1 Corintios 1 - Diósïri Karakata P´urheepecha Jimbo

Páblueri uandajperata

¹ Páblu, enga Diósï uandajpaka Jesukristuni uandakua pákuni jámani, ka erachi Sóstenesi enga jíndeni jinguni jaka,

² chánksïni, engajtsï Korintu anapu Diósïri jakajkutika, karachexakaksïni. Cha engajtsï Jesukiristuni jimbo kaxumbentaka, ka imeri pímbinhasï ireta jinguntsï miiunhantani; máteru isï nani anapuecha jinguni engajtuksï Acha Jesukristuni kómarhini jaka, enga chári ka juchari Acheka.

³ Juchari Diósï Táte ka Acha Jesukristuksïni kónde ka sési jakuaksïni íntskuni.

Maiamukueri ambe

⁴ Méntkisï diósmaiamu arhixaka jucheti Diósïni chánksïni jimbo, engajtsï Krístu Jesusini jimbo Diósïri kóntperakuani p'ika.

⁵ Jimbokachkajtsï iámu ambe imani jimbo intsïmbenhaska, uandakua ka mímixekua ambe,

⁶ ka jimbokajtsï cha Krístueri uadakuani sési kurhangutini jaka.

⁷ Jimajkani nóterujtsï kueratanchaaka Diósïri íntsïmperata, cha engajtsï juchari Acha Jesukristuni erontani jaka,

⁸ ka k'amarhuni jamberi imaksïnisï uinhaperantaati ka nónemaksïni uáti arhinharhikuni ima jurhia enga Acha Jesukristu junguaaka.

⁹ Jimboka mintsinharhikueska Diósï engaksïni uandajpantaka, Uájpa jinguni jarhani, Jesukristu jinguni enga juchari Acheka.

Tángorhekuarhu anapu arhirperatecha

¹⁰ Erachicha, Tata Jesukristu jimboksïni kómarhixaka, eskajtsï májku uandakua kámaaka ka eskajtsï no jámaaka arhirperani. Sánderu sáni eskajtsï márku jámaaka, májku eratsekua jinguni ka májku p'ikuarhenhekua jinguni.

¹¹ Jimbokani chári ambe aiangunhaxaka, tata Kloeo anapuechajtsïni arhisti na engajtsï arhirperani jaka.

¹² Arhikuekaxaka eskajtsï máru uandaxaka: “Ji Páblu jinguniska;” ka máteruecha eskaksï “Apolusï jinguniska;” ka máteruecha eskaksï “Séfasi jinguniska;” ka eskaksï máru “Krístu jinguniska.”

¹³ ¿Andi Krístu arhukurhitaxaki? ¿Andi Páblusï chánksïni jimbo cháparhatanga? ¿Ójtsï Pábluni jimbo itsï atajtsïkunhaski?

¹⁴ Diósïmaiamu arhisïnga Diósïni engaksïni no ji itsï atajtsïkuka, Kríspusïni ka Gáiunkusïni itsï atajtsïkuka,

¹⁵ ka ísï jimbo nónema úati uandani eska jucheti jakangurhikua jimbo itsï atajtsïkunhaska.

¹⁶ ¡A, jo! Estefanio anapuechantuni itsï atajtsïkuaska, ka nónemanderuni míasïnga itsï atajtsïkuni;

¹⁷ jimbokarini Krístu no itsï atajtsïkpeni axaska, ambakiti aiangperakuarinisï uandantani axati; jimbokani no uékasïnga Krístueri uarhikuani, enga uinhapekueka, tájpanharhikuni mímixeti p'ikuarherani.

Diósïri mímixekua ka k'uiripueri mímixekua

¹⁸ Krístueri uarhikua aiangperatani tsînchekatechaksï teresmarhusïndi; ka jucha jimbo engachi p'ímutantskateka Diósïri uinhapekuesti.

¹⁹ Jimboka karakata arhisïnga: “Mímixetichani xerhejtsïkuauaka, ka jurhendichani no jánhasterauaka.”

²⁰ ¿Mímixeti ambesï míte? ¿Jurhentpiri ambesï jurhena? ¿Arhistatsïpiri ambesï arhijpejki? ¿Andi no Diósï parhakpeni anapu mímixekuani nómbemeni exesïnki?

²¹ Jimbokachka parhakpeniri mímixekua no exeska na enga Diósï xáni ambe sési úka imeri mímixekua jimbo; Diósïjtu imechani p'ímutantasti engaksï aiangperakuani jakajkuka, náuejki ísku ambe méni jáxeka.

²² Judiouechaksï míndechani exekuekaasïndi, ka griéguechaksï mímixekuani tsitini.

²³ Ka jini jucha Krístueri uarhikua ambe aiangpeni jarhani, enga judiouechani ikiataajka ka no judiouechani teresmarhutaraani;

²⁴ k'óru Diósï erakukatechani uinhaperantaasïndi Krístuni jimbo ka imeri mímixekua íntsaani, engaksï judiouejka o na uéjki no judioueni.

²⁵ Jimboka Diósïri ambe enga teresmarhukueni xarharajka, sánderu k'éri ambesti eska iámendu k'uiripueri jurhengua, ka Diósïri uinhapekua sánderu sápichu ma, iámenduechani andaasïndi.

Irekua Korintu anapuecheri

²⁶ ¡Erachicha, exekorhetkiria je cha engajtsï uandajpanhaka! Ka namuntkujsïsï mímixeti ka uinhapitini mítekateka eska k'uiripu na uandajka, ka namuntkujtsïsï ka namuntkujtsïsï k'éri achamasï uájpeka.

²⁷ Diósïchka k'óru mímixetichani k'uratsetaasti, enga no jurhendichani erakuaka; ka sési xékorherichantu k'uratsetaasti, enga kétsekua uératichani erakuaka.

²⁸ Diósï ikimchakatechani erakuasti engaksï ini parhakpenirhu ísku ambeka, ka k'amajkusti imani ambe enga sési xénhani jápka:

²⁹ Ísï jamani, Diósïni japarini nónema sési xekorheati.

³⁰ Imaksïnisï Krístu Jesusi jingunitarati, imesti juchari mímixekua engajtsïni Diósï íntskuka, juchari kaxumbekua ka pimbinhaxekua ka p'ímutantskua,

³¹ jimboka karakata ísïsï arhijka: “Ne emanga k'éri xékorhejka, Achani jimbo k'éri xékorhe.”