Lûqa 4 - Zazaki Southern

Îblîs Wazeno Îsayî Rayir ra Vejo

¹ Îsa bi Ruho Miqedes dekerde Royê Urdunî ra ageyra, şi yaban. Ruhê Miqedesî uca rayir nawit Ey.

² Îblîs çewres rojî xebitîya ke yaban de Ey bixapêno. Enê wextî de Îsayî seba ke tu çiyêk nêwerd, bi veyşan.

³ Îblîsî Îsayî ra va: “Eke ti lajê Homayî yê, emir bike, wa ena kerra bibo nan.”

⁴ Îsayî cewab da Îblîsî va: “Tewrat de wina nuşte yo: ‘Cûya însanî tenya besteyê nanî nîya.’”

⁵ Enê ser o, Îblîsî Îsa berd cayêko berz. Yew lehza de heme welatê dinya nîşanê Îsayî dayî.

⁶ Ey ra wina va: “Ez îdareyê enê heme welatan bidî to. Do bi heme îhtîşamê xwu bibê yê to. Çimkî enê heme diyayê mi. Ez zî kamî biwazî, eşkena bidî ey.

⁷ Eke ti mi rê secde bikerê, ti do bibê wayirê enê hemîne.”

⁸ Îsayî eno cewab da: “Tewrat de wina nuşte yo: ‘Tenya Homayê xwu Rebî rê secde bike. Tenya bibe qûlê Ey.’”

⁹ Îblîsî Îsa berd Yeruşalîm. O vet serê banê tewr berz yê Mabedê Homayî. Û va: “Eke ti lajê Homayî yê, xwu bierze war.

¹⁰ Çimkî Zebûr de wina nuşte yo: ‘Homa emir dano melekanê xwu Ê do to muhafeze bikerê.’

¹¹ ‘To bidê destanê xwu ser Linga to nêgino kerra ro zî.’”

¹² Enê ser o Îsayî wina cewab da: “Tewrat de ameyo nuştiş ke ‘Nêbo şima Homayê xwu Rebî biceribnê!’”

¹³ Badê ke Îblîsî seba ke Îsayî bixapêno heme dek û dolabî ceribnayî, seba midetêk verê Ey ra aqitîya.

Îsa Celîle de Dest bi Dayişê Waezan Keno

¹⁴ Îsa bi qudretê Ruhê Miqedesî ageyra Celîle. Namdarîya Ey temamê mintiqeyî ra vila bibî.

¹⁵ Xavrayan de dest bi waezan kerd; her kesî bi pesindayiş behsê Ey kerdêne.

¹⁶ Îsa wexto ke ageyra şarsitanê xwu Nasira ke tede bibi pîl, seke tim kerdêne, Roja Sebtî şi xavra. Seba wendişê kelamê Homayî wurişt payanî.

¹⁷ Kitabê pêxember Yeşeya diya ci. Îsayî kitab akerd. Qismo ke tede wina nuşte bi dî:

¹⁸ “Ruhê Homayî mi ser o yo, Ey ez wezîfedar kerda ke mizgîna xelasî bidî mezlûman; Ez şirawita ke bidî zanayiş, Do êsîrî azad bibê, korrî bivînê, Mezlûmî biresê xelasîye,

¹⁹ Û Ez şirawita ke, ameyişê serra ke Reb şarê xwu rê lutif keno, îlan bikerî.”

²⁰ Îsayî kitab girewt da wezîfedarê xavra û ronişt. Her keso ke xavra de bi, bi dîqet ewnîyayne Ey ra.

²¹ Îsayî înan ra va “Enê ayetê ke şima goşdarî kerdî, ewro ameyî ca.”

²² Çi kesê ke uca bî derheqê Îsayî de vateyê pesinkarî dayî. Qalê lutifkarî ke fekê Ey ra vejîyayne rê heyran mendî. Vatêne “Eno lajê Wusifî nîyo?”

²³ Îsayî înan ra va “Bêguman şima do enê tabîrê kanî biyarê mi vîrî: ‘Ey hekîm, verî şîfa bide xwu.’ Çiyê ke to Kefernahûm de kerdê ma şinawitî. Dê eynî çiyan şaristanê ke ti tede ameyê dinya û biyê pîl de zî bike.”

