Lûqa 9 - Zazaki Southern

Îsa Wezîfe Dano Diwês Hewarîyanê Xwu

¹ Îsayî veng da diwês hewarîyanê xwu, hêz û selahîyetê weşkerdişê nêweşan û însanan ra vetişê cinan da înan.

² Semedê îlankerdişê Hukimranîya Homayî û nêweşan rê dayişê şîfa ê şirawitî.

³ Îsayî înan ra va: “Raywanîye de çuwa, tewreyê erzaqî, werd yan zî pere, heta pirêno zêde bîle megêrê xwu het.

⁴ Eke şima şiyî cayêk, heta ke şima uca ra vejîyê, eynî keye de bimanê.

⁵ Cayo ke şima şiyê de eger şar weş nêewnîyo şima ra, uca ra vejîyê; gama ke şima uca ra vejîyayî, tozê linganê xwu biweşanê.”

⁶ Hewarî kewtî rayir. Dewe bi dewe geyrayî û her ca de mizgîna xelasî waez kerde, şîfa da nêweşan.

⁷ Hîrodesê ke mintîqeyê Celîle îdare kerdêne gama ke enê heme biyenî şinawitî, heyret mend. Çimkî tayê merdiman vatêne Yehya merg ra biyo gane.

⁸ Tayêne zî vatêne Îlyas asayo, sewbîna kesan zî vatêne pêxemberanê verînan ra yew biyo gane.

⁹ Hîrodesî zî vatêne “Mi sereyê Yehyayî da birnayiş; eyla eno merdimo ke ez derheqê ci de xeberanê winasîyan şinawena kam o?” Û dest pê kerd, fikirîya ke senî xwu biresno Îsayî.

Îsa Panc Hezarî Kesî Keno Mird

¹⁰ Gama ke hewarî ageyrayî, raywanîye de çi kerdo, Îsayî rê qal kerd. Dima Îsayî ê berdî yew şaristanê bi nameyê Beytsayda. Waştêne tiya înan dir tenya bimano.

¹¹ Feqet şar eno pê hesîya û kewt Ey dima. Îsayî bi zerrweşî şar qebûl kerd û behsê Hukimranîya Homayî kerde, ê ke muhtacê şîfa bî, kerdî weş.

¹² Vera şanî diwês hewarî ameyî Îsayî het û wina va: “Însanan ra vaje wa vila bibê. Tiya yew cayo tenha yo. Wa şêrê dewanê derûdorî û çewlîgan de xwu rê werd û cayê rakewtişî bivînê.”

¹³ Labelê Îsayî şagirdanê xwu ra va “Şima werd bidê înan.” Şagirdan va “Ma dir tenya panc nanî û di maseyî estê. Qey ti ma ra pawenê ke ma şêrê hende însanan rê werd temîn bikerê?”

¹⁴ Tenya hûmara camêrdan teqrîben qasê panc hezarî bî. Îsayî şagirdanê xwu ra va “Qelebalixî bi komanê pancas-pancas bidê roniştiş.”

¹⁵ Şagirdan zî o qeyde kerd û her kes da roniştiş.

¹⁶ Îsayî panc nanî û di maseyî girewtî û ewnîya rîyê asmînî ra û Homayî rê şukir kerd. Dima enê lete kerdî û seba ke şarî rê vila bikerê, dayî şagirdanê xwu.

¹⁷ Heta ke bibê mird her kesî werd, gelek werd zî zêde mend. Werdo ke mendo ra diwês sepetî debiyî.

Petrûs Şehadet Keno ke Îsa Mesîh o

¹⁸ Rojêk, wexto ke Îsayî tenya dua kerdêne şagirdê ci şiyî nizdîyê Ey. Îsayî înan ra persa va: “Şar vano ez kam a?”

¹⁹ Înan wina cewab da: “Tayê vanê Yehyayo Waftîzkar o, tayê zî fikirîyenê ke Îlyas o. Tayê zî vanê pêxemberanê verînan ra yew biyo gane û ameyo.”

²⁰ Enê ser o Îsayî înan ra persa va: “Eyla şima gore ez kam a?” Petrûsî ci ra va “Ti Mesîhê Homayî yê.”

