1 Corintios 7 - Diósïri Karakata P´urheepecha Jimbo

Temungurhiri irekua ambe

¹ Ka indeni ambe engajtsïni karacheka kurhamarheni; “Sánderu sésiuati eska no tembuchanhapiringa ka no p'arheperanhani”,

² k'óru indeni xani ísku jánchakua jimbo, sánderu sésiuati eska tumbi tembuchakorhiaka, ka uatsïjtu uámbuchakorheni.

³ Ka eskaksï temungurhirini p'arhperaaka egaksï uekani jauaka úni.

⁴ Nóteru temberstia imeri anhanhatakua uánberistia, ka májkueni nóteru uámberistia imeri anhanhatakua temberistia.

⁵ Asï jáma je no p'arheperani jarhani, ka ekajtsï pakatperaka namuni jurhia no p'arheperani, ka íntskukorhentantsï Diósïni kómuharhikorheni, sési jauti, tátsekuajtsï uaka menderu márku p'arheperani, nójtsï ménisï no úni p'ingukorheni ka Nóambakitiksïni terungutani ekajtsï no márku jáuaka.

⁶ Nóksïni juramuchexaka, chári sési jimboksïnisï sáni ísï arhijtsïkuni jaka.

⁷ Ji uékapiringa eskasï iámindu tsíueraticha jíini járhantapiringa; k'órujtsï mámaru jarhati Diósïri k'ontperata intsïnhaaska, ka táchani mámaru járhati.

Néna jamani máteruecha jinguni

⁸ No tembuchatichani, uachecha ka tumbicha ka tsîndichani, kurhaa je, sésipirindi eskajtsï jíini pakarapiringa.

⁹ K'óru enkajtsï no újka p'ingukorheni, tembucha je, sánderu sésisti témbuchatini jarhani eska kurhintani jarhani uékani úni.

¹⁰ Ka cha temungurhiricha arhixakaksïni, k'óruksïni no jísï arhiaka, Achaksïnisï juramucheni jati: Eska temba no jámaaka uámbani jurajkuni,

¹¹ ka eka jurajkuska ásï uambuchante, uámbanisï ménderu sési arhintaati, ka uámbajtu tembani ásï jurajkue.

¹² Ka iásï máteru k'uiripuechani jísïni arhiani jaka, nóteru Achaia: Eka ma jakajkutiri temba no jakajkutika ásï jurajkue, eka temba xénhchajka.

¹³ Ka eka temba jakajkutika ka uámba nómbe, ásï jurajkue, enga uámba xenhchajka.

¹⁴ Jimboka uámba no jakajkuti, újchakurakatentasïngia tembani jimbo, ka temba no jakajkuti uámba jakajkutini jimbo újchakurakatestia. Eka no ísïpiringa chári sapichaksï no újchakurakatepirindi ka indeksï erakukata jarhastia.

¹⁵ Ka engaksï temungurhiricha, no jakajkuticha jámaska jurajperani, jurajkueksï ísï úni; xásï ambe, jakajkuti temungurhirichaksï nombe maksï jatsisti uandani, Diósï jinisï uéjti eskaksï sési pájperaparini irekaaka.

¹⁶ Ka materia, ¿T'u nanachi nénari mítea eskari úaka chéti achetini p'ímutantani? O, ¿T'u tatachi nénari mítea eskari úaka chéti uarhitini p'ímutantani?

¹⁷ Ka materia, eskajtsï iámendu ísï irekaaka eskaksïni Acha na sésikua intskuni jauaka, ísï eskaksï na jápka engajtsïni Diósi uandajpaka: Ji iámendu tángorhikuechani íni ambesïni juramukuani jaka.

¹⁸ ¿Nemani Diosï minda jukari uandajpaski? Ásï k'urhatse. ¿Nemani no mínda jukarini uandajpaski? Ásï mínda juke.

¹⁹ Jimboka mínda jukani o no jukani nómbe méska, jínisï uétarhejti Diósïri juramukuechani janhanharhiani.

²⁰ Ísïchka pakara je mándani arhini eskajtsï na járhatipka, jiájkani engaksïni Diósï uandajpapka.

