Lûqa 21 - Zazaki Southern

Bexşo heqîqî

¹ Îsayî sereyê xwu berz kerd, zengînê ke bexşê xwu eştêne qutîya bexşî, dîyî.

^2-3 Eno mabeyn de, yew cînîya vîyaya feqîre ameye û di pereyê paxirî eştî qutî. Îsayî gama ke eno dî, wina va: “Ena cînîya vîyaya feqîre tenya di pereyê paxirî dayî. La heqîqet eno yo ke, aye her kesî ra zêde da.

⁴ Çimkî înanê bînan çiyo ke serwetê xwu ra zêde mendo, eşt. La herçiqas ena cîneke zaf feqîr a zî, çiyê aye esto, heme da.”

Îqazê derheqê ameyeyî de

^5-6 Gama ke tayê kesan behs kerd ke mabed çiqas weş bi kerrayan û bi neziran ameyo xemilnayiş, Îsayî va: “Do roje bêro, her çiyo ke şima tiya vînenê birijîyo. Do kerra kerra ser o nêmano.”

⁷ Înan zî persa va: “Seydayê ma, enê çiyê ke ti vanê do çi wext bibê? Elameto ke biyayişê nînan nîşan dano çi yo?”

⁸ Îsayî wina va: “Dîqet bikerê! Wa kes şima nêxapêno. Zaf kesî do vejîyê meydan û nameyê mi bikar biyarê. Do vajê ‘Ez Mesîh a’ û vajê ‘Wext bi nizdî.’ Înan dima meşêrê!

⁹ Gama ke şima xeberanê herbî û îsyanî şinawenê, telaşe mekerê. Verî, lazim o ke enê bibê. Feqet eno, hema peynîya dinya nîyo.”

¹⁰ Dima, enê îlawe kerdî, va: “Miletî miletan dir, dewletî dewletan dir do herb bikerê.

¹¹ Do erdlerzê şîdetinî, ca bi ca xelayî û janê nêweşîyan bêrê meydan. Do biyenê dehşetane bibê, do asmîn de elametê ecêbî bêrê dîyayiş.

¹² “Feqet biyayişê enê heme çiyan ra ver, do însanî şima bitepişê û ezîyet bikerê. Seba ke ceza bikerê, do şima teslîmê mehkemayan bikerê, do şima dekerê zindanan; do şima kaşbikerê verê hukimdaran û walîyan. Enê heme çî, do seba nameyê mi bêrê şima sere de.

¹³ Eno zî şima rê do bibo firsend ke şima derheqê mi de şahidî bikerê.

¹⁴ Enê rewşan de nêbo ke şima bifikirîyê vajê ‘Ma do senî xwu midafea bikerê?’

¹⁵ Ez do hêzê xîtabetî û hîkmet bidî şima; neyarê şima do nêeşkê vera enê de vinderê û cewabê şima bidê.

¹⁶ Dadî û babîyê şima, way û birayê şima, merdim û hevalê şima bîle do şima bidê dest û şima ra tayê kesan bidê kiştiş.

¹⁷ Seba nameyê mi do her kes şima ra nefret bikero.

¹⁸ Feqet do tek yew mûya porê şima rê zî zirar nêro.

¹⁹ Şima do bi sebir û deyax ganê xwu bixelisnê.”

Rijîyayişê Yeruşalîmî

²⁰ “Gama ke şima dî Yeruşalîm hetê artêşan ra ameyo dagîrkerdiş, bizanê ke rijyayişê şaristanî biyo nizdî.

²¹ O wext êyê ke Yahûdîye de yê, wa biremê koyan. Êyê ke şaristan de yê, wa uca ra aqitîyê. Êyê ke yaban de yê, wa anêgeyrê şaristan.

²² Ê rojî, enê rojî yê ke, nuşteyê ke pêxemberan nuştê do bêrê ca û Homa do enê şarî ceza bikero.

²³ Wey halê ê cînîyan rê ke ê rojan de hemîla yê, yan zî putekan lewnenê! Çimkî welat do rojanê zaf zehmetinan de bo. Eno şar do raştê xezebê Homayî bêro.

²⁴ Yew qismê şarî do bierzîyo fekê şimşêran, êyê bînî zî do êsîr bigêrîyê û miyanê miletan ra bêrê vilakerdiş. Heta ke wextê miletanê bînan temam bibo, Yeruşalîm do binê linganê înan de bêro pelixnayiş.

²⁵ “Do roj û aşme û estarayan de elametê ecêbî bêrê dîyayiş. Heme miletê ke rîyê erdî de yê, do bi xumexumê derya û piroginayişê pêlan serûbin bibê û şaş bimanê.

²⁶ Însanî, gama ke felaketê ke do bêrê dinya ser de pawenê do tersan ra bixeriqîyê. Çimkî do qewetê semawî bilerzê.

²⁷ O wext do bivînê ke Benîademo Semawî miyanê hewran de bi qudreto berz û bi îhtîşam yeno.

²⁸ Gama ke biyayişê nînan dest pê kerd, tîk vinderê û sereyê xwu berz bikerê. Çimkî xelasîya şima nizdî ya.”

Vateyê Îsayî ebedî yê

²⁹ Dima, Îsayî înan rê eno mîsal qisey kerd: “Biewnîyê încîrêre ra, yan zî yew dara bîne ra.

³⁰ Gama ke darî pindik danê şima fam kenê ke mewsimê hamnanî biyo nizdî.

³¹ Bi eynî şekil, gama ke enê biyenî qewimîyenê, bizanê ke Hukimranîya Homayî nizdî ya.

³² Ez şima rê enê vajî, heta ke enê heme çî nêqewimîyê, eno nesil do meydan ra wenêdarîyo.

³³ Erd û asmîn do meydan ra wedarîyê, la vateyê mi esla do meydan ra wenêdarîyê.”

Her wext amade bên

³⁴ “Xwu rê dîqet bikerê. Mekewê sefahet û serxoştî û endîşeyanê enê heyatî dima. Wina ke, roja qîyametî, wa şima xafil nêqefilno.

³⁵ Çimkî, a roje do bêro temamê înanê ke dinya de cûyenê ser.

³⁶ Coka her wext amade bên. Seba ke şima bieşkê enê heme biyenan bivîyarnê û bi cesaret vejîyê hizûrê Benîademê Semawî, dua bikerê.”

³⁷ Îsayî biroj hewşê mabedî de waezî dayne, bişewe zî şaristan ra vejîyayne û şiyêne Koyê Zeytûne de mendêne.

³⁸ Şar zî seba ke goşdarîya Ey bikero, her roje rew şiyêne mabed.