Lûqa 22 - Zazaki Southern

Îxanetê Yahûdayî

¹ Roşanê Nanê Bêmîrazî yê cihûdan, bi nameyê xwu yo bîn Roşanê Fisihî bibi nizdî.

² Serkahînî û alimê Tewratî seba ke şarî ra tersayne, yew rayiro munasib geyrayne ke Îsayî bikişê.

³ Eno mabeyn de, Îblîs dekewt qelbê Yahûda Îsxerîyotî, ey zî goş da Îblîsî. Yahûda Îsxerîyot diwês hewarîyanê Îsayî ra yew bi.

⁴ Şi serkahînan û qumandananê muhafizanê mabedî het, înan dir qisey kerd ke do Îsayî senî teslîmê destê înan bikero.

⁵ Keyfê înan enê rê ame û razî biyî ke seba enê pere bidê ey.

⁶ Yahûdayî eno qebûl kerd û firsend geyra, gama ke qelebalix çinê bo Îsayî teslîmê destê înan bikero.

Şamîya Peyîne

⁷ Roja Nanê Bêmîrazî bî. Gereka a roje qurbanê Roşanê Fisihî biameyne serebirnayiş.

⁸ Îsayî Petrûsî û Yûhenayî ra va: “Şêrê, seba ke ma werdê Roşanê Fisihî biwerê, amadekarî bikerê.”

⁹ Înan zî persa va: “Ti wazenê ma ça de werd amade bikerê?”

¹⁰ Îsayî înan ra wina va: “Biewnîyê, gama ke şima dekewtî şaristan, yew mêrik do vejîyo vera şima. Doreyê awe dest de yo. Heta keyeyo ke o şino ey teqîb bikerê.

¹¹ Wayirê keyeyî ra vajê ‘Seydayê ma perseno vano, odaya meymanan ke ez û şagirdê xwu piya ma do tede werdê Roşanê Fisihî biwerê, ça ya?’

¹² Wayirê keyeyî do qatê serî de yew odaya rakerdî ya hîra nîşanê şima bido. Werdî, uca amade bikerê.”

¹³ Petrûs û Yûhena uca ra aqitîyayî. Înan her çî seke Îsayî vatbi dî û werdê Roşanê Fisihî amade kerd.

^14-15 Gama ke wextê werdî ame, Îsa û hewarîyanê xwu sifre de cayê xwu girewt. Îsayî înan ra va: “Mi zaf waşt, verî ke ez dej biancî û bimirî, ez enê werdê Roşanê Fisihî şima dir piya biwerî.

¹⁶ Ez şima rê enê vajî, eno werdê Roşanê Fisihî Hukimranîya Homayî de do tam bireso manaya xwu; heta o wext ez do reyna enê werdî nêwerî.”

¹⁷ Dima, yew uskura girewte. Homayî rê şukir kerd û wina va: “Ena uskura bigêrê û piya ci ra bişimê.

¹⁸ Ez şima rê enê vajî, heta ke Hukimranîya Homayî bêro ez do reyna mehsûlê mehşilêre ra nêşimî.”

¹⁹ Dima, nane girewte û şukir kerd. Nane kerde leteyî û da înan. Va: “Eno bedenê min o; bedeno ke oxirê şima de feda beno. Seba ke şima mi biyarê xwu vîr, wina bikerê.”

²⁰ Bi eynî şekil, badê werdî uskura girewte û wina va: “Ena uskura ehdo newe yo; ehdo newe ke oxirê şima de bi rişnayişê gunîya mi dest pê keno.

²¹ Feqet biewnîyê, destê min û destê mêrikê ke do mi rê îxanet bikero eynî sifre de yê.

²² Xwura Benîademo Semawî rayiro bellîkerde de şino merg. Feqet, wey halê ê mêrikî rê ke Benîademê Semawî rê îxanet keno!”

²³ Hewarîyan mabeynê xwu de dest bi minaqeşe kerd, va: “Kam do enê îxanetî bikero?”

Kam berz o?

²⁴ Sewbîna zî, mabeynê hewarîyan de minaqeşe dest pê kerd ke înan ra kam do tewr berz bihesibiyo.

