Lûqa 24 - Kitabo Mûqades

Îsa Merg Ra Werzeno

¹ Şabatî dima, roja siftî di, nê cenî şefaqe rew weriştîbî. Înan ruwenê boyda weşo ki kerdbi hadre, o zî girot û şî mezelî ser.

² Hima înan dî ki sî mezelî fek ra leyrî bîya.

³ Ew ê şî mezelî mîyan ew dî ki meyitê Reb Îsay uja di çinî yo,

⁴ ê winî ecêb ew şaş mendîbî. A çeq di, çinadê berqîyayî mîyan di, di teney camêrdî finê ra înan ver di vijyay.

⁵ Nê cenî tersay û sereyê xo na xo ver. Wexta ê di camêrdan înan rê va: “Oyo ki weş o, çiçî rê şima yê merdan mîyan di geyrenê Ey?

⁶ O tîya di nîyo, O merg ra werişt. Bîyarê xo vîrî ki Ey şima rê se vatbi, wexto ki O hewna Celîle di bi.

⁷ Ey vatbi ki ‘Gerek Lajê Însanî do gunakaran dest deyo, O do xaça dardi bo ew roja hîrin do merg ra werzo.’ ”

⁸ Cenikan wexta qiseyê Îsay ardî xo vