1 Corintios 15 - Diósïri Karakata P´urheepecha Jimbo

Krístueri tsíntskua

¹ Erachicha, uéksïngaksïni míatantani ambakiti aiangperakuani engaksïni jurhendakia, ka engajtsï sésï anhaxurhikorhetini ka mintsikani jaka,

² ka indeni jimbojtujsï p'ímutantskateuaka, ekajtsï ísï jakajkuni jaka eskaksïni na arhistachepka, ka eka no ísïka, nóchkajtsï sési jimbo jakajkuska.

³ Jíksïni uénakuarhutkisï jurhendapkia ambe engani ji jurhendanhapka: Eska Krístu uarhiska, juchari k'amanharhintskuechani jimbo, ísï eska na karakata jaka,

⁴ enga jatsinhantapka, ka tanimu jurhia jimbo tsíntani, eska na karakata jaka;

⁵ ka enga Pédruni xarhakuntapka, ka tátsekua témbeni tsimani jurhengorherichani.

⁶ Ka tátsekua jukari ma irepeta ka iúmu ekuatse jakajkuti erachichani xarhakuantaspti, uanekuaksï máru útasï irekaxati ka máruksï uarhistia.

⁷ Ka tátsekua Santiaguni xarhakuspti, ka tátsekua iámendu imeri uandakua párichani xarhakuaspti.

⁸ Ka jíndendini tátsekua xarhachesptia, eskani ambe ji charhaku no niárakata ma.

⁹ Jimbokani ji sánderu sapichueska máteru uandakua paricha jinguni, ka no jamberini nitatarheska Jesusiri uandakua pári arhinhani, jimbokani Diósïri jakajkutichani ataani káasïrempka.

¹⁰ Ka engani ísï Diósïri uandakua párika, Diósïri kóntperata jimbojkuesti. Ka inde kóntperata no ísku ambe mésti, jimbokani sánderu incharhetakuska ánchekorheni eska máteru uandakua páricha. Nájkirukani no jípka, enga ánchekorhenka, Diósïri kontperakuasï jíndeni jinguni játi.

¹¹ Enga sánderu jukaparhakuekaka. Ka ne uéjki uandantani, ji o máteru jurhetpiricha jucha íni jurhentperakuanisïni uandantajka, ka chájtsï íni jakajkukuanisï jakajkuni jaka.

Uarhiricheri tsintskua

¹² Ekachi jucha Krístueri tsíntskua uandantani jaka jiájkani, ¿Ka andichisï máru uandajki eskaksï uarhiricha no tsíntasïnga?

¹³ Jiájkani enga no tsínhantajka, Krístujtu no tsíntasti.

¹⁴ Ka eka Krístu no tsíntaka, jiájkani juchari aiangperakuajtu nómbema marhoasïndi, ka juchari jakajkukuajtu no marhosïndi.

¹⁵ Eka ísïpiringa eskaksï uarhiricha no tsíntasïnga, jiájkanchi jucha Diósïni chkuándirakuxaka, jimbokachi jucha ísï uandantaxaka eska ima Krístu tsítantaska, ka no ísïni.

¹⁶ Jimboka ekaksï uarhiricha no tsíntajka, jiájkani Krístujtu no tsíntasti.

¹⁷ Ka eka Krístu no tsíntaka, chári jakajkukua no marhoasti, ka k'amanharhintaxakajterujtsï.

¹⁸ Jiájkani tsînchetixatiksï ima engaksï Krístuni jakajkuparini uarhika.

¹⁹ Ka eka juchari tsípekua jindepirinka ini parhakpeni Krístuni mintsïkani jarhani, jiájkanchi jucha sáni p'amojkukakeska.

²⁰ Nómendu ambe ísïsti, Krístu tsíntasti, ima iámenduechani urhekupunkuasti engaksï tsíntaaka.

²¹ Ísï eska na ma achetini jimbo juka uarhikua, tsínkuajtu májkueni ma achetini jimbo juuati.

