Lûqa 3 - Zazaki Southern

Mesajê Yehyayî

¹ Serra pancêsine yê dewrê împaratorîya Sezar Tîberyosî bî. Yahûdîye de Pontîyos Pîlatosî walîtî kerdêne. Bi destûrê împaratorî, Hîrodesî Celîle, birayê Hîrodesî Filîposî mintîqeyê Îtûrya û Traxûnîda, Lîsanyasî zî Avelînya îdare kerdêne.

² Henan û Qayafa serkahîn bî. A esna de kelamê Homayî Yehyayê lajê Zekerîyayî ke yaban de cûyayne rê nazil bi.

³ Yehya heme mintîqeyanê dorê Royê Urdunî ra geyra. Veng da şarî ke seba efûbiyayişê guneyanê xwu tewbe bikerê û bêrê waftîz bibê.

⁴ Axir, kitabê pêxember Yeşeya de wina nuşte yo: “Vengo ke yaban ra qîreno, vano ‘Seba Rebî rayir amade bikerê Rayirê ke O vîyareno raşt bikerê.’

⁵ Her gelî do bêro dekerdiş, Koyî û tepeyî nizim bibê. Rayirê çewtî raşt bibê Çal û kortî zî duz bibê.

⁶ Axir do her kes xelisnayişê Homayî bivîno!”

⁷ Seba ke însanî waftîz bibê, qefle bi qefle ameyî verê Yehyayî. Yehyayî înan ra wina va: “Ey cisnê maran! Heta ke şima zerrî ra tewbe nêkerê, qey şima fikirîyenê ke xezebê Homayî ra bifelitîyê?

⁸ Tewbe bikerê û bedilîyayişê xwu bi emelê xwu nîşan bidê. Nêbo ke şima vajê ‘Ma neslê Îbrahîmî ra yê, hewce nêkeno ma tewbe bikerê!’ Ez şima rê enê vajî: Homa eşkeno Îbrahîmî rê enê kerrayan ra zî tutan bixeliqno.

⁹ Şima manenê daranê ke meywe nêdanê. Tuwerzîn resayo verê qirmê daran bîle. Çi dara ke meyweyo baş nêdana, do bêro birnayiş û bierzîyo adirî miyan.”

¹⁰ Şarî, Yehyayî ra persa va: “Eke wina yo, ma se bikerê?”

¹¹ Yehyayî cewab da va: “O ke di pirênê ci estê, wa yewê ci bido kesê muhtacî. Û nanê xwu zî bi eno qayde feqîran dir bare bikero.”

¹² Eno mabeyn de, memûrê bacî zî seba ke waftîz bibê ameyî verê Yahyayî. Înan zî persa va: “Ey seyda, gelo ma se bikerê?”

¹³ Yehyayî înan ra va “Baco ke qerarê ci diyayo ra vêşêr megêrê.”

¹⁴ Leşkeran ey ra persa va: “Gelo ma se bikerê?” Yehyayî înan ra wina va: “Bi darê zorî yan zî bi tomet û buhtan kesî ra pere megêrê. Qîmê xwu bi heqê xwu biyarê.”

¹⁵ Şar bi hêvî paweyê ameyişê Mesîhî bi. Derheqê Yehyayî de zerrîya her kesî de persa “gelo Mesîho ke wehd biyo eno yo” estbî.

¹⁶ Yehyayî wina va: “Ez şima bi awe waftîz kena, feqet O ke yeno mi ra berzêr o. Ez layiq nîya qeytanê çaroxanê Ey bîle akerî. O do şima bi Ruho Miqedes û bi adir waftîz bikero.

¹⁷ Melêva ci ha dest de; do ciwîn de xele û simerî cêmiyan ra vejo, xeleyî dekero embarê xwu. Simerî zî, adiro ke qet nêşino hewna de do biveşno.”

¹⁸ Yehyayî hema zaf şîretî şarî rê kerdî û mizgîna ameyişê Mesîhî da.

