Lûqa 10 - Zazaki Southern

Îsa Hewtayna Şagirdan Wezîfedar Keno

¹ Enê ra pey Îsayî hewtayna şagirdî wezîfedar kerdî. Her şaristan û her cayo ke do şiro, xwu ra ver ê di heb - di heb şirawitî.

² Înan ra va “Mehsûl zaf o, la karkerî tay ê. Eno semed ra Rebê wayirê mehsûlî rê lavey bikerê ke wa seba hewanayişê mehsûlê xwu karkeran bişirawo.”

³ “Nika şêrê! Ez şima sey verekan şirawena miyanê vergan.

⁴ Pere, tewreyê erzaqî yan zî çaroxanê yêdekan qet megêrê xwu het. Rayir de zaf mevinderê û kesî dir yarî mekerê.

⁵ Şima hema ke denêkewtê yew keye, verî vajê ‘Wa silametî enê keyeyî ser o bo!’

⁶ Eger uca keso layiqê silametî bibo, do silametîya şima ey ser o bimano. Feqet eke çinê bo, do ageyro şima ser.

⁷ Şima şiyî kamcîn keye uca bimanê, şima rê çi îkram bikerê biwerê bişimê, çimkî karker heqê keda xwu heq keno. Keye bi keye megeyrê.

⁸ “Gama ke şima dekewtî yew şaristan, eger însanî şima qebûl bikerê, şima rê çi îkram bikerê biwerê.

⁹ Şîfa bidê nêweşanê ucayî û însanan ra vajê ‘Hukimranîya Homayî ameya nizdîyê şima.’

¹⁰ La eke yew şaristan de şima qebûl nêkerê, vejîyê kuçeyanê ê şaristanî û wina vajê:

¹¹ Tozê şaristanê şima ke dusîyayo linganê ma bîle, seba îqazkerdişî, ma vera şima de weşanenê! Labelê enê bizanê ke Hukimranîya Homayî nizdî ya.

¹² Ez şima rê enê vajî, roja hesabî halê înanê ke o şaristan de cûyenê do şarê Sodomî ra bêter bo.”

¹³ “Wey halê to rê ey şarê Xorazînî! Wey halê to rê ey şarê Beytsayda! Mucîzeyê ke miyanê şima de biyê eke Sûr û Sayda de bibiyêne, şarê ucayî rewna tewbe kerdbi, palas antbi xwu û miyanê wele de roniştbi.

¹⁴ La roja hesabî, halê şima do yê Sûr û Sayda ra bêter bo.

¹⁵ Ey Kefernahûm ya ti, ti vanê qey ti do bihewanîyê asmîn. Nê! Ti do bikewê alemê merdeyan!

¹⁶ “Ey şagirdê mi, o ke şima bigoşdaro, seke ez goşdarita. O ke şima red bikero, seke ez red kerda. O ke mi red bikero zî seke Eyê ke ez şirawita red kerdo.”

¹⁷ Hewtay şagirdî bi keyf raywanîya xwu ra ageyrayî. Îsayî ra va “Wayirê ma, gama ke ma nameyê to zikir kerdêne cinan bîle ma rê vîye ronayne!”

¹⁸ Îsayî înan ra wina va: “Mi dî Îblîs asmîn ra sey virsoyî kewt war.

¹⁹ Biewnîyê, cinê ke emirê Îblîsî de yê, manenê maran û eqreban. Mi selahîyet dayo şima ke înan bigêrê binê linga xwu û bipelixnê. Şima do temamen bibê xalibê dişmenê xwu Îblîsî. Tu çiyêk do nêeşko zirar bido şima.

²⁰ Feqet seba ke cinî şima rê vîye ronanê keyfê xwu meyarê, seba ke nameyê şima asmîn de qeyd beno keyfê xwu biyarê.”

Îsa, Babîyê Semawî rê Dua Keno

²¹ A esna de Îsa bi Ruho Miqedes ame şewq û wina va: “Babîyo Semawî, Wayirê erd û asmînî! Ez to rê şukir kena ke to enê heqîqetî kesê wayirê hîkmetî û biaqilan ra nimitî, to însanê ke qasê tutan saf ê rê akerdî. Belê Babîyo Semawî, eno miradê to bi.