²² Jimboka ísï eska na iamendu Adani jimbo uarhinhajka, májkuentu Krístuni jimbo iámendu tsínhantaati.

²³ K'óru mándani arhini tsínhaanti na enga jatini k'uaniaka, Krístu uénasti, ka tátsekua, enga ima júnkuaaka, iámendu engaksï imani jákajuka tsíntatiksï.

²⁴ Ka tátsekua, k'amarhukua juuati enga Krístu na iámendu Diósï Táteni irechekua íntskuntaaka, ka enga iámendu juramutichani, ka uinhapekuechani k'amajkuauaka.

²⁵ Jimboka Krístu játsiska jiáni jamberi juramuni, enga na iámendu imeri ikiatspirichani jatanduatini jauaka.

²⁶ Ka k'amarhuni jamani, imeri ikiatspirini uarhikua pántaati.

²⁷ Jimboka Diósï iámendu ambe Krístueri juramukua jimbo jurajkuska. Ka enga arhijka eska iámendu ambe imeri juramukua jimbo jarhaska, ámbantku kurhangukorhesti eska Diósïni no inchataxaka. Jimboka Diósïsï iámu ambe imani jurajkukuka.

²⁸ Ka enga na iámendu ambe Krístueri juramukua jimbo jauakia, Krístujtu májkueni jauati Diósïri juramua jimbo, enga iámendu ambe Krístueri uinhapekua jimbo péraka, ka eska Diósïjku úaka sési iámendu ambe juramuni,

²⁹ Enga no ísïpiringa ¿Ambe úni uarhirichani jimbo itsï atajtsïnhani japirini? Ekaksï uarhiricha no tsíntajka, ¿Andiksïsï uarhirichani jimbo jiájkani itsï atajtsïjki?

³⁰ Ka juchachi ¿Andisï méntku isï chéparini uarhikuarhu jámani jarhajkia?

³¹ Erachicha pauani pauani uarhikuarhu jámsïnga, jimboka ísïska engani xáni tsípeni jaka, chánksïni jimbo juchari Acha Krístu Jesusini jinguni, engani pauani ka pauani uarhikuarhu jámaparini jarhajka.

³² Engani Éfesu ísï uarhipeka k'uiripu ikimenharhichani jinguni, ¿Jiájkani ambe andaskia? Ekaksï uarhiricha no tsíntajka, “Jiájkani ju je t'ireni ka kauini akorachi no ióndani uarhiaka.”

³³ Ásïksïni tandojtsïkue: “No ambarhati k'uiripuechaksï pájtamaasïndi sési jarhati p'indekuechani.”

³⁴ Sési eratsentsï je eska na k'uanijka, ka ásteru k'amanharhintsï jeia, jimbokani míteska eskaksï máru Diósïni no míteska, engaksï cha jinguni jaka. Isïksïni arhixaka nándikajtsï sáni ísï k'uratseaka.

³⁵ Ka nema jamberi uandaati: ¿Nénaksï uarhiricha tsíntaa? ¿Ka nénaksï jarhati menderu junguaa?

³⁶ ¿Andi xáni no jánhaskanhasïnki? Eka ambe júkskanhajka teresïndi, ka menderu tsïuantasïnti.

³⁷ Ambe enga júkskanhajka no anhatapuesïndi enga andarajka, tsíri májkuesïndi, tarheteri o tríjueri, o máteru jasï anhatapueri.

³⁸ Ka Diósïsï újti eska andaraaka eska ima na uékaaka. Eska mándani jasï ikarakata mámaru jaxeaka.

³⁹ No iámenduecha méntkueni járhanhasïndi: K'uiripu, ma jaxesïndi; ka manakorherichaksï máterueni jáxeni, ka káratichaksï ka kuruchechaksï máterueni jaxesïndi.

⁴⁰ Mámaru jaxekua jarhasti, auandarhu ma jásï jarhasti ka parhakpeni máteru jasï jarhasti; k'óru mésti sési jaxekua auandarhu anapu, ka máteruesti parhakpeni anapu.

