Lûqa 5 - Kitabo Mûqades

Îsa Veyndano Sîmonî

¹ Rojê Îsay kinardê gol di bi, nameyê na gol Gennesaret bi. Milet çorşmeyê ey girot ki qisanê Ellay biaşnawê.

² Îsay di teney qayixî gol ver di dî, wihêrê ci ameybî war ew torrê xo yê masan kerdê pakî.

³ Îsa nişt qayixa ki ê Sîmonî ya ew ey ra reca kerd ki, wa qayixa xo tayn kinardê gol ra bero dûrî. Bahdo qayix mîyan di ronişt ew uja ra miletî rê wahzî day.

⁴ Îsay qiseyê xo qedînay se, Sîmonî rê va: “Qayixanê xo biramê cayandê xorîya ew torranê xo çekerê aw mîyan ki şima masey tepêşê!”

⁵ Sîmonî Îsay rê va: “Begê mi, ma bîşewka hetanî şewra ma hend torrî çekerdî ew fina zî ma nêşa teba tepêşim. Hima vatişdê to sera ez do fina zî çekera.”

⁶ Nay sera, înan torrê xo çekerdî. Hendik bol masey kewtî mîyan ki hima hima torrê ci do bidirryayê.

⁷ Înan pey desta veynda wertaxandê xo yê bînan ki, wa bêrê ci rê qeyret bikerê. Qayixa bîn zî amê, ew wirna qayixî hendik kerdê pirr ki tayn mendbi, do aw bin kewtê.

⁸ Senî ki Sîmon Petrûsî no wuna dî, xo eşt lingandê Îsay ver û ci ra reca kerd: “Rebbî, mi ra dûrî vindi, ez merdimêndo gunakar a!”

⁹ Sîmon ew êyê ki eya pîya qayix di bî, bol tersaybî ew ecêb mendîbî, çiki înan hendayê bol masey tepiştîbî.

¹⁰ Lajê Zebedî, Yaqûb û Yûhanna, ê yê Sîmonîya pîya kar kerdê, ê zî bol tersaybî. Hima Îsay Sîmonî rê va: “Meters! Neya tepya, ti do masey nê, merdiman tepêşê!”

¹¹ Bahdo, înan qayixê xo gol ra antî herr ser, heme çî uja di verada ew Îsay dima şî.

Îsa Jew Nêweşê Cizamî Keno Weş

¹² Rojê jû sûk di Îsa raştê jew merdimî ame, ganê ci pêro geyrabi nêweşînda cizamî ya. Senî ki ey Îsa dî, xo çekerd lingandê ci ver, rîyê xo na erda ew reca kerd: “Begê mi, eki ti buwazê, ti şenê mi weş kerê!”

¹³ Îsay destê xo kerd derg û na ey ser ew va: “Ez qayil a ti weş bê!” Mêrdek a çeq di nêweşînda cizamî ra reya.

¹⁴ Îsay o tembey kerd ki, wa kesî rê teba nêvajo, hima ey rê va: “Şo kahînî hetek, wa bivîno ki ti nêweşînda xo ra reyayê ew wa o zî ney testîq kero. Bahdo zî zeki Qanûndê Mûsay di yazi bîyo, qurbananê pakey bik, wa pêro pey bihesyê ki ti nêweşînda xo ra reyayê.”

¹⁵ Nay sera xebera Îsay verî ra vêşî bî vila. Merdimî qelfe qelfe ameyê Ey hetek ki goştareya ey bikerê, ew O nêweşîna înan weş kero.

¹⁶ Hima wext bi wext Îsay xo antê cayo bêveng û bêhes ki duay bikero.

Jew Nêweşê Fercî Benê Îsay Hetek

¹⁷ Rojê Îsay fina wahzî dayê merdiman. Vernî di, Ferîsîyan û Alîmê Kitabana roniştîbî, nê pêro heme sûkandê Celîle ra, Yawudîye ra ew heta Yeruşalîm ra zî ameybî. Ew hukumdê Ellaya, Îsay şîfa dayê nêweşan.

¹⁸ A çeq di, çend camêrdan jew nêweşo fercin cinaza kerd û ard uja. Ê qayilî bî ey berê zerre ew Îsay ver di ronê.