²² “Babîyê minê Semawî her çî emanetê mi kerd. Babîyo Semawî ra teber tu kes nêzano Lajo Semawî kam o. Babîyo Semawî zî, Lajo Semawî zano O kam o. Û tenya, kesê ke Lajo Semawî wazeno Ey bi înan bido şinasnayiş zanê O kam o.”

²³ Îsa ageyra şagirdanê xwu ser û xisûsen înan rê wina va: “Werre bi ê çiman, çiyo ke şima dîyo, ê zî vînenê!

²⁴ Ez şima rê enê vajî, gelek pêxemberan û hukimdaran çiyo ke şima dîyo waşt bivînê la nêeşkayî bivînê; çiyo ke şima şinawito waşt bişinawê la nêeşkayî bişinawê.”

Mîsalê Ardimkarîye

²⁵ Yew alimê Tewratî seba ke Îsayî îmtîhan bikero wurişt payanî û wina va: “Seyda, seba ke ez biresî heyato ebedî ez se bikerî?”

²⁶ Îsayî persa va: “Tewrat de çi nuşte yo? Ti uca çi wanenê?”

²⁷ Mêrikî wina cewab da: “Bi heme qelbê xwu, bi heme canê xwu, bi heme qewetê xwu û bi heme aqilê xwu Rebê xwu Homayî ra hes bikerê, şima xwu ra senî hes kenê cîranê xwu ra zî wina hes bikerê.”

²⁸ Îsayî va “To cewabo raşt da. Eke ti wina bikerê ti resenê heyato ebedî.”

²⁹ Labelê alimê Tewratî seba ke xwu heqdar vejo Îsayî ra persa va: “Eyla cîranê mi kam o?”

³⁰ Îsayî wina cewab da: “Yew mêrik wexto ke Yeruşalîm ra şino Erîha keweno destê heydûdan. Heydûdî mêrikî şelênenê, kuwenê û wezîyetêko nîmkişte de verdenê, danê piro şinê.

³¹ Yew kahîno ke tesadufen uca ra vîyarto o dîyo, labelê vîyarto hetê wetê rayirî û şiyo.

³² Dima yew Lewîyij ameyo uca. Mêriko birîndar dîyo, la o zî vîyarto şiyo.

³³ La rayirê yew Samîrîyeyijî zî uca ra vîyarto, mêriko birîndar dîyo û zerrîya ci pê veşaya.

³⁴ Şiyo verê mêrikî, zeyt û şerab rişnayo birînanê ey ser, birînê ci piştê. Dima zî mêrik wenayo herê xwu û berdo xane, uca ey dir eleqedar biyo.

³⁵ Roja bîne di dînarî dayê xandarî û vato ‘Baş biewnî ey ra, eger pereyo ke mi dayo ra vêşêr ti xerc bikerê ageyrayiş de ez dana to.’”

³⁶ Îsayî alimê Tewratî ra persa va: “To gore, enê hîrê kesan ra kamcînî mêriko ke kewto destê heydûdan rê wezîfeyê cîrantî ardo ca?”

³⁷ Alimê Tewratî cewab da va: “O ke zerrîya ci veşaye û ci rê ardim kerd.” Îsayî va “O wext ti zî şo û eynî winî bike.”

Îsa Keyeyê Meryeme û Merta de

³⁸ Îsayî û şagirdanê ci rayirê xwu dewam kerd, dekewtî yew dewe. Uca yew cînî estbî. Nameyê aye Merta bî, keyeyê xwu de ê kerdî meyman.

³⁹ Yew waya Merta estbî. Nameyê aye Meryeme bî. Meryeme verê linganê Îsayî de roniştbî, goşdarîya qiseykerdişê ci kerdêne.

⁴⁰ Feqet Merta karê xwu yê zafî ver miyanê telaşî de bî. Ameye verê Îsayî û Ey ra va “Wayirê ma, ti nêvînenê, waya mi heme kar mi rê verdayo. Dê vaje wa hetê mi bikero!”

⁴¹ Îsayî zî cewab da, va: “Merta, Merta, ti endîşe kena û her çî xwu rê kena derd.

⁴² Oxro ke tenya yew kar esto gereka bêro kerdiş. Axir Meryeme eno karo tewr muhîm tercîh kerd û eno tercîh zî do aye ra nêgêrîyo.”