Lûqa 9 - Kitabo Mûqades

Îsa Diwês Wekîlanê Xo Rişeno

¹ Îsay veynda diwês wekîlandê xo, quwet ew hukum da înan ki ê heme rihê xiraban sero hukum bikerê ew nêweşan weş kerê.

² Ey ê riştî ki xebera Hukumdareyda Ellay vila kerê ew nêweşan weş kerê.

³ Ey înan rê wuna va: “Şima do qandê rayşiyayen teba xo di nêberê, ne çuwe, ne tewre, ne nan, ne perrey ew ne zî di qolikî berê!

⁴ Ew şima sifte kamî rê benê meymanî, hetanî şima a sûk ra abiryê, keyedê ey di bimanê.

⁵ Naqor êyê ki şima qebul nêkenê, wexta ki şima uja ra abiryenê, tozê lingandê xo zî roşanê ki, wa ê bizanê înan şima rê senî çewtey kerda.”

⁶ Wekîlî kewtî ray, dew bi dew mijdîyana Ellay heme ca ra kerd vila ew nêweşî kerdî weş.

Hêrodes Terseno

⁷ Hukumdar Hêrodesî nê girweyê ki welat di bîyê aşnawitî ew ey nêzanayê ki se kero, çiki tayin vatê Yehya merg ra werişto,

⁸ tayin zî vatê kiştda Ellay ra Îlyas Pêxember ameyo ew ê bînan zî vatê pêxemberandê verênan ra jewê merg ra werişto.

⁹ Hima Hêrodesî va: “Mi bixo milê Yehyay da birnayiş. Eceba no kam o, ezo wuna nê xeberanê ci aşnawena?” Qandê coy Hêrodes qayil bi ki Îsay bisilasno.

Îsa Panj Hezarî Merdiman Keno Mird

¹⁰ Wekîlê Îsay peyser amey Îsay hetek ew çi girweyê ki înan bixo kerdê, pêro Ey rê va. Bahdo Îsay wekîlandê xoya pîya xo peyser ant sûkda Beytsayda.

¹¹ Senî şêligî zana O yo uja di, Ey dima şî. Îsay zî ê peyser nîyaçarnay ew qebul kerdî, Ey înan rê qalê Hukumdareyda Ellay kerd ew êyê ki mehtajê şîfay ê, ê zî kerdî weş.

¹² Hinî rojî kerdê şiro awar, nê diwês wekîlî amey ew Îsay rê va: “Na milet biriş, wa şiro nê dewî û çiftligê ki çorşmedê tîyay di, qenê hem xo rê cayê rakewtişî, hem zî tenekê werd vînenê, çiki ma yê tîya gema.”

¹³ Hima Îsay va: “Înan rê şima nan bidê!” Înan zî va: “Ma di bê panj nanan ew di masan teba vêşî çinî yo. Yazî ti qayil ê ma şim na hendayê milet rê nan bigîm?”

¹⁴ Çiki uja di nezdîyê panj hezarî merdimî bîyê. Hima Îsay telebandê xo rê va: “Şima şêligî rê vajê, wa qelfey bê ew roşê. Hirg qelfe wa nezdîyê pancas merdimî bo.”

¹⁵ Telebanê Îsay winî kerd ew şêlig pêro ronişt.

¹⁶ Bahdo Îsay nê panj nanî ew di masey girotî, çimê xo açarnay hetê azmînîya ew şukur kerd. Ey nê nanî û masey bara kerdî, day telebandê xo ki şêligî ra vila kerê.

¹⁷ Milet nan werd ew pêro bî mirdî. Naqor leteyê ki vêşî mendî, arêbîyay pêser ew înan ra diwês selî bî pirrî.

Petrûs Mesîhî Silasneno ew Îsa Yasifta Qalê Mergdê Xo Keno

¹⁸ Îsay rojê duay kerdê ew telebeyê ci tenya Ey hetek di bî. Uja di Îsay înan ra pers kerd: “Milet qandê mi se vana, ê vanê ez kam a?”

¹⁹ Telebanê ci va: “Taynî vanê, no Yehya yo fina merg ra werişto, taynî vanê Îlyas o fina ameyo, ew taynî zî vanê, no pêxemberêndo verên o merg ra werişto.”

²⁰ Îsay înan rê va: “Ma şima rê ki ez kam a?” Wexta Petrûsî wuna va: “Ti Mesîh ê, Xeleskaro ki Ellay wahd kerdo, O tî yê!”