²¹ ¿Jántspirispiri ekari uanjapanhapka? Ásï uandanhia. Ka ekari újka, jángorhentsï nóteru jántspenia.

²² Ekari jántspiripka ekakini Acha uandajpantapka, iásïri nóteru jántspiriskia Acha jinguni. Ka ekari no jántspiripka ekakini Acha uandajpantapka, iásïri Krístueri jántspiriskia.

²³ Ka chájtsï jukaparhakua jimbo piánhantaska, ásteruchka nemeri jántspirintsï je.

²⁴ Chachkajtsï ísï pakaraaka erachicha Diósïni japarini, eskajtsï na uandajpanhapka.

²⁵ Ka chánksïni jimbo engajtsï no tembuchatika ka uambuchatini. Acharini nómbema juramuchesti chánksïni jimbo; k'órurini Acha kóndestasti eskani mintsinharhikueuaka ka jísïksïnisï arhini jaka.

²⁶ Sánderu sésiuati, iásï enga xáni nósesi jánhaskorheka, eska mándani arhini pakaranhaaka eska na janhaka.

²⁷ ¿Tembuchatiskiri? Ásï jáma uarhitini jurajkuni. ¿Nóri tembuchatiski? Ásï jáma tembuchani.

²⁸ Ekari tembuchaska o t'u uátsï ekari uambuchaska nójtujtsï k'amanharintaxaka. K'óru ima engaksï tembuchaaka jukariksï tsitikua ambe uandanhiauati, ka nósesiksï mitamanchani jauti imani jimbo, ka nóksïni uékapiringa ísï exeni.

Jakajkuticheri jángua

²⁹ Arhikuekaxaka erachicha, eskaksï jurhiakuecha sóntku nitamaxaka: Jiájkani cha tembuchaticha, ísï ireka je enajkijtsï ambe no tembuchatini jaki;

³⁰ ka ima engaksï uerajka, asïksï ueree, tsípeparinksï jame; ka ima engajksï tsípeni jaka, miskorhenksï jaue; ka cha engajsï ambe piani jaka, ásï míngorhe je;

³¹ ka cha engajksï parhakpenirhu tsípekorheni jaka, ásï indeni jimbo tsípe je; jimboka inde ambe enga parhakpeni jaka nitamaati.

³² Nóchkaksïni uékapiringa uandanheata jinguni exeni jarhani. No tembuchati ma Achani jimbo uandanhiasïndi, néna Achani marhuakuni,

³³ ka tembuchati parhakpeni anapu ambe jimbo uandanheasïndi, ka néna témbani jeiapanhetarantani,

³⁴ ka ísï táchani eratsetini irekanhaxati. Uátsï, ka ima enga no uambuchani jaka, Acheri ambesï uandanhiauati, néna sánderu pímbinhaxetini mintsita ka espiritu jinguni; jimboka uambuchati, parhakpeni anapu ambejkusï uandanheatajti, ka néna uámbani sánderu jeiapanhetarantani.

³⁵ Chári sési jimboksïnisï íni ambe arhini jaka, nóksïni p'íngukuekaxa, jínisïni uéjka eskajtsï janhanharhperaparini irekaaka ka eskaksïni nómbema ójkutaaka Achani k'amak'amasï marhoakuani.

³⁶ Eka nema p'ikuarerhajka tembuchankchania, ka tembunhajtu uekani jarhani ka k'érinia, sésiuati no k'amanharhintskuesti tembuperani.

³⁷ Ka ima enga sési eratsentaka, ka úni p'inkukorheni ka no tembuchani, ka tembunhani janhanharhini. Imajtu sési uxati.

³⁸ Jiájkani ne enga tembuchajka sési uxati; ka nénga no tembuchajka sánderu sési úxati.

³⁹ Témba ma, uámbani méntkisï pámbeati, eka jamberi uámba irekani jauaka; ka enga uámba uarhiska, jiájkani Achani jimbo úati jakajkuti ma jinguni uambuchantani, néni enga jeiapanhentaaka.

⁴⁰ K'óru sánderu sésiuati eka nóteru uambuchantapiringia; jíchkasïni ísï arhijkia jimbokani jíjtuni p'ikuarherasïnga Diósïri Espirituni jinguni jarhani.