Biblia Todo Logo
Bìoball air-loidhne

- Sanasan -

1 Corintios 13 - Diósïri Karakata P´urheepecha Jimbo

1 Ekani ji úpiringa iámendu jásï uandakuechani uandaani, ka jini no kámani kaxumbekua, ka nájkirukani ánjelini jamberi uandaaka, ji ískuni tiamueni xamonheaka ka tintinaskani.

2 Ka nájkirukani jurhenaaka Diósïri uandarini, ka iámendu ambe enga no mítekorheka ji sési kurhanguni ka míteni; ka nájkirukani Diósïni xani mintsikaaka ka jamberi úni juatechani móskuani, nómbemeska ekani no kámaaka xénhchperata ka kaxumbekua.

3 Ka nájkirukani jucheti jatsikorhekua iámu intsïmpeaka, ka jucheti anhanhatakua jamberini íntspeni eska kurhinhataka, ka no kámani xénhchperata ka kaxumbekua, nórini ambe ma marhoacheati.

4 Xénchpeni ma, iámendu ambe tekantasïndi ka méntkisï jarhojpeni; xénhchpejka no epurpesïndi ka nójtu k'éramakorhesïndi o teparakorheni,

5 ka nójtu nósesi mokukorhesïndi, ka níjtu uarhiseni, ka ni kurhunkpeni o patsahentspeni.

6 Ka enga nósesi únhaaka no jamasïndi tsípeni, jurhimbekua ambe jimbosï tsípejti.

7 Iámendu ambe tekatspentasïndi ka iámendu ambe jakajkusïndi, ka iámendu ambe kurhangutspesïndi.

8 Xénchpekua nómeni k'amakurhisïndi, uandatskua ambe k'óru k'amakurhiati, ka úni mámaru jasï undakua undani k'amakurhiati, ka mímixekuajtu k'amakurhiati.

9 Jimbokachi no iámu ambe míteska ka nóchi iámu ambe uandantasïnga,

10 ka enga jurhimbekua mítekorhiaka, k'amandeati ambe enga no jurhimbekueka.

11 Engani ji sapipka, sapini uandaxesïrempka ka sapini eratsïsïrempka, ka engani k'érikia, jurajkuska sapiri jángua ambe.

12 Juchachi iásï eratekorhekuekaxaka ka nóchi úsïnga jimbokachi xuranhaskasïnga, ka niáraati jurhiata engachi sési míteaka jurhimbekua ka sésichi exeni, ka jíani k'óruni míteaka Diósïni ísï eskarini ima na míteka.

13 Jiájkani tanimu ambesti enga nómeni k'amakurhijka: Diósïni mintsikani, ka aiatsperakua erokorheni, ka xénhchperakua. K'óru xénhchperatasï sánderu jukaparhakueti.

Biblia en P´urhépecha, Michoacán, México © Sociedad Bíblica de México, A.C.

Bible Society of Mexico
Lean sinn:



Sanasan