²¹ Wexta Îsay ê rind tembe kerdî ki ney kesî rê nêvajê.

²² Ey înan rê va: “Gerek Lajê Însanî bol ezîyet bianco. Merdimê pîlî, serê kahînan ew Alîmê Kitaban do Ey red kerê, kişten dê, ew roja hîrin di O do merg ra werzo.”

Kamo Ki Îsay Dima Şiro, O Do Mergî Xo Çiman Bigîro

²³ Bahdo Îsa heminan rê wuna va: “Kam ki qayil o mi dima bîro, o do xo ra ew kêfdê xo ra bivêro, hirg roj xaçê xo wegîro ew mi dima bîro.

²⁴ Çiki kam qayil o ganê xo bireyno, o do ey vinî kero. Hima kamo ki ganê xo xatirdê mi di vinî kero, o do ey bireyno.

²⁵ Eki jew merdim dinyay hemî qezenc kero ew ganê xo vinî kero, o do ey rê çi fayde bikero?

²⁶ Kamo ki mi ra û qisandê mi ra bişermayo, wexto ki Lajê Însanî pey hekmetda xoya û hekmetda Pêrdê xoya û melekana fina bîro, O do zî ê merdimî ra bişermayo.

²⁷ Ez şima rê raşta ci vaja: Êyê ki tîya di vinderdey ê, şima ra taynê ci hendik Hukumdareya Ellay nêvînê, ê do merg nêvînê!”

Hîrê Telebeyê Îsay Ey Nûrî Mîyan Di Vînenê

²⁸ Heşt rojî bahdê nê qisana, Îsa pey Petrûs, Yûhanna ew Yaqûbîya pîya şi jew kerrî ser ki duay bikero.

²⁹ Wexto ki Îsay duay kerdê, rîyê ci virrya, çinayê ci zî bi çix-sipe ew berqîyayê.

³⁰ Jû fin di, di camêrdî zî Ey hetek di asay ew Eya qisey kerdê. Nê camêrdî Mûsa û Îlyasîya bî.

³¹ Nê nûrdê cinetîya berqîyayê ew Îsay rê qalê soyindê ci kerdê, meramê Ellayo ki Îsay do Yeruşalîm di bîyardayê ca, qalê ey kerdê.

³² Petrûs û ê di telebeydê bînî hewndo xorî di kewtîbî, hima hesyay xo ew dî ki Îsa yo nûrdê cinetîya berqîyeno ew ê di camêrdî yê zî Ey hetek di.

³³ Înan kerd ki Îsay hetek ra abiryê, Petrûsî Îsay rê va: “Begê mi, çi rind o ki ma yê tîya di, veradi ma hîrê komî virazim, jû to rê, jû Mûsay rê ew jûna Îlyasî rê.” Hima Petrûsî winî vatê, çiki ey nêzanayê o yo se vano.

³⁴ Çeqa ki Petrûsî nê qisey kerdî, hewrê ame ew înan rê kerd sersî. Senî ki hewrî serê înan girot, telebey tersay.

³⁵ Hewrî ra vengê ame va: “No Lajê min o, mi O weçînayo, goştareya ey bikerê!”

³⁶ Bahdê nê qisana ê weynay ki Îsa tenya yo. Teleban no heme çîyo ki dîyo, zerrîda xo di nimitê ew ê rojan di kesî rê qal nêkerdê.

Îsa Jew Lajekî Ra Cinî Vejeno

³⁷ Şewrayêrî Îsa hîrê telebandê xoya pîya kerre ra ame war, bol şêlig ame vera Ey.

³⁸ Şêligî mîyan ra jew mêrdekî veynda Îsay va: “Mehlîmê mi, ez to ra reca kena, finê bewnî nê lajdê mi, xora o lajê mi tenya yo.

³⁹ Jew riho xirab ey tepêşeno ew o jû find' qîreno, no riho xirab ey xişmêna dano tîya ro, dano uja ro hetanî kew kewno fek, heme cayê lajekî keno dirbetin, ew bahdo zorêna ey rehat veradano.

⁴⁰ Mi telebandê to rê reca kerd ki ê nê rihê xirabî biqewirnê, hima înan nêşa.”

