Lûqa 17 - Zazaki Southern

Gune, îman û wezîfe

¹ Îsayî şagirdanê xwu ra wina va: “Damê ke însanî fînenê gune miheqeq tim do estbê. Feqet, wey halê înan rê ke enê rê benê wasita!

² Wey halê ey rê ke enê merdimanê mutewazîyan ra yewî fîneno gune! Eke kerraya arêyî debo vîyeyê yewê winasî û bierzîyo deryayî miyan, hîna bixeyr o.

³ Dîqet bikerê! Eger waye yan zî birayê şima yo bawermend gune bikero, îqaz bikerê. Eger tewbe bikero, efû bikerê.

⁴ Eke roje de hewt rey vera şima de gune bikero, la hewt rey bêro şima het û vajo mi tewbe kerd, efû bikerê.”

⁵ Hewarîyan Wayirê ma Îsayî ra va “Îmanê ma bizêdne.”

⁶ Îsayî înan ra wina va: “Eke qasê heba xerdelî îmanê şima bibo, şima ena tuyêre ra vajê ‘Kokê xwu ra webe û derya de bironîye’ şima rê îtaet kena.

⁷ “Ferz bikerê ke, yew xulamê şima yo ke cite yan zî şiwantî keno esto. Gama ke hêga ra bêro, şima ci ra vanê ‘Tavilî bêre sifre de ronişe’?

⁸ Eksê ci, şima do vajê ‘Mi rê şamî amade bike, pêşmala xwu bibeste, mi rê xizmet bike. Badê ke mi werd û şimit, ti zî do biwerê û bişimê.’

⁹ Seba ke emirê şima ardê ca, şima xulamî rê caran sipas kenê?

¹⁰ Şima zî bi eynî şekil, kerdişê heme çiyê ke şima rê emir biyê ra pey, gereka şima vajê ‘Ma qûlê sade yê, çiyo ke keweno ma ser, ma o kerd. Pêro eno yo.’”

Muhîmîya minetkarîye

¹¹ Îsayî ver bi Yeruşalîm rayirê xwu ra dewam kerd, mabeynê Samîrîye û Celîle ra vîyart.

^12-13 Gama ke dekewt yew dewe, des mêrikê cuzaminî ameyî Ey vera. Dûrî de vindertî û veng da va: “Îsa, Wayirê ma, ma rê bêre rehme.”

¹⁴ Îsayî ke ê dî, va: “Şirê, xwu nîşanê kahînan bidê.” Des mêrikî zî gama ke şiyêne, rayir ra şîfa dî.

¹⁵ Înan miyan ra yewî gama ke ewnîya şîfa dîya, ageyra Îsayî het. Bi vengo berz Homayî rê hemd kerd.

¹⁶ Kol bi linganê Îsayî û Ey rê sipas kerd. Eno mêrik Samîrîyeyij bi.

¹⁷ Îsayî va: “Înanê ke şîfa dî des kesî nêbî? New kesê bînî hê ça?

¹⁸ Seba ke Homayî rê hemd bikerê, enê xerîbî ra teber kes apey nêame?”

¹⁹ Dima Îsayî mêrikî ra va: “Wurze û şo. Îmanê to ti xelisnayî.”

Hukimranîya Homayî

²⁰ Fêrisîyan Îsayî ra persa va: “Hukimranîya Homayî do key bêro?” Îsayî wina cewab da înan: “Hukimranîya Homayî bi şeklo ke çim bivîno nîna.

²¹ Însanî do nêvajê ‘Biewnîyê, Hukimranîya Homayî ha tiya de!’ yan zî ‘A ha uca de!’ Çimkî Hukimranîya Homayî mabeynê şima de ya.”

²² Dima, Îsayî şagirdanê xwu ra wina va: “Do wina rojî bêrê ke, o wext, şima do biwazê rojanê Benîademê Semawî ra yew roje bivînê, feqet şima do nêeşkê bivînê.

²³ Însanî do şima ra vajê ‘Biewnîyê, ha uca de!’ yan zî ‘A ha tiya de!’ Cayê xwu ra meaqitîyê, înanê ke wina qisey kenê dima meşêrê.

²⁴ Senî ke virso virseno û yew sere ra hetanî sereyo bîn asmînî roşin keno, ameyişê Benîamedê Semawî zî do wina bo.

²⁵ Labelê verî, gereka Benîademo Semawî zaf dej bianco û hetê enê neslî ra bêro redkerdiş.

²⁶ “Senî ke zemanê Nûhî de biyo, ameyişê Benîademê Semawî de zî do winî bo.

²⁷ Heta roja ke Nûh wenişt gemî însanan werdêne, şimitêne û zewicîyayne. Dima tofan wurişt, heme helak kerdî.

²⁸ Wexto ke Benîademo Semawî bêro, her çî eynî do sey zemanê Lûtî bo. Însanan werdêne û şimitêne, erênayne û rotêne, ramitêne û çînayne û xwu rê banî viraştêne.

²⁹ Feqet, roja ke Lût Sodom ra aqitîya, asmîn ra adir û kukird vara, heme helak kerdî.

³⁰ Gama ke Benîademo Semawî zî biaseyo, eynî do winî bibo.

³¹ A roje keso ke serê banî de yo, wa nêro war û denêkewo zereyê keyeyê xwu. Do wextê ci çinê bo ke eşyayê xwu zî bigêro. O ke hêga de yo zî, wa anêgeyro keyeyê xwu.

³² Cînîya Lûtî biyarê xwu vîr!

³³ O ke biwazo ganê xwu bixelisno do ey vindî bikero, o ke ganê xwu vindî bikero zî do ey bixelisno.

³⁴ Ez şima rê enê vajî, a şewe di kesê ke eynî nivîne de yê ra do yew bêro girewtiş, o bîn bêro verdayiş.

^35-36 Di cînîyê ke piya xele tehnenê ra yewe do bêro girewtiş, a bîne bêro verdayiş.”

³⁷ Şagirdanê ci zî persa va: “Wayirê ma, enê do ça bibê?” Îsayî cewab da va: “Leş ça bo, leşwerî do uca bêrê pêser.”