Lûqa 20 - Zazaki Southern

Selahîyetê Îsayî

¹ Îsayî rojêk mabed de şarî rê waezî dayne; mizgînîya xelasî qisey kerdêne. Serkahînî, alimê Tewratî û sermiyanî ameyî û Îsayî dir dest bi minaqeşe kerd.

² Ey ra persayî va: “Dê ma rê vaje, ti nînan bi kamcîn selahîyetî kenê? Eno selahîyet kamî da to?”

^3-4 Îsayî wina cewab da: “Ez zî şima ra persêk bipersî. Mi rê vajê, Yehyayî selahîyetê waftîzî Homayî ra girewt yan însanî ra?”

⁵ Înan mabeynê xwu de perse minaqeşe kerde; yewbînan ra wina va: “Eke ma vajê ‘Homayî ra’ do vajo ‘O wext şima çi ra ey ra bawer nêkerd?’

⁶ Nê, eger ma vajê ‘Însanî ra’, şar do ma bido kerrayan ver. Çimkî pêro bawer kenê ke Yehya pêxember o.”

⁷ Peynî de, înan va “Ma nêzanê selahîyet kamî ra girewto.”

⁸ Îsayî zî va: “Madem winî yo, ez zî do şima ra nêvajî ke ez bi kamcîn selahîyetî nînan kena.”

Mîsalê natoranê xayinan

⁹ Dima, Îsayî şarî rê eno mîsal qisey kerd: “Mêrikêk yew rez ronayo. Rez bi îcare dayo natoran û demêko derg şiyo seyahet.

¹⁰ Eke wextê mehsûlî ameyo, seba ke mehsûlê rezî ra bara ci bidê, yew xulam şirawito natoran het. La natoran xulam kuwayo û destveng şirawito.

¹¹ Mêrikî sewbîna xulam şirawito. Natoran o zî kuwayo, heqaret pê kerdo û destveng şirawito.

¹² Mêrikî xulamo hîrêyin zî şirawito. Natoran o zî birîndar kerdo û qewirnayo.

¹³ “Wayirê rezî vato ‘Ecêba ez se bikerî? Lajê xwu yo ke ez ci ra zaf hes kena bişirawî, ez vana qey do goşdarîya ey bikerê.’

¹⁴ “Gama ke natoran lajê mêrikî dîyo, mabeynê xwu de wina qisey kerdo: ‘Eno warisê wayirê rezî yo! Eke ma ey bikişê, rez do ma rê bimano.’

¹⁵ Natoran lajê mêrikî rez ra kerdo teber û kişto. Eno hal de wayirê rezî do se bikero?

¹⁶ Do bêro enê natoran helak bikero û rezî îcare bido sewbîna kesan.” Goşdarîkerdişê enê mîsalî ra dima, şarî va: “Homa bisetirno!”

¹⁷ Îsayî ewnîya zereyê çimanê înan ra û wina va: “Madem wina yo, manaya enê vateyanê ke Zebûr de yê, çi ya? ‘Kerraya ke dêskaran red kerde, Biya kerraya hîmê bîna.’

¹⁸ “O ke bikewo serê a kerra, do bibo parçe-parçe. Kerra zî bikewo kamî ser, do ey bipelixno bikero sey wele.”

¹⁹ Alimanê Tewratî û serkahînan fam kerd ke Îsa bi enê mîsalî înan qesd keno. Coka înan waşt ke a esna de ey tewqîf bikerê, la seba ke hêrsê şarî ra tersayne, nêeşkayî ey tewqîf bikerê.

Heqê Sezarî Sezarî rê

²⁰ Çimê înan bi dîqet Îsayî ser o bi. Înan muxbîrî şirawitî Ey het. Enê muxbîran xwu sey merdimanê duristan nîşan dayne. Waştêne bi yew vateyê ci Ey bifîne dame û bi eno qeyde Ey teslîmê selahîyet û hukmê walîyê Roma bikerê.

²¹ Muxbîran Îsayî ra persa va: “Seyda, ma zanê ke ti a ke raşt a vanê û waez kenê. Ti mabeynê însanan de ciyakarî nêkenê, rayirê Homayî raşt û durist waez kenê.