²⁴ Badê pey wina va: “Ez şima rê enê vajî, tu pêxember welatê xwu de qebûl nêbeno.

²⁵ Zemanê pêxember Îlyasî de hîrê serrî û şeş aşmî varitî qet nêvara; temamê welatî de xelayêka pête wurişte. O wext Îsraîl de gelek cînîyê vîyayî estbî.

²⁶ Îlyas semedê tu yewa nînan nêşirawîyabi; tenya semedê yew cînîya vîya şirawiyabi ke ena cînî şaristanê Sarefat yê mintîqeyê Sayda de bî.

²⁷ Zemanê pêxember Elîşa de Îsraîl de gelek însanî estbî ke bi nêweşîya cuzamî kewtbî; la tu kesî şîfa nêdî, tenya Nemanê Sûrîyeyijî şîfa dî.”

²⁸ Kesê ke xavra de yê, gama ke enê qalî şinawitî hêrsan ra har biyî.

²⁹ Wuriştî xwu ser û Îsa şaristan ra kerd teber. Seba ke terîş ro bierzê war, înan O berd pêşê tepeyê ke şaristan ser de awan bibi.

³⁰ La Îsa miyanê qelebalixî ra xelisîya û uca ra kewt dûrî.

Îsa Yew Mêrikê Cinêrî Xelisneno

³¹ Dima, Îsa şi mintîqeyê Celîle, şaristanê Kefernahûmî. Roja Sebtî cematê xavra rê waezî dayne.

³² Şar waezanê Îsayî de ecêb mend. Çimkî sey kesêkê wayirê selahîyetê îlahî qisey kerdêne.

³³ Xavra de yew mêriko cinêr estbi ke ruho xirab tede bi. Mêrik bi vengêko berz wina qîra:

³⁴ “Ey Îsayo Nasirayij! Ti ma ra çi wazenê? Gelo ti ameyê tiya ke ma helak bikerê? Ez zana ti kam ê. Ti Mesîho mibarek yê Homayî yê!”

³⁵ Îsayî cin bêerz kerd va: “Wus be! Derhal zereyê mêrikî ra vejîye teber!” Cin verê her kesî de mêrik da erd ro, qet zerarêk nêda ci, zereyê mêrikî ra vejîya teber.

³⁶ Însanî ecêb mendî. Her kesî yewbînî ra va “Eno senî waez bi? Bi selahîyeto pîl û bi qudret emir dano cinan, ê zî îtaet kenê!”

³⁷ Bi eno qeyde namdarîya Îsayî her terefê ê mintîqeyî ra vila bî.

Îsa Şîfa Dano Gelek Nêweşan

³⁸ Îsa xavra ra vejîya şi keyeyê Şîmûnî. Visturîya Şîmûnî nêweşe bî. Tewî girewtêne. Kesê ke uca bî Îsayî rê lavey kerd ke cîneke rê havilêk bikero.

³⁹ Îsa verê sereyê cîneke de vindert, tazîrê tewan da, tewê cîneke vindertî. Cîneke tavilî wurişte xwu ser û dest bi xizmetê înan kerd.

⁴⁰ Wexto ke roj şiyêne awan însanan merdimê xwu yê ke tewir bi tewir nêweşîyê înan estê ardî Îsayî het. Îsayî destê xwu na her yewî ser û şîfa da.

⁴¹ Cinan zî bi qîrayiş va “Ti Lajê Homayî yê!” û zereyê gelek nêweşan ra vejîyayî teber. Labelê Îsayî tazîrê cinan da û destûrê qiseykerdişî nêda înan, çimkî înan zanayne ke Îsa Mesîh o.

⁴² Roja bîne Îsa şi cayêko xewle. Qelebalix Ey geyrayne. Gama ke înan O dî, lebitîyayî ke O înan het de bimano.

⁴³ Îsayî înan ra va “Gereka ez xebera derheqê Hukimranîya Homayî de biresnî şaristananê bînan; çimkî ez semedê enê amancî ameya şirawitiş.”

⁴⁴ Bi eno qeyde, Îsayî xavrayanê Yahûdîye de vatişê kelamê Homayî dewam kerd.