²⁵ Îsayî înan ra wina va: “Hukimdarê ena dinya, şarê xwu rê tehekum kenê. Sermiyanî zî, payeyê hewlan danê xwu.

²⁶ Şima wina mebê. Mabeynê şima de tewr pîl, wa sey tewr qijî bo; îdarekar, wa sey xizmetkarî bo.

²⁷ Kam hîna berz o? O ke sifre de ronişte yo, yan o ke xizmet keno? O ke sifre de ronişte yo, ne? Feqet ez, mabeynê şima de sey xizmetkarî ya.

²⁸ Rojanê ke ez ameya ceribnayiş de, înanê ke mi dir deyax kerd, şima yê.

²⁹ Senî ke Babîyê min ê Semawî hukimranî da mi, ez zî hukimranî dana şima.

³⁰ Bi eno qeyde, hukimranîya mi de şima do sifreyê mi de biwerê û bişimê. Şima do textê hukmî de ronişê û diwês eşîranê Îsraîlî mehkeme bikerê.”

Înkarê Petrûsî verîna diyeno zanayiş

³¹ “Şîmûn, Şîmûn! Îblîsî, seba ke sey xeleyî pirojine ra bivîyarno, şima waştî.

³² Feqet mi, seba ke ti îmanê xwu vindî nêkerê, dua kerde. Gama ke to tewbe kerd û ti ageyrayî, qewet bide way û birayanê xwu yê bawermendan.”

³³ Şîmûnî Îsayî ra va: “Wayirê ma, ez to dir şina zindan zî, merg zî.”

³⁴ Îsayî wina cewab da: “Petrûs, ez to rê enê vajî. Emşo, verî ke dîk veng bido, ti do hîrê rey înkar bikerê ke ti mi şinasnenê.”

³⁵ Dima hewarîyanê xwu ra persa va: “Wexto ke mi şima bê kîse, bê tewre û bê çaroxan şirawitî, yew kêmanîya şima biye?” Înan zî va: “Tu kêmanîya ma nêbiye.”

³⁶ Îsayî wina va: “La nika, o ke kîseyê ci zî esto, o ke tewreyê ci zî esto, wa bigêro xwu het. O ke şimşêrê ci çinê yo, wa ebaya xwu biroşo û yew şimşêr bierîno.

³⁷ Ez şima rê enê vajî, gereka eno vateyê pêxembertî heyatê mi de bêro ca: ‘O sûcdaran dir yew hesibiya.’ Tay mendo, çiyê ke derheqê mi de nusîyayê bêrê ca.”

³⁸ Hewarîyan va: “Wayirê ma, biewnî, tiya de di şimşêrî estê.” Îsayî va: “Bes!”

Îsa Koyê Zeytûne de dua keno

³⁹ Îsa vejîya teber. Sey her wextî şi Koyê Zeytûne. Şagirdê ci zî Ey dima şî.

⁴⁰ Gama ke resayî uca, Îsayî înan ra va “Seba ke şima nêrê xapênayiş dua bikerê.”

⁴¹ Dima, qasê mesafeyê eştişê yew kerra înan ra şi dûrî. Çok da û dua kerde va:

⁴² “Babîyo Semawî, eger miradê to gore yo, dejê ke ez do biancî mi ra dûrî bibere. Ancî zî, neke yê mi, wa waştişê to bo.”

⁴³ Sema ra yew melek Îsayî ra asa, qewet da Ey.

⁴⁴ Îsa miyanê yew dejê xorînî de bi; hîna bi heraret dua kerde. Çilkê areqê ci sey çilkê gunî kewtêne erd.

⁴⁵ Dua ra wurişt û ageyra verê şagirdanê xwu. Dî ke ê tesîrê xemgînî ra şiyê hewn a.

⁴⁶ Îsayî înan ra va: “Şima çi ra şiyê hewn a? Wurzê, dua bikerê ke şima nêrê xapênayiş.”

