Lûqa 3 - Kitabo Mûqades

Pêxember Yehya Xo Keno Eşkera

¹ Wexto ki hukumdareya Qeyzer Tîberîyos serrda pancêsî mîyan di bî, Pontîyos Pîlatos welatdê Yawudîye sero hukumdarey kerdê, welatdê Celîle sero Hêrodes bi, Îtureya û Traxonîtîs sero zî birayê ci Filîpos bi, ew Abîlenî di Lîsanyasî hukumdarey kerdê.

² Serdarê kahînan zî Hanan û Qeyafasîya bî. O mihal di, lajê Zekeryay Yehya hewna gema bi, uja di Ellay veynda ey.

³ O zî hema kewt ray, şi çorşmedê rodê Şerîyay di, heme cayan ra geyra ew wahzî day, merdiman rê va: “Gunayandê xo ra tewbe bikerê ew ageyrê rayda Ellay ser. Qandê coy bêrê, waftîz bê, no do zî nişanê tewbî bo, çiki Ella do wexta gunayanê şima ef kero.”

⁴ Xora kitabdê Pêxember Yeşayay mîyan di wuna yazikerde yo: “Gema jewêno veyndano: Raya ki Reb do bîro, A ray hadre kerê, Ey rê raya duz kerê!

⁵ Hirg dere do pirr bo, Hirg kerre ew hirg deye do zî nimz bo. Rayê ki çewtî yê, ê do raştî bê, Rayê ki çal û cixûrî yê, ê do zî duzî bê.

⁶ Wexta dinya pêro do xelesnayena Ellay bivîno.”

Yehya Merdiman Veyndano Tewbe

⁷ Şêlig ameyê Yehyay hetek ki, wa o înan pey awa waftîz kero. Yehyay ê tahzîlî kerdî ew va: “Şima, ey ezbeta marrî! Kamî şima rê va, şima do ezabdê Ellay ra bireyê?

⁸ Şima qayilî yê zerrî ra tewbe bikerê se, wa girwandê şima di biaso! Şima yê xoya çalim kenê, çiki şima ezbetda Îbrahîmî ra yê, qandê coy şima vanê, qay teba şima nêbeno. Hima ez şima rê nay vaja: Nê sîyê ki tîya di, Ella şeno nê sîyan ra zî Îbrahîmî rê ezbetênda newî virazo!

⁹ Xora torzên zî nika ra neyayo kokdê darana. Dara ki mexelo rind nêdana, a do bibiryo ew çebîyo adirî mîyan.”

¹⁰ Nê merdiman Yehyay ra pers kerd: “Winî yo se, ma do se kerê?”

¹¹ Ey zî wuna va: “Di qolikê kamî estê se, merdimo ki qolika ci çinî ya, wa jûwer bido ey. Ew nanê kamî esto se, merdimo ki veyşan o, wa eya bara kero.”

¹² Tahsîldarî zî ameybî ki waftîz bê ew înan ey ra pers kerd: “Mehlîmê ma, ma do se kerê?”

¹³ Yehyay înan rê va: “Şima rê çend vajîyayo, ey ra vêşî vêrgî megîrê!”

¹⁴ Cendirman zî ey ra pers kerd va: “Ey ma do se kerê?” Ey înan rê zî wuna va: “Kesî ra perrey megîrê, ne zorana, ne zî neheqeya. Heqo ki deyeno şima, xo rê eya razî bê!”

Yehya Mesîhî Misneno Merdiman

¹⁵ Zerrîya na milet omida bî pirr ew xo bixo rê va, nêbo ki no Yehya do Mesîh bo?

¹⁶ Wexta ey heminan rê va: “Oyo ki yeno, hukmê Ey bol mi sera yo, ew ez nêercîyena ki layê xamikandê ci zî akera. Ezo şima pey awa waftîz kena, hima O do şima Rihdo Mibareka ew adira waftîz kero.

¹⁷ O do cuwenî pak kero ew simer û xelîya pê ra abirno, hewna milêbîya ci ya zî ci desta. O do xelî bero embarandê xo mîyan ew O do simerî zî adir di biveşno, adiro ki qe hewna nêşino.”

¹⁸ Yehyay hem nê qisana, hem zî qisandê bînana veyndayê milet ew mijdîyana xelesnayenî dayê înan.

