1 Corintios 4 - Diósïri Karakata P´urheepecha Jimbo

Krístueri uankua paricha

¹ Ka ísï jimbo, chájtsïni Krístueri jántspirintku exe je, ísï eskaksï ima engaksï patsajka ka jurhetpeni Diósïri no mítekata ambe.

² Ka iásïchka, enga uetarhejka eska ma patsari ka jurhetpiri mintsinharikueuaka.

³ Nájkirukani ji no uandanheajka ekajtsïni cha o juramuti ma jíndeni k'amanharhirantaaka; jimbokani ji jamberi no úsïnga exekorheni nénasïni jámani jaki.

⁴ Ka nájkirukachkani nómbema míajka nósesi úni, ka no isï jimbo kaxumbiti arhikorhexaka; ka jíndendini Achasï k'amanharhitantaati.

⁵ Jimajkani, cha ásï urhetatapakorhe je arhinharhikpeni eroka je enga jamberi Acha janoaka. Jimboka imasï xarhataaka, ambe enga pájpakandu únhaka ka ambe enga p'ikuarhenhenhani jaka. Jiánisï Diósï mandani arhini sési arhiantauati ka intsaani ambe enga andakorhenhaka.

⁶ Erachicha, juchantsïni exe je, na engani ji ka Apolusï jámapka; ka eskajtsï juchari jankua jimbo jurhengorhiaka “Xántku u, ka uandani eska na karakata jaka no jukari jamberi” ka nójtsï jámani, nema jinguni sési xékorheni ka máteruni ikiakuni jarhani.

⁷ Miachka ¿Nékisï t'únhani k'eri u? ¿Ka ambesï chéti ekari no intsïnhaka? Ka ekari iamu ambe intsïnhaka, ¿Andirisï k'éramakorhejki? Enakiri ambe t'u jirinhakorhe k'érikua.

⁸ Xarharaxati, eskajtsï iámendu ambe kankorhsïnkia, jatsikorherijtsï ukorheskia. ¡Ka eskajtsï irecheni juramuxaka juchantsïni no uetarhenchaparini! ¡Sésipirindi engajtsï sési jimbo irechepiringa, ka jucha jamberini cha jinguni juramupiringa!

⁹ Jimbokani ísï p'ikuarherasïnga enajkijtsïni Diósï juchantsïni ísku ambemeni exejki, engachi uandakua pani jámka, enajkijtsïni ánjelicha ka iámu parhakpeni anapuecha erajpantani jaki néna engani jucha uárhikuarhu jakiaia.

¹⁰ Ka Krístuni jimbo, enakini jucha tandosï ukorhia, ka enaki chári jimbo imani chuxapani mímixekue. Enajkini jucha no uinhapiti, ka cha uiuinhaxeni. Ka chájtsï k'éri exenhasïnga, ka jucha no xénhchakateni.

¹¹ Jucha iásï jamberi k'arhimakua ka k'arhichakua nitamanchaxaka, ka nómbe ma xukuparhatini, nósesichi kánsïnga ka nóchi jatsikorheska nani niantani,

¹² p'atujkuntasïngachi xani ánchekorhekorheni. Ka engajtsïni arhinchaaka, jucha komarhijpekuantaasïnga. Ka engajtsïni atakuekani kamaka jucha tekakuantaasïnga.

¹³ Engajtsïni arhinhchani jauaka, jucha kaxumbekua jinguni mókukuantaasïnga. Íni párhakpeni iámenduechajtsïni tsïtakata ambeni, ka jurajkukata ambeni exeati.

¹⁴ Nóksïni k'uratsetakuekanisï karacheni jaka ini ambe, jiniksïnisï uejka sáni arhijtsïkuni eska jucheti uatsïti xénhchakatechani.

¹⁵ Jimboka nájkirukajtsï Krístueri jurhentpirichani uánekua jatsiaka, k'óruksï no iámendu tátesti. Jesukristueri ambakiti aiangperakua jimbo jísïni táteka, jimbokaksïni jísï kángorhentaka.

¹⁶ Isï jimboksïnisï, komarhini jaka eskajtsï isï jámaaka eskani ji jámka.

¹⁷ Isï jimboksïnisï Timoteoni axacheka, jucheti uatsïti enga Achani mintsikajka; indeksïni miatati ji Krístu Jesusïni jimbo nénasïni jámki, iápuru isï ka iámendu tángorkuecharhu nénasïni jurhetpejki.

¹⁸ Ka chájtsï máru jukari k'éramakorhexaka eratseparini eskaksïni no uaka nirani p'urhembeni;

¹⁹ ekarini Diósï sésikua íntskuni jauaka, ji niuaka no iondani cha jinguni, ka jiáni exeaka na xántsï uinhapekua jatsiski engaksï uandauandameparini k'érhamakorheni jaka.

²⁰ Jimboka Diósïri irechekua no uandakua ambejkueska, uinhapekuesti.

²¹ ¿Nénajtsï uéksïnki eskani niaraka? ¿Ikiatintku, o uékperakua ka kaxumbekua jinguni?