⁴¹ Ma jáxesti Tata jurhiateri t'íntskua, ka máteru jáxesti nana kutsïri t'íntskua, ka jóskuecheri máteru jáxesti. Ka k'óru joskuechaksï táchani mámaru mereasïndi.

⁴² Májkueniuati uarhiricheri tsíntskua. Ne enga jatsinhantaaka tereati; ka enga tsíntaaka menderu jimbanhentati.

⁴³ Enga nema, o ambe ma jatsinhantajka nóteru marhuasïndia, k'óru enga tsintajkia k'éri ambe arhinhasïndi, májkuenisti. No uinhapiti ambe jatsinhantasïndi ka uinhapekua jinguni tsíntasïndi.

⁴⁴ K'uiripuekua jatsinhantasïndi, ka espiritusï anhanhatakueri jimbo tsíntajti. Jimboka ísï eska na jaka anhanhatakua, k'uiripuekua ma májkueni jarhasti espiritueri anhanhatakua.

⁴⁵ Ísïchka karakata jarhasti: “Adani enga urhetku kueranhaka, tsípekua intsïnhasti”; ka Adani enga tátsekua juka, espirituesti enga tsípekua íntspejka.

⁴⁶ K'óruchka no espirituekuasï urhetiti, k'uiripuekuasï urhetiti ka tátsekua espirituekia.

⁴⁷ Acheti enga urhetika echeriri únhaspti, ka acheti enga tsimandarhueka auandarhu anapuesti.

⁴⁸ Parhakpeni anapuechaksï acheticha echeririni jáxesti; k'óru né engaksï auandarhu anapueka, imenksï jáxesti enga auandarhu anapueka.

⁴⁹ Ka ísï eskachi na k'uiripu echeriri, parhakpenirhu anapueni jáxeka, tátsekuachi ísïjtu imeni jáxentaaka enga auandarhu anapueka.

⁵⁰ Erachicha k'óruksïni arhixaka: K'uiripekua enga iurhirika ka k'uiripeteni Diósïri irechekuaksï no p'iuati: Jimboka ambe enga terejka, no úati imentu enga no terejka.

⁵¹ K'óru sési kurha je, arini ambe enga no mítekorheka: Uarhikuajtsïni no iámendu janocheati, k'óruchi iáminduecha ménderueni jájkunhantaaka,

⁵² ma arisku mínharhikua jimbojku, jiáni enga máterku trompeta sïuangueri kustanhakia. Enga trompeta sïuangueri kurhakorhiakia, uarhirichaksï ménderueni jaxentatini tsíntaati, ka juchajtuchi ménderueni jájkunhantaaka.

⁵³ Jimboka ísï eska juchari k'uiripuekua enga terejka, menderueni jaxentaati enga nóteru meni tereakia; ka i k'uiripekua enga uarhijka, ísï jaxeati eska nóteru uarhinia.

⁵⁴ Ka enga i k'uiripekua xaxentajka eska nóteru terenia, ka enga uarhijka xáxentani eska nóteru uarhiania, jiánisï úkorheati eska karakata na arhijka: “Uarhikua k'amajkunhastia.

⁵⁵ Uarhikua: ¿Andirisï uandajki eskari andapitiska? ¿Nénari páski chéti ch'urhurpetarakua?”

⁵⁶ K'amanharhintskua uarhikueri ch'urhurpetarakuesti, ka juramukua k'amanharhintskuani sánderu uinhaperasïndi.

⁵⁷ ¡Diósïni k'óru diósïmaiamu arhisïnga, engajtsïni juchari Acha Jesukristuni jimbo andaraka!

⁵⁸ Ísï jimbo, jucheti erachicha, méntkisï sési anhaxurhikorhe je, Acheri ukuechani jimbo, míteni eska Achani marhoakuni jamani juchari ánchekorheta no ísku ambe méska.