újka, mímixekua jukari k'éramakorhetpesïndi, k'óru xénhchpeni usïndi eskari iámendu jarhuatauaka.

² Eka nema, ambe ma míteni p'ikuarherajka, nótki mítesïndi nénasï uétarhejki míteni.

³ K'óru ne enga Diósïni xénhchajka, Diósïjtu imani mítesti.

⁴ Jiájkani juchachi mítetixaka nénasï jaki t'irekuari ambe engaksï diósï eratakatecha kéjtsïtamenhajka, eska no ma diósï eratakata parhakpenirhu ambe méska, nóksï diósïsti jimboka Diósï májkueska.

⁵ Ka nájkirukaksï uáneka jaka auandarhu ka parhakpenirhu engaksï diósï arhiani jaka, (ka ísï jamanksï uánekua diósïcha ka acheticha jarhaskia),

⁶ ka juchari jimbo májkuesti Diós, Táte enga iámendu ambe kueraaka ka juchachi imeriska. Ka májkuesti Acha Jesukristu enga jimbo iámendu ambe jaka, ka juchachi ima jimbo jarhaska.

Sési jasï uékperata

⁷ Nájkirukaksï no iámenduecha míteka ini ambe; jimbokaksï máru útasï p'indeska diósï eratakatecheri kéjtsïtakata t'ireni; jakajkuparini eska inde kéjtsïtakua diósï eratakatecheriska, ka k'amanharhintasïndiksï jimbokaksï no úsïnga jánhaskani, ka mámaru ambeksï eratsentani pakarasïndi.

⁸ Nóchkajtsïni t'irekuasï Diósïni andarhetantajti. Nóchi sapichu ambeuaka no t'irerini óchi k'éri ambeni t'irerini.

⁹ K'óru xéparini jáma je, máteruechani jinguni engaksï nótki sési jákajkuni jáka, eska chári jánkua no terungutauaka imechani.

¹⁰ Jimboka ekakini nema exeska uaxakatindi jarhani t'ireni jima enga diósï eratakata jaka, ima jánhaskaati eska imajktu úaka arhani engaksï diósï eratakatecha kéjtsïtamenhajka.

¹¹ Ka ásï chéti jurhenkua jimbo tsîjpa indeni erachini enga iásï nóna jurhengorhini jaka, jimboka Krístu inderi jimbo uarhiska.

¹² Isïchkajtsï erachini támisï páxaka, nósesi p'ikuastaparini jimboka inde nótki nósesi jákajkusïnga, ka ísï jámantsï Krístuni k'amanharhikuntaxaka.

¹³ Jiájkani ekani jucheti t'irekua jimbo, jucheti erachini tsîrhukutarajka, nóteruni meni auaka k'uiripeta, jimbokani no uéksïnga jucheti erachini tsîrhukutarani.