²² Ma wazenê bimûsê: Gelo, semedê ma caîz o ke ma bac bidê Sezarî, yan nê?”

^23-24 Îsayî fam kerd, mêrikî kenê ke ey bifînê dame. Persa va: “Yew dînar nîşanê mi bidê. Ser o sûretê kamî, nameyê kamî esto?” Muxbîran va: “Yê Sezarî.”

²⁵ Îsayî va: “Madem winî yo, heqê Sezarî bidê Sezarî, heqê Homayî bidê Homayî.”

²⁶ Mêrikî nêeşkayî Îsayî verê şarî de, bi vateyanê ci bifînê dame. Vera cewabo ke girewt de hende şaş biyî, nêeşkayî tek yew vate bivînê.

Persa derheqê ganebiyayişî de

^27-28 Tayê mêrikî ameyî Îsayî het. Enê kesî girêdayeyê mezhebê Sadûqî bî û merg ra dima ganebiyayişî ra bawer nêkerdêne. Înan Îsayî ra persa, va: “Seydayê ma, Mûsa Tewrat de wina vano: ‘Eger yew mêriko zewicîyaye tutê ci çinê bê û bimiro, wa birayê merdeyî cînîya ci ya ke vîya menda dir bizewicîyo; wa neslê birayê xwu yê merdeyî dewam bikero.’

²⁹ Ma vajê ke hewt birayî estê. O yewin cînîyêk dir zewicîya, la hema ke tutê ci çinê yê, merd.

^30-31 O diyin zî, hîrêyin zî eynî cînî dir zewicîyayî û hema ke tutê înan çinê yê, merdî. Heme birayê bînî zî ena cînî dir zewicîyayî û hema ke xwu dima tutî nêverdayê, merdî.

³² Tewr peynî de cînî zî merde.

³³ Seba ke hewt birayî zî ena cînî dir zewicîyayê, gama ke merdeyî benê gane, ena cînî do bibo cînîya kamcînî?”

³⁴ Îsayî Sadûqîyan ra wina va: “Êyê ke ena dinya de cûyenê, zewicîyenê û yenê zewicnayiş.

³⁵ La êyê ke dinyaya bîne de layiqê ganekerdişî yê, nêzewicîyenê, nînê zewicnayiş.

³⁶ Enêyê winasî êdî nêmirenê; seba ke merg ra biyê gane, sey melekan benê tutê Homayî.

³⁷ Mûsa Tewrat de, ayetanê derheqê birro ke veşeno de eşkera îfade keno ke, merdeyî do bibê gane. Derheqê Rebî de vano ‘O Homayê Îbrahîmî, Îshaqî û Yaqûbî yo.’

³⁸ Homa, Homayê merdeyan nîyo, Homayê ganeyan o. Çimkî qatê Homayî de heme însanî cûyenê.”

³⁹ Tayê alimanê Tewratî va: “Seydayê ma, to baş cewab da.”

⁴⁰ Êdî kesî cesaret nêkerd Îsayî ra perse biperso.

Mesîh kam o?

⁴¹ Îsayî înan ra persa: “Însanî çi ra Mesîhî ra vanê Lajê Dawudî?

^42-43 “Dawud Zebûr de wina vano: ‘Rebî, Wayirê mi ra va ke kişta min a raşte de ronişe. Heta ke ez dişmenanê to binê linganê to de rafînena.’

⁴⁴ “Madem ke Dawudî Mesîhî ra vato ‘Wayirê mi’, Mesîh senî eşkeno bibo lajê Dawudî?”

⁴⁵ Gama ke pêro şarî goşdarî kerdêne, Îsayî şagirdanê xwu ra wina va:

⁴⁶ “Alimanê Tewratî ra xwu bipawê. Ê xeriqîyenê ke cube bidê xwu ra û bigeyrê, meydanan de bihurmet selam bidiyo înan, xavrayan de kunco serîn de, ziyafetan de cayo tewr baş de ronişê.

⁴⁷ Cînîyanê vîyayan xapênenê û mal-milkê înan destê înan ra gênê. Semedê xwunîşandayişî dergaderg dua kenê. Homa do bi cezaya tewr girane înan ceza bikero.”