1 Corintios 6 - Diósïri Karakata P´urheepecha Jimbo

Arhirperateri ambe

¹ Eka cha ma isï máteru nema jinguni arhirperata jatsiaka, ¿Andi tekauajtsï juramuti no jakajkutini jinguni pájperani, ka jakajkutichanitsï ísku uanopakuani?

² ¿Andi nójtsï míteski eskaksï jakajkutichasï, parhakpeni anapuechani k'amanharhirantauaka? Ka ekajtsï parhakpenini cha k'amanharhirantaaka ¿Andi nójtsï usïnki sapichu ambe arhirperatani sési péntani?

³ ¿Andi nójtsï míteski eskachi ánjelichantu jucha jamberi k'amanharhirantauaka? Ka nénajtuchi ini irekuani no uá jucha sési péntani.

⁴ Engajtsï íni jarhati arhirperata jatsijka pauani pauani, ¿Andijtsïsï indechani p'erarhekorheajki, engaksï tángorhekuarhu nómbe méka, ka juramutintsï uekani perani?

⁵ K'uratsetaniksïnisï isï arhini jaka. ¿Andi nóma jakajkuti jaki cha jinguni míakua jukaria ka mímixetinia, enga úaka jakajkuticheri arhirperata sési péntani?

⁶ Ka nójtsï erachi jakajkuticha jínkunkusï xani arhirhperajka, ka útasterujtsï no jakajkuti juramutu jinguni p'ájperani jarhani.

⁷ T'uinchka uandanheatestia eskajtsï jimintku arhirperani jauaka. ¿Andi nójtsï sáni upirini tekatsperantani? ¿No sánderu sési japirini jurajkutakorheni eskaksïni ambe euakorhiaka?

⁸ Ka chájtsï jimintku sánderu nósesi útsperaxaka jimbokajtsï chájku sïpatsperaxaka, ka úmentku jakajkutichani jinguni.

⁹ ¿Andi nójtsï míteski eskaksï nósesi úricha Diósïri irechekuani no inchaaka? Ásï tándonhaskorhe je, ísku jándichaksï ka engaksï eratakatechani diósïrajka, ka uichueni jandicha, ka kuesetsïcha, ka tsiueraticha engaksï tsitijperajka máteru tsiuerati jinguni,

¹⁰ ka ni sïpajkurheecha, ka tumina kánhchaticha, ka kauichecha ka nósesi uandaricha, ka ambe euakorpitichaksï Diósïri irechekuani no inchaati.

¹¹ Ka chájtsï máru urhetku xárhatispka, k'órujtsï iásï sési jajkunhantaskia ka pímbinhajkunhantaskajtsïa, ka kaxumberanhantaskajtsïa Acha Jesukristueri jakangurhikua jimbo, ka ístu juchari Diósïri Espirituni jimbo.

Diósïjtsïni sési jajkuntasïndi

¹² Uandanhasïndi, “Ji iámendu ambe úaka úni”, jo isïsti, úakari k'órukini no iámendu ambe marhoacheati. “Ji iámendu ambe úaka úni” k'óruni jángorhiaka eskarini nómbema pájtamaaka.

¹³ Ka uandanhasïndi, “T'irekua sïturhiristi, ka sïturhi t'irekueristi” jo ísïsti k'óru Diósï tsimani ambe k'amajkuauati. K'óruchka anhanhatakua no ísku jánditarakuesti, jimboka Acheriska, ka jinichisï juchari anhahatakuani urapiringa Achani marhuakutarani, jimboka anhanhatakua imeriska.

¹⁴ Ka Diósï enga Achani tsítantaka, juchantsïntu méntkueni tsítataati imeri uinhapekua jimbo.

¹⁵ ¿Andi nójtsï míteski eska juchari anhahantakua Krístuni jinguni májkuentatixakaia? Ka ¿Andi ji úpirini p'íkuni anhantakuani enga Krístuni jinguni májkuentati jakaia, ka ísku jándi ma jinguni kurhetani? Méntku nómbe.

¹⁶ ¿Ójtsï no míteski, enga nema uarhiti ísku jandi ma jinguni k'uiaaka, eskaksï májkuentasïndiksï ima jinguni? Jimboka ísï karakata jarhaska: “Tsimarhenksï májkuentaati”

¹⁷ K'óru ne enga Acha jingunintajka, májku espiritu jingunintasïndi ima jinguni.

¹⁸ Jángorhensï je kéndikukuni ísku jándikuani. Naki uéjki ma máteru jasï k'amanharhintskua tajtsïkuni pakarasïndi ka no ambendarhesïndi anhanhatakuani; k'óru eka ísku jandi ukorheaka ambendarhekorhesïndi.

¹⁹ ¿Ójtsï no míteski eska chári anhanhatakua Espiritu Santueri tiósteska, ka eskajtsï p'iraska Diósïri Espiritu enga cha jinguni jakaia, ka eska no cháriska?

²⁰ Chájtsï jukaparakua jimbo piánhantaska, ka ísï jimbo k'éri ambechka arhi je Diósïni chari jángua jimbo.