²¹ Îsayî ê îqaz kerdî ke enê çî kesî ra nêvajê.

Îsa Dano Zanayiş ke Mireno û Beno Gane

²² Û Îsayî va “Gereka Benîademo Semawî zaf dej bianco, hetê sermiyanan, serkahînan û alimanê Tewratî ra bêro redkerdiş, bêro kiştiş û roja hîrêyine bibo gane.”

²³ Dima hemîne ra va “O ke wazeno mi dima bêro wa xwu înkar bikero. Her roje wa çarmixê xwu bido polê xwu ser û mi teqîb bikero.

²⁴ O ke biwazo ganê xwu bixelisno do ey vindî bikero, o ke ganê xwu rayirê mi de feda bikero zî do ey bixelisno.

²⁵ Însan wayirê heme dinya bo la ganê xwu û ruhê xwu vindî bikero çi keweno dest?

²⁶ Kam mi ra û vateyanê mi ra bişermayo, wexto ke Benîademo Semawî zî miyanê îhtîşamê xwu û Babîyê xwu û melekanê mibarekan de bêro, do ê kesî ra bişermayo.

²⁷ Ez şima rê enê vajî, merdimê ke tiya yê, nînan ra tayê kesî mergê xwu ra ver do Hukimranîya Homayî bivînê.”

Aseyişê Îsayî Bedilyeno

²⁸ Îsayî, vatişê enê çiyan ra teqrîben heşt rojî badê, Petrûs, Yûhena û Yaqûb girewtî xwu het û seba ke dua bikero vejîya ko.

²⁹ Îsayî gama ke dua kerdêne aseyişê rîyê ci bedilîya. Kincê Ey sey beriqîyayişê virsoyî biyî sipî.

³⁰ Nişka ra di merdimî verê ci de peyda biyî, înan dest pê kerd Îsayî dir xeberî da. Enê Mûsa û Îlyas bî.

³¹ Aseyişê înan muhteşem bi. Înan qal kerdêne ke Îsa do nizdîyan de Yeruşalîm de bimiro û bibo gane, badê pey zî do bigêrîyo asmîn.

³² Petrûs û êyê bînî şibî hewn a. Labelê wexto ke biyî aya, înan îhtîşamê Îsayî û her di merdimê ke verê ci de vindertbî dî.

³³ Gama ke Mûsa û Îlyas êdî verê Îsayî ra şiyêne, Petrûsî Îsayî ra va “Seyda, baş o ke ma hê tiya. Ma hîrê çardaxan virazê; yew to rê, yew Mûsayî rê, yew zî Îlyasî rê.” Hende şaş bibi ke ferq de nêbi vano se.

³⁴ Gama ke Petrûsî enê qalî vatêne yew hewr ame û sîya xwu da înan ser. Seba ke hewrî dorê înan girewt, Petrûs, Yûhena û Yaqûbî saw girewt.

³⁵ Miyanê hewrî ra yew veng ame, va: “Eno Lajê min o, O weçînite yo. Ey rê îtaet bikerê!”

³⁶ Gama ke veng birîya tenya Îsa uca bi. Şagirdanê ci derheqê ena biyene de tek yew qale nêkerde. Ê rojan de çiyo ke dîyo, înan kesî rê qal nêkerd.

Îsa Tutêk Cinî ra Xelisneno

³⁷ Roja bîne Îsa û hîrê şagirdê xwu ko ra ameyî war. Yew qelebalixo zêde ame Îsayî vera.

³⁸ Miyanê qelebalixî ra yew mêrik wina qîra, Ey ra va: “Seyda ez bextê to de ya, lajê mi bike weş, o ewladê mino yewek o!

³⁹ Cin dekeweno zereyê ci, nişka ra qîreno, perpetîyeno, fek ra kefûkepûr vejyeno. Cin ganê ey pêro keno birînî; bi çi kul û halî ci ra aqitîyeno.

⁴⁰ Mi şagirdanê to rê lavey kerd ke cinî vejê, la nêeşkayî bikerê.”

⁴¹ Enê ser o Îsayî wina va: “Ey gidî neslo bêîman û bêray! Ez do hema çiqas şima dir bimanî, ez do hema çiqas tehemulê şima bikerî?” Û tadiya mêrikî ser va: “Lajê xwu biyare tiya!”