⁴¹ Wexta Îsay wuna va: “Ey cisno bêîman û ray-ser-kewte! Ez do hetanî çimhal şima mîyan di ba ew damişê şima ba? Lajê xo bîya tîya!”

⁴² Lajek hewna ameyê hetê Îsaya ki rihê xirabî fina o eşt erd ew da tîya ro, da uja ro. Hima Îsay riho xirab tahzîlî kerd, lajek kerd weş û peyser da pêrdê ci.

⁴³ Êyê ki uja di bî, hemin na hekmeta Ellay a gird dî ew ecêb mendî. Çeqa ki şêlig pêro girweyê ki Îsay kerdê înan rê ecêb mendîbî, Ey telebandê xo rê wuna va:

Îsa Fina Qalê Mergdê Xo Keno

⁴⁴ “Rind goştareya mi bikerê ezo şima rê se vana: Nezdi ra Lajê Însanî do bideyo merdiman dest.”

⁴⁵ Hima înan fahm nêkerdê ki O yo se vano. Ellay mahneyê nê qisan înan ra nimitbi ki ê nînan hewna fahm nêkerê. Ew ê zî tersayê ki qandê ê qisan pers kerê.

Kam Heminan Sera yo?

⁴⁶ Teleban mîyabeyndê xo di qisey kerdê ki înan ra kam heminan sera yo.

⁴⁷ Îsay zanayê çiçî kewtê înan zerre, qandê coy Ey jew qeçek girot xo hetek

⁴⁸ ew înan rê wuna va: “Kamo ki namedê mina nê qeçekî qebul keno, o mi zî qebul keno. Ew kamo ki mi qebul keno, Oyo ki ez rişta, O zî ey qebul keno. Eki winî ya, mîyabeyndê şima di kamo ki xo cêra vîneno, o raşta heminan sera yo.”

Kamo Ki Şima Vero Nêvindeno, O Heta Şima yo

⁴⁹ Wexta Yûhannay Îsay rê wuna va: “Begê mi, ma jew mêrdek dî, ey namedê toya cinî qewirnayê. Ma ey vero vijyayê, nêverdayê, çiki o yo zeydê maya to dima nîno.”

⁵⁰ Îsay zî va: “Ey veradê! Çiki kamo ki şima vero nêvindeno, o heta şima yo.”

Samerîyeyijî Îsay Qebul Nêkenê

⁵¹ Ellay do Îsa bigirotayê azmîn, o wext nezdi bi. Qandê coy Îsay verê xo kerd hetê Yeruşalîmîya ew gamê xo vera uja eştê.

⁵² Îsay xeberdarî verdê xo riştî. Xeberdarî amey jû dewda Samerîye ew ê qayilî bî Ey rê uja di ca hadre kerê.

⁵³ Hima dewijî qayilî nêbî Îsay meyman kerê, çiki o şîyê Yeruşalîm.

⁵⁴ Senî ki telebandê Îsay ra Yaqûb û Yûhannaya na aşnawit, înan Îsay rê va: “Rebbî, ti wazenê ma azmîn ra adir bivarnim nînan ser ew nînan telef kero!”

⁵⁵ Hima Îsay xo açarna vera telebandê xo ew qahrîya înan ra

⁵⁶ ew bahdo şî jûna dew.

Kamo Ki Îsay Dima Şiro, O Do Peynî Mewno

⁵⁷ Hewna ray ra bî, jewerî Îsay rê va: “Ti şirê kotî se, ez hadre ya to dima bîra.”

⁵⁸ Îsay zî ey rê va: “Bew, êdê lûwan qulê ci estê, êdê mirîçikan zî halînê ci estê, hima cayê Lajdê Însanî çinî yo ki sereyê xo rono.”

⁵⁹ Îsay jewnay rê va: “Mi dima bê!” Hima ey va: “Begê mi, veradi ez verî şira pêrê xo mezel kera.”

⁶⁰ Hima Îsay ey rê wuna va: “Merdan veradi, wa ê bixo merdanê xo mezel kerê. Hima ti şo ew xebera Hukumdareyda Ellay vila ki!”

⁶¹ Jewnay zî va: “Rebbî, ez bol qayil a toya pîya şira, hima veradi ez verî şira kufletdê xo ra xatir buwaza.”

⁶² Îsay ey rê va: “Merdimo ki haletî tepêşeno ew weyneno xo peynî, o merdim rewayê Hukumdareyda Ellay nîyo.”