1 Corintios 11 - Diósïri Karakata P´urheepecha Jimbo

¹ Chájtu jíni jáma je, ísï eskani ji na Krístueni jámka.

Néna kasïpeni tagorhikuarhu

² Sésijtsï úxaka engajtsïni no mirikurhini jarhajka, ka engajtsï sési úrani jaka jurhenguani, eskaksïni na jurhendaka.

³ Ka uéksïnga eskajtsï míteaka, eska Krístusï k'érika acheti jinguni, ka eska achetisï k'érika nanachi jinguni, ka eska Diósï sánderu k'ériska Krístu jinguni.

⁴ Náki uéjki ma acheti enga ójtsïtini kómuarhiaka o jurhentpeni, imeri juramutspiri Krístuni k'uratsetaxati.

⁵ Náki úejki ma uarhiti k'óru enga no ójtsïtini uandamukukorhiaka o jurhentpeni, imeri uámbani k'uratsetaxati jimboka ísïuaka eska iámu antajtsïrani kuinakorheni.

⁶ Eka uarhiti ma no ójtsïjka, Jiájkani antajtsïrechka kuinakorheni; ka eka k'uratsekueka kuinakorheni, ójtsïkorhechka.

⁷ Ka Acheti ásï jame ójtsïni, jimboka Diósïri k'érikuani terukuntaxaka; k'óru achetiri témba, uámbani k'éri úntasïndi.

⁸ Jimboka acheti no uarhiti jimboeska, uarhitisï acheti jimboeti.

⁹ Ka jimboka acheti no uarhitini miáparini kueranhaska, uarhitisï achetini miaparini kuerhanhati.

¹⁰ Jimbochkasï k'uanijti eska uarhiti ójtsïaaka, arhikuekaxati eska uámbani janhanharhisïnga ka eska ánjelichantu janhanharhiasïnga.

¹¹ Ka ísï jimbo, níchka uarhiti ka ni acheti, táchanksï kuerakata jarhasti, májku ambestiksï Acha jimbo.

¹² Nájkirukachi mítekia eska uarhiti, acheti jimbo jurhaska, k'óru uarhitisï kánkorhejti achetini; ka iámendu ambe Diósïni jimboesti.

¹³ Cha eratsekorhentsï je: ¿Sési jaki eska uarhiti ma Diósïni no ójtsïtini kómarhiaka?

¹⁴ Jánhaskasïngachi eska k'uratsekueska, eska tataka ma jauiri iorhataaka.

¹⁵ Ka nanaka ma jimbo, jauiri iorhatani sési ambesti ka kasïpetarakuesti, jimboka nanaka jauiri ójtsïtarakueni kóndenhaska.

¹⁶ Ka eka máteru nema iostarakuekani jaka sánderu uekani uandani, juchari no inde p'indekuesti ka ni Diósïri tángorhekuecharhu.

Tangorhekuarhu arhirperatecha

¹⁷ Ka iásï cha jinguni, engaksïni uékani jaka arhini, Jarhasti ambe ma engani nósesï exeni jaka, tángorhentskuechani engaksïni nósani sési marhuachejka, ka sánderuksïni xerexati.

¹⁸ Aiangunhantaxaka eskajtsï tángorhentasïnga ka jiminkujtsï uénani arhirperani, ka arhukurhintsï ka enaki ísï.

¹⁹ Ka enajki k'uanijki eskachkajtsï arhirperaaka, ka jimasï xarharaati néksïsi kámki tekantskua ka pakaranksï.

²⁰ Jiájkanchka engajtsï márku tángorhejka, ka indeni jasï arhirperatajsï kámani, inde nóteru Acheri t'irekua churekua miántskuestia,

²¹ jimbokajtsï táchantku urheta méntku ísï jamsïnga atsikorherni; ka máruksï k'arhimaparini pakarasïndi ka máteruksï kauinterani.

²² ¿Ambejtsï úsïnki? ¿Andi nójtsï úsïnki chénicho atsïkorheni? Diósïri tángorhekuanjtsï ísku ambe erataxaka, ka no jatsikorherichantsï k'urhatsetani jarhani ¿Nénaksïnisï arhia? ¿Sésijtsï úni jaki? Indeni ambenijtsï nósesi úxaka.

Acha Jesukristueri akua

²³ Jimbokarini Acha, mítetaraska ambe engaksïni ji chánksïni, jurhendantaka: Imani chúrekua enga Acha Jesusï íntsïnharhitpenhapiringa, kurhinda p'íkuspti,

²⁴ Ka diósmaiamukua arhirini Diósïni, arhukuspti ka uandani: “I jindesti jucheti anhanhatakua enga chánksïni jimbo ústanhaaka; jíndeni miantsparani ísï u je.”

²⁵ Ka enga na ápkia, itsïmakuantu p'ikuspti ka uandani: “I itsïmakua jucheti iurhiri jimbo jimbanhe pakatperakuesti; ísïjtsï úaka méntkisï engajtsïni jindeni miántaka.”

²⁶ Ka méntkisï engajtsï íni kurhinda ka ini itsïmakua auaka, Acheri uarhikuantsï uandantasïnga, enga jamberi ima junguaaka ménderu.

Néna úntani Táteri akua

²⁷ Isï jimbo, ne enga Acheri kurhinda ka itsïmakua arhajka, ísku ambe ma exeparini, uarhikua ka iurhiri Acherini k'amanharhitanhantaati.

²⁸ Urhetachka mándani arhini, sési eratsenkorhentsï je sésijtsï jámaxaki, ka jiájkantsï úaka kurhinda ka itsïmakua arhani.

²⁹ Ka ne enga no Achani miántsparini auaka ka itsïmani, ikimekuajkusï andakorheti.

³⁰ Jimbojtsïsï xani uánekua p'amenchani jaka, ka máruksï iurhutseni, ka máteruksï jamberi uarhistia.

³¹ Engachi sési exekorhentapiringa nénachisï jámani jaki, nóchi ikimenhapiringa.

³² Ka engajtsïni Diósï mámaru ambe jimbo k'amanharhitantani jarhajka arhistachentsïni jarhasïndi, ka ísïchi no parhakpeni anapuechani jinguni ikimenhaaka.

³³ Jiájkani jucheti erachicha, engajtsï tángorheaka akua miántskuekani arhani, erokpera je.

³⁴ Eka nema k'arhimani jarhajka, imecho atsïkorhe, ka nójtsï tángorhekuarhu arhinharhikunhani jarhani. Ka máteru ambejtuksïni arhikuekaxaka, ka jiánksïni arhikia engani cha jinguni jaukia.