⁴² Gama ke tut ameyne cinî o da erd ro, bi şîdet o hejna. Labelê Îsayî tazîrê cinî da û şîfa da tutî, dima o teslîmê babîyê ci kerd.

⁴³ Çi kesê ke eno dî, vera ezametê Homayî de şaş mendî. Gama ke her kes kerdenanê Îsayî de şaş bibi, Ey şagirdanê xwu ra wina va:

Îsa Reyna Dano Zanayiş ke Mireno û Beno Gane

⁴⁴ “Nika çiyo ke ez do şima rê vajî baş goşdarî bikerê. Benîademo Semawî do teslîmê destê însanan bibo.”

⁴⁵ Înan eno vate fam nêkerd. Seba ke vateyî fam nêkerê manaya ci înan ra ameybî nimitiş û tersayne ke derheqê enê vateyî de Îsayî ra çiyêk bipersê.

Tewr Berz Kam o?

⁴⁶ Hewarîyanê Îsayî dest bi minaqeşe kerd ke înan miyan de tewr berz kam o.

⁴⁷ Îsayê ke zanayne hişê înan ra çi vîyareno, yew tuto qijek girewt xwu het

⁴⁸ û hewarîyanê xwu ra wina va: “Kamo ke enê tutî nameyê mi ser o qebûl bikero seke ez qebûl kerda. Eyê ke ez qebûl kerda zî yeno ena mana, seke Eyê ke ez şirawita qebûl kerdo. Çimkî şima miyan de tewr nizim kam bo, o kes tewr berz o.”

⁴⁹ Yûhenayî enê ser o wina va: “Seyda, ma dî yewî bi nameyê to cinî vetêne. Ma lebitîyayî ke ey vindarnê, çimkî o şagirdanê to ra yew nêbi.”

⁵⁰ Îsayî va “Ey mevindarnê, çimkî o ke vera şima de nîyo, hetê şima yo.”

Samîrîyeyijî Îsayî Nêwazenê

⁵¹ Zemano ke do Îsa bigêrîyayne asmîn nizdî bi, Îsayî bi gamanê pêtan verê xwu da Yeruşalîm.

⁵² Xwu ra ver qasidî şirawitî. Enê, seba ke Îsayî rê amadekarî bikerê, şiyî yew dewa Samîrîye.

⁵³ Labelê şarî baş nêewnîya Îsayî ra, çimkî Ey verê xwu dabi Yeruşalîm.

⁵⁴ Şagirdan ra Yaqûb û Yûhenayî gama ke eno dî, Îsayî ra persayî va: “Wayirê ma, ti wazenê ma bi yew emir asmîn ra adir bivarnê û enê însanan helak bikerê?”

⁵⁵ Labelê Îsa ageyra û tazîrê înan da.

⁵⁶ Badê cû şiyî yewna dewe.

Îsayî Dima Şiyayiş

⁵⁷ Gama ke rayir ra şiyêne yew mêrikî Îsayî ra va “Ti ser a şêrê, ez do to teqîb bikerî.”

⁵⁸ Îsayî ey ra va “Qulê lûyan û halînê teyran esto. Feqet cayê Benîademê Semawî çinê yo ke sereyê xwu bido ser.”

⁵⁹ Îsayî yewnayî ra va “Mi dima bêre!” Labelê mêrikî va “Wayirê mi destûr bide, heta ke babîyê mi bimiro ez bimanî.”

⁶⁰ Îsayî ey ra va “Caverde, wa merdeyî bi xwu merdeyanê xwu defin bikerê. Ti şo û Hukimranîya Homayî îlan bike.”

⁶¹ Yewna mêrikî Îsayî ra va “Wayirê ma, ez do to teqîb bikerî, feqet verî destûr bide ke ez keyeyê xwu ra xatir biwazî.”

⁶² Îsayî zî ey ra va “O ke dest bi ramitişê hêgayî keno, gereka biewnîyo xwu ra ver; o ke ewnîyeno xwu ra dima, layiqê Hukimranîya Homayî nîyo.”