¹⁹ Îdarekarê ê mintîqeyî Hîrodes bi. Cînîya birayê xwu Hîrodîya dir zewicîyabi û sewbîna xirabî zî kerdêne. Coka Yehyayî o bi şîdet şermezar kerdbi.

²⁰ Hîrodesî bi zindankerdişê Yehyayî, yew xirabîya newîye xirabîyê ke kerdêne ser o zêdna.

Yehya Îsayî Waftîz Keno

²¹ Wexto ke şar waftîz biyêne, Îsa zî ame waftîz bi û wexto ke dest bi duayan kerd asmîn abi.

²² Ruho Miqedes sûretê yew kevoke de Ey ser o nazil bi û asmîn ra yew veng ame şinawitiş: “Ti Lajê min o ezîz ê. Ez to ra razî ya.”

Şecereyê Wusifî

²³ Wexto ke Îsayî dest bi xizmetê xwu kerd teqrîben hîrisserre bi. Sey lajê Wusifî ameyne zanayiş. Wusif zî lajê Elî bi,

²⁴ Elî lajê Mettatî, Mettat lajê Lewî, Lewî lajê Melxeyî, Melxe lajê Yennayî, Yennay lajê Wusifî,

²⁵ Wusif lajê Metîtyayî, Metîtya lajê Amosî, Amos lajê Nahûmî, Nahûm lajê Heslî, Heslî lajê Nagayî,

²⁶ Nagay lajê Mehatî, Mehat lajê Metîtyayî, Metîtya lajê Şemeyînî, Şemeyîn lajê Yûsexî, Yûsex lajê Yodayî,

²⁷ Yoda lajê Yûhenanî, Yûhenan lajê Reşayî, Reşa lajê Zerûbabîlî, Zerûbabîl lajê Şaltîyelî, Şaltîyel lajê Nerî,

²⁸ Nerî lajê Melxeyî, Melxe lajê Adî, Adî lajê Qosamî, Qosam lajê Elmedamî, Elmedam lajê Erî,

²⁹ Er lajê Yeşûyî, Yeşû lajê Elyazerî, Elyazer lajê Yorîmî, Yorîm lajê Mettatî, Mettat lajê Lewî,

³⁰ Lewî lajê Şîmûnî, Şîmûn lajê Yahûdayî, Yahûda lajê Wusifî, Wusif lajê Yonamî, Yonam lajê Elyaqîmî,

³¹ Elyaqîm lajê Melyayî, Melya lajê Menayî, Mena lajê Mettatayî, Mettata lajê Natanî, Natan lajê Dawudî,

³² Dawud lajê Yeşeyayî, Yeşeya lajê Uweydî, Uweyd lajê Bowazî, Bowaz lajê Selmonî, Selmon lajê Nehşonî,

³³ Nehşon lajê Amînadavî, Amînadav lajê Aramî, Aram lajê Hesrûnî, Hesrûn lajê Perezî, Perez lajê Yahûdayî,

³⁴ Yahûda lajê Yaqûbî, Yaqûb lajê Îshaqî, Îshaq lajê Îbrahîmî, Îbrahîm lajê Terahî, Terah lajê Nehorî,

³⁵ Nehor lajê Serûxî, Serûx lajê Rewoyî, Rewo lajê Pelegî, Peleg lajê Eberî, Eber lajê Şalahî,

³⁶ Şalah lajê Kenanî, Kenan lajê Arpexşadî, Arpexşad lajê Samî, Sam lajê Nûhî, Nûh lajê Lamexî,

³⁷ Lamex lajê Metûşelayî, Metûşela lajê Henoxî, Henox lajê Yaredî, Yared lajê Mahalalelî, Mahalalel lajê Kenanî,

³⁸ Kenan lajê Enoşî, Enoş lajê Şîsî, Şîs lajê Ademî bi û Adem zî, Homayî o xeliqnabi.