¹⁹ Hima hend milet bol bi, înan nêşayê ki ravêrê ew ey Îsay hetek resnê. Qandê coy ê şî banî ser, banî sera çend kiremîtî hewaday ew nêweş uja ra verada cêr, wertedê milet ra Îsay ver di rona.

²⁰ Îsay îmanê înano ki wuna gird o dî ew nay sera nêweşî rê va: “Ey merdim, gunayê to ef bî!”

²¹ Ferîsîyan û Alîmê Kitaban xo mîyan di va: “No kamo ki O yo wuna Ellay rê kufir keno? Bê Ellay kam şeno gunayan ef kero?”

²² Hima Îsay zanayê fikrê înan çiçî yo ew înan ra pers kerd: “Şima yê zerrîda xo di çi winî dişmiş benê?

²³ Şima se vanê kamcî vatiş deha rehat o, kes vajo ‘Gunayê to ef bî’, yazî ‘Werz pay ew şo!’

²⁴ Hima şima do bivînê, hukmê Lajdê Însanî tîya erdî sero zî esto ki gunayan ef kero!” Ew O ageyra nêweşî ser ew va: “Ezo to rê vana, werz pay, mitêlanê xo bigî ew şo keye!”

²⁵ Mêrdek çimandê heminan ver di jû find' werişt pay, mitêlê ki sero kewte bi, ê arêday, şi keye ew Ellay rê şukur kerdê.

²⁶ Êyê ki uja di arêbîyaybî pêser, pêro bol şaş mendîbî, înan Ellay rê hemd û şukur kerdê ew vatê: “Ewro ma girweyê ecêbî dî!”

Îsa Veyndano Tahsîldar Lewî

²⁷ Bahdo, wexto ki Îsa sûk ra vijyayê, jew tahsîldar dî ew nameyê nê tahsîldarî Lewî bi. Nê tahsîldarî kêberdê sûk di vêrgî girotê. Îsay ey rê va: “Mi dima bê!”

²⁸ Lewî zî werişt pay, heme çî herun di verada ew Îsay dima şi.

²⁹ Bahdo Lewî qandê Îsay keyedê xo di jû dahwetênda gird da. Bol tahsîldarî ew tayn merdimê bînî zî ameybî na dahwet.

³⁰ Ferîsî û alîmê xoya, ê xo mîyan di vajîyayê, înan telebandê Îsay rê va: “Şima yê çi wenê û şimenê tahsîldarana ew merdimê ki zeydê înana gunakarî yê?”

^31-32 Îsay zî înan rê wuna va: “Ez qandê merdimandê rindan nîyameya, ez qandê gunakaran ameya ki ê tewbe bikerê. Merdimê ki nêweşî nîyê, ê mehtajê tixtorî zî nîyê, êyê ki nêweşî yê, xora ê mehtajî yê.”

Mesela Roje-Tepişten

³³ Ferîsîyan û Alîmandê Kitabana fina Ey ra pers kerd: “Telebeyê Yehyay bol finî roje tepêşenê ew duay kenê, telebeyê ma zî winî kenê. Hima telebeyê to yê wenê ew şimenê!”

³⁴ Îsay înan rê wuna va: “Hendik zama yo meymanandê veyvîya pîya yo, şima şenê meymanan rê vajê, roje tepêşê?

³⁵ Xora wext nezdî yo, zamay do înan mîyan ra vejê. Wexta ê do ê rojan di roje tepêşê.”

³⁶ Îsay înan rê na mesel zî va: “Qe kes çinado newe ra lete nêcikeno ew eya çinayê kihanî pîne nêkeno, eki winî bikero se, çinayo newe zî hermîyeno ew pîneyo newe zî qe umişê kihanî nêbeno.

³⁷ Ew qe kes zî şeraba tezî meşkandê kihanan nêkeno, eki winî bikero se, şeraba tezî meşkan teqnena, wexta şerab rijyena ew meşkî zî dirryenê.

³⁸ Nê, kes do şeraba tezî dekero meşkandê newan!

³⁹ Ew qe jew merdim eki şeraba verên şimito se, ey dima newîda ci ra nêwazeno, o do vajo ‘Na verên weş a.’ ”