Îsa yeno tepiştiş

⁴⁷ Îsayî hema qisey kerdêne ke yew qelebalix asa. Yahûda vernîya înan de bi, o zî diwês hewarîyanê Îsayî ra yew bi. Seba ke Îsayî maçî bikero, aver ame.

⁴⁸ Îsayî ey ra va: “Yahûda, ti bi yew maç Benîademê Semawî rê îxanet kenê?”

⁴⁹ Înanê dorê Îsayî, gama ke fam kerd do se bibo, va: “Wayirê ma, ma bi şimşêr êrîş bikerê?”

⁵⁰ Înan miyan ra yewî, da xizmetkarê serkahînî ro, goşê ci yo raşt perna.

⁵¹ Feqet Îsayî va: “Vinderê, bes o!” Dima, destê xwu sawit cayê goşê xizmetkarî ra û şîfa da ey.

⁵² Îsayî serkahînan, qumandananê muhafizanê mabedî û sermiyananê ke gala ci kerdêne ra wina va: “Qey ez heydûd a ke şima bi şimşêran û çuwayan ameyî mi ser?

⁵³ Her roje mabed de ez şima reyde biya, şima destê xwu nêsawit mi ra. La ena saete saeta şima ya, wext wextê hukmê tarîtî yo.”

Petrûs înkar keno ke Îsayî şinasneno

⁵⁴ Înan Îsa tepişt û berd keyeyê serkahînî. Petrûsî dûrî ra ê teqîb kerdêne.

⁵⁵ Înan orteyê hewşî de adir wekerd û roniştî, Petrûs zî ame înan miyan de ronişt.

⁵⁶ Yew keyneka xizmetkare dî ke Petrûs verê adirî de ronişte yo. Bi dîqet ewnîya ey ra, va: “Eno mêrik zî Îsayî dir piya bi.”

⁵⁷ Labelê Petrûsî va: “Cînek, ez Ey nêşinasnena” û înkar kerd.

⁵⁸ Bineyke badê yewnayî o dî va: “Ti zî înan ra yê!” Petrûsî va: “Ez nîya, heval!”

⁵⁹ Teqrîben yew saete badêna, yewnayî bi israr wina va: “Tu şibheyê mi çinê yo, eno mêrik zî Ey dir piya bi. Çimkî Celîleyij o.”

⁶⁰ Petrûsî va: “Ti vanê se mêrik, ez fam nêkena!” Tam a esna de, Petrûsî hema qisey kerdêne, dîkî veng da.

⁶¹ Wayirê ma Îsa fetelîya û ewnîya Petrûsî ra. O wext Petrûsî ard xwu vîr ke Îsayî ey ra vatbi “Petrûs, emşo verî ke dîk veng bido, ti do hîrê rey mi înkar bikerê.”

⁶² Petrûs vejîya teber û zerrî ra berma.

⁶³ Mêrikanê ke Îsa tepiştbi, bi Ey tinaz kerd û dest pê kerd, O kuwa.

⁶⁴ Çimê ci girêdayî û va: “Eke ti pêxember ê, dê bizane, ma ra kamî da to ro?”

⁶⁵ Û Ey rê hema zaf nengî çînayî.

Îsa hizûrê Meclisê Berzî de

⁶⁶ Mecliso Berz ke sermiyanan, kahînan û alimanê Tewratî ra ameyne meydan, gama ke roj akewt kom bi. Muhafizan Îsa ard hizûrê enê meclisî.

⁶⁷ Înan Ey ra va: “Eger ti Mesîh ê, ma rê vaje.” Îsayî wina va: “Ez şima rê vajî zî şima mi ra bawer nêkenê.

⁶⁸ Ez perse bipersî zî şima cewab nêdanê.

⁶⁹ Feqet tiya ra pey Benîademo Semawî do kişta raşte ya Homayê qadirî de ronişo.”

⁷⁰ Hemîne têdir persa va: “Yanî ti Lajê Homayî yê?” Îsayî zî înan ra va: “Seke şima vanê, ez O ya.”

⁷¹ Înan va: “Êdî şahidî rê çi îhtîyacê ma esto? Çiyê ke vatî, ma bîzat fekê ci ra şinawitî.”