1 Corintios 16 - Diósïri Karakata P´urheepecha Jimbo

Judea anapuechani jarhojperata túmina tánakua

¹ Ka túmima tánakueri ambe engaksï Diósiri jakajkuticha míndamenhatini jaka, chájtu méntkueni u je eskani ji Galasia anapu tángorhekuechani na arhistakuaka.

² Mándani dominguechani, na engajtsï xani andakorhiaka iámenduechajtsï arhutakoreaka sáni, ka támujtsï patsaaka, ka nójtsï jiáni uénania tánani engani ji jima jauakia.

³ Ka engani niarakia, imechani engajtsï cha erakuauaka karakata mítetarantskuachi íntsauaka, engaksï Jerusaleni niuaka jarhojperata túmina pani.

⁴ Ka enga k'uaniska jíjtuni nirani, májku k'érichi niuaka.

Páblu úskuxapti nani nirani

⁵ Niuakaksïni p'urhembeni ka ekani Masedonia na parhiakuakia, jimbokani jimesï nitamaaka.

⁶ Nándikani namuni jurhia úaka cha jinguni pakarani, o jamberini iauantskua jímini nitamani, ka tátsekuajtsïni cha jarhuataakia nani enga k'uaniakateru nirani.

⁷ Nóksïni uéksïnga xani jirejiresï exemani, ekarini Acha sésikua íntskuska, namuni jurhia cha jinguni pakaraaka.

⁸ K'óruni ixu Éfesu pentekostesiri jurhiakua jamberi pakaraaka,

⁹ jimbokani ixu sésikua íntsïnhaxaka eskani ánchekorhiaka, Diósïri uandakua jinguni, nájkirukajtsïni uánekua ikiachejka.

¹⁰ Eka ambe Timoteu niáraska, jángorhentsï je eska cha jinguni sési p'ikuarheraka, imajtu jíni jámaxati Diósïni ánchekorhekuni.

¹¹ Ásïchka nema sapichu erate, sési pájpera je ima jinguni ka jarhuata je eska sési junkuaka, jimbokani jucha máteru erachicha jinguni erontaxaka.

¹² Apolusïni juchari erachini, ji kánekua kómuarhispka eskaksïni nipiringa máteru erachicha jinguni p'urhembeni, ka ima iásï no uékasti nirani, nándika máteru jimbo úaka nirania.

K'amarhuni jámani arhistatsperakua

¹³ Jinguntkuchka ja je ka méntkisï Diósïni mintsikani jarhani, ka ts'iuentsï ka uínhapekorhentsï je.

¹⁴ Iámendu ambe tsípekua ka xénhchakua jinguni u je.

¹⁵ Chájtsï míteskia erachicha, eskaksï Akaio isï anapuecha uénaspka ambakiti aiangperakuani jakajkuni, Estefanio k'umachekuarhu anapuecha, ka jiáni uératinksï jakajkutichani marhuakuaxati.

¹⁶ Kómarhixakaksïni eskajtsï kurhajchauka imeni jarhati k'uiripuechani, ka máteruechantu engaksï ini ánchekorhetani íntskukorhentajka úni jarhani.

¹⁷ Ji kanekua tsípexaka engajtsïni Estefanasï ka Fortunatu ka Akaiku juka p'urhembeni, indejtsïni jarhuatasti engajtsï cha no úka jurhani,

¹⁸ ka jucheti ka chári espirituniksï sési p'ikuastasti. Xárhati k'uiripuechani jurhengorhe je janhanharhiani.

Uanadanuntskua

¹⁹ Ásia anapu jakajkutichaksïni uandajperata axachexati. Akila ka Prisila ka iámendu engaksï xáni imecho tángorhejka, Acha jimboksïni uandajperata axachexati.

²⁰ Iámendu jakajkutichaksïni uandajperata axachexati. Chájtu iámenduecha sési uandajpera je jájki íntsperaparini.

²¹ Íni uandajperataksïni ji Páblu, jucheti jájki jimbo ts'irimerachexaka.

²² Eka nema Achani no xenhchajka, ¡Ikimekateuati! ¡Acha juchari, jungua ia!

²³ Ka eskaksïni Acha Jesusi kóndeni jauaka.

²⁴ Jíksïni iámenduechani, Krístu Jesusi jimbo xénhchasïnga.