¹⁹ Ew Yehyay hukumdar Hêrodes zî tahzîlî kerdê, çiki ey cenîya birardê xo, Hêrodîya girotbî ew bê ney hewna bol girweyê neheqî kerdîbî.

²⁰ Qandê nê tahzîlî, Hêrodesî Yehya eşt zîndan ew qatna neheqey ard neheqeyda xo ser.

Îsa Waftîz Beno

²¹ Wexto ki hewna Yehyay milet pêro waftîz kerdê, Îsa zî ame ew waftîz bi. Îsay duay kerdî ew a çeq di azmîn abîya,

²² Riho Mibarek zeydê bewranda sipîya ame cêr Îsay ser. Ew azmîn ra jew vengî wuna va: “Ti lajê min ê qedr ê, ez to ra razî ya.”

Ezbeta Îsay

²³ Wexto ki Îsa kewno ray, O nezdî hîris serre bi. O lajê Wûsibî zaneyayê, Wûsib zî lajê Elî bi,

²⁴ ew ezbeta eya ki şîyê tepya, nameyê înan zî nê bî: Elî lajê Mattatî bi, Mattat lajê Lewî bi, Lewî lajê Melxî bi, Melxî lajê Yannay bi, Yannay lajê Wûsibî bi,

²⁵ Wûsib lajê Mattîtyay bi, Mattîtya lajê Amosî bi, Amos lajê Nahûmî bi, Nahûm lajê Heslî bi, Heslî lajê Nagay bi,

²⁶ Nagay lajê Mehatî bi, Mehat lajê Mattîtyay bi, Mattîtya lajê Şêmeyînî bi, Şêmeyîn lajê Yosêxî bi, Yosêx lajê Yoday bi,

²⁷ Yoda lajê Yûhenanî bi, Yûhenan lajê Rêşay bi, Rêşa lajê Zerûbbabîlî bi, Zerûbbabîl lajê Şealtîyelî bi, Şealtîyel lajê Nerî bi,

²⁸ Nerî lajê Melxî bi, Melxî lajê Eddî bi, Eddî lajê Qozamî bi, Qozam lajê Êlmedamî bi, Êlmedam lajê Erî bi,

²⁹ Er lajê Yeşûy bi, Yeşû lajê Êlîyezerî bi, Êlîyezer lajê Yorîmî bi, Yorîm lajê Mattatî bi, Mattat lajê Lewî bi,

³⁰ Lewî lajê Sîmonî bi, Sîmon lajê Yawuday bi, Yawuda lajê Wûsibî bi, Wûsib lajê Yonamî bi, Yonam lajê Êlyakîmî bi,

³¹ Êlyakîm lajê Melay bi, Mela lajê Mennay bi, Menna lajê Mattatay bi, Mattata lajê Natanî bi, Natan lajê Dawidî bi,

³² Dawid lajê Îşay bi, Îşay lajê Owedî bi, Owed lajê Boazî bi, Boaz lajê Salmonî bi, Salmon lajê Nahşonî bi,

³³ Nahşon lajê Emînadabî bi, Emînadab lajê Edmînî bi, Edmîn lajê Aramî bi, Aram lajê Hesronî bi, Hesron lajê Peresî bi, Peres lajê Yawuday bi,

³⁴ Yawuda lajê Yaqûbî bi, Yaqûb lajê Îshaqî bi, Îshaq lajê Îbrahîmî bi, Îbrahîm lajê Teraxî bi, Terax lajê Nahorî bi,

³⁵ Nahor lajê Serûgî bi, Serûg lajê Reûy bi, Reû lajê Pêlêgî bi, Pêlêg lajê Eberî bi, Eber lajê Şelaxî bi,

³⁶ Şelax lajê Qeynanî bi, Qeynan lajê Arpexşadî bi, Arpexşad lajê Samî bi, Sam lajê Nûhî bi, Nûh lajê Lamexî bi,

³⁷ Lamex lajê Metûşelahî bi, Metûşelah lajê Henoxî bi, Henox lajê Yeredî bi, Yered lajê Mahalalêlî bi, Mahalalêl lajê Qeynanî bi,

³⁸ Qeynan lajê Enoşî bi, Enoş lajê Sêtî bi, Sêt lajê Ademî bi ew Adem êdê Ellay bi.