Lûqa 23 - Zazaki Southern

Îsa hizûrê Walî Pîlatûsî de

¹ Dima, heme endamê meclisî wuriştî û Îsa berd verê Pîlatûsî.

² Înan Îsa wina sûcdar kerd: “Ma eno mêrik tewqîf kerd, çimkî ma dî ke şarê ma rayir ra vejeno. Vano bac medê Sezarî û xwu ra zî vano Mesîh, yanî qral.”

³ Pîlatûsî Îsayî ra persa va: “Ti Qralê Cihûdan ê?” Îsayî cewab da va: “Ti wina vanê.”

⁴ Pîlatûsî serkahînan û qelebalixî ra va “Ez enê mêrikî de tu sûc nêvînena.”

⁵ Feqet înan israr kerd, va: “Her cayê Yahûdîye de bi waezan şarî fît keno. Celîle ra dest pê kerd ame heta tiya.”

⁶ Gama ke Pîlatûsî eno şinawit, persa va: “Eno mêrik Celîle ra yo?”

⁷ Pîlatûs ke pê hesîya Îsa mintîqeyê binê îdareyê Hîrodesî ra ameyo, O şirawit Hîrodesî het. Hîrodes a esna de Yeruşalîm de bi.

⁸ Hîrodesî gama ke Îsa dî, zaf keyfê ci ame. Rewna ra waştêne Ey bivîno. Çimkî derheqê ci de xeberî şinawitbî û hêvî kerdêne ke Îsa bîzat hizûrê ci de yew mucîze nîşan bido.

⁹ Hîrodesî ci ra zaf persî persayî la Ey qet cewab nêda.

¹⁰ Serkahînî û alimê Tewratî uca vindertî û tometê giranî eştî Îsayî ser.

¹¹ Hîrodesî zî leşkeranê xwu dir piya heqaret pê kerd û bi Ey tinaz kerd. Înan yew lîbaso zarîf da pira û apey şirawit Pîlatûsî het.

¹² Heta a game mabeynê Hîrodesî û Pîlatûsî de dişmentî estbî. La a roje biyî dost.

Pîlatûs cezaya mergî dano Îsayî

¹³ Pîlatûsî serkahînî, sermiyanî û şar ard pêser.

¹⁴ Înan ra wina va: “Şima eno mêrik, seba ke şarî rayir ra vejeno ard mi het. Mi verê şima de O mehkeme kerd; sûcê ke şima îsnadê Ey kenê, tu yewê ci zî nêkerdo.

¹⁵ Hîrodesî zî Ey de yew sûc nêdîyo ke reyna apey ma rê şirawito. Şima vînenê, tu çiyo ke cezaya mergî îcab bikero nêkerdo.

^16-17 Eno semed ra ez do Ey bidî qamçîkerdiş û serbest veradî.”

¹⁸ Labelê înan pêrune yew fek ra va “Enê mêrikî bikişe! Ma rê Barabasî serbest verade!”

¹⁹ Barabas seba ke şaristan de daxilê yew îsyanî bibi û merdim kiştbi, amebi hepiskerdiş.

²⁰ Pîlatûsî waşt Îsayî serbest verado, eno semed ra reyna şarî dir qisey kerd.

²¹ Feqet înan qîreqîr kerd, va: “Ey bide çarmix ro! Bide çarmix ro!”

²² Pîlatûsî reya hîrêyine va: “Ey çi sûc kerdo ke? Tu sûco ke cezaya mergî îcab bikero, mi Ey de nêdî. Eno semed ra ez do Ey bidî qamçîkerdiş û serbest veradî.”

^23-24 Labelê serkahînan, sermiyanan û şarî, seba ke Îsa bidiyo çarmix ro, bi vengo berz qîrayî û israr kerd; peynî de qîreqîrê înan bi ser kewt û Pîlatûsî qerar da ke waştişê înan biyaro ca.

²⁵ Keso ke înan waştêne, yanî Barabaso ke kiştiş û îsyan ra amebi hepiskerdiş, serbest verada. Îsa zî, seke înan waştêne, mergî rê mehkûm kerd.

Îsa diyeno çarmix ro

²⁶ Gama ke leşkeran Îsa berdêne, yew mêrik yaban ra ameyne, nameyê ci Şîmûno Qîrwanij bi. Leşkeran eno mêrik vindarna û çarmix wena piştîya ci û mecbûr kerd ke Îsayî dima şêro.

²⁷ Yew qefleyo qelebalix yê şarî zî Îsayî dima şiyêne. Înan miyan de cînîyê ke semedê Ey dayne xwu ro û bermayne zî estbî.

²⁸ Îsa ageyra enê cînîyan ser û wina va: “Ey cînîyê Yeruşalîmijî, semedê mi mebermê. Semedê xwu û tutanê xwu bibermê.

²⁹ Çimkî do roje bêro, însanî do wina vajê: ‘Werre bi cînîyanê qisiran, rehîmê ke qet tut nêardo û çijeyê ke qet nêlewnayê.’

³⁰ Dima, do koyan ra vajê ‘Birijîyê ma ser!’ Û tepeyan ra vajê ‘Serê ma bigêrê!’

³¹ Eke wina bikerê bi dara terne, kam zano do se bikerê bi dara wuşke?”

³² Sewbîna zî, seba ke îdam bikerê, di mehkûmî Îsayî dir piya berdêne.

³³ Gama ke resayî cayo ke ci ra vatêne “Qoqa Sereyî”, Îsa û her di mehkûmî dayî çarmix ro. Yew hetê raştî, o bîn zî hetê çepê Îsayî de diya çarmix ro.

³⁴ Îsayî, înanê ke O dayne çarmix ro, semedê înan dua kerd, va “Babîyo Semawî, înan efû bike, çimkî ê nêzanê se kenê.” Leşkeran peşk eşt û kincê ci mabeynê xwu de bare kerdî.

³⁵ Şar uca vindertbi, temaşeyê înan kerdêne. Sermiyanan bi Îsayî tinaz kerd, va: “Ey kesê bînî xelisnayî; eger Mesîh o û weçîniteyê Homayî yo, dê wa xwu zî bixelisno!”

³⁶ Leşkerî zî ameyî nizdîyê ci û bi Ey tinaz kerd. Siska tirşe da Ey û va:

³⁷ “Eke ti Qralê cihûdan ê, dê xwu bixelisne!”

³⁸ Serê çarmixî de wina nuştbi: ENO QRALÊ CIHÛDAN O.

³⁹ Her di sûcdarê ke diyaybî çarmix ro, înan ra yewî bi heqaret va: “Ti Mesîh nîyê? Dê haydê, xwu zî û ma zî bixelisne.”

⁴⁰ La sûcdarê bînî bi tazîr cewabê ci da va: “To de tersê Homayî çinê yo? Ti zî eynî ceza ancenê.

⁴¹ Ma ena ceza heq kenê, ma cezaya kerdenanê xwu ancenê. La enê mêrikî tu xirabîyêk nêkerda.”

⁴² Dima va: “Ey Îsa, wexto ke ti bi hukimranîya xwu ameyî, mi biyare xwu vîr.”

⁴³ Îsayî ey ra va: “Ez to rê enê vajî, ewro ti do mi dir piya cenet de bê.”

Îsa mireno

^44-45 Teştareyê, saete diwês ra heta hîrê, roj bi tarî û tarîtî kewte heme cayê welatî ser. Perdeyo ke mabed de bi, orte de bi di cayî.

⁴⁶ Îsayî bi vengo berz veng da va: “Babîyo Semawî, ez ruhê xwu teslîmê destanê to kena!” Badê ke eno va, nefesê xwu yo peyîn da.

⁴⁷ Serwanê ke enê biyenî dî, va: “Eno heqîqeten yew merdimo salih bi” û Homayî rê hemd kerd.

⁴⁸ Qelebalixo ke semedê temaşekerdişî amebi, gama ke ena biyene dî, da sîneyê xwu ro û ageyrayî şaristan.

⁴⁹ Şinasîyê Îsayî û cînîyê ke Ey dima Celîle ra ameybî, ê zî dûrî de vindertî û enê çiyê ke qewimîyayne temaşe kerdî.

Îsayî dekenê mezel

⁵⁰ Endamanê Meclisê Berzî ra yew mêriko baş û salih estbi, nameyê ci Wusif bi.

⁵¹ Eno Wusif Arametya ra bi. Arametya yew şaristanê cihûdan bi. Wusif bihêvî paweyê Hukimranîya Homayî bi. Qerarê meclisî û fiîlê ci rê muxalefet kerdbi.

⁵² Wusif şi Pîlatûsî het û neaşê Îsayî waşt.

⁵³ Îsa çarmix ra ard war û bi paço keten kefen kerd. Dekerd zereyê mezelê ke zinar de amebi kendiş. Verê cû ê mezelî de kes nêamebi wedartiş.

⁵⁴ Roja Tedarikî bî. Roj bişiyêne awan, êdî Roja Sebtî dest pê kerdêne.

⁵⁵ Cînîyê ke Celîle ra Îsayî dima ameybî zî Wusifî dima şiyî. Înan mezel û neaşê Îsayî senî tede roniya, dî.

⁵⁶ Dima, ageyrayî û seba ke bisawê neaşê Îsayî ra, beharat û ruweno boyweş amade kerd. Ferzê Roja Sebtî ard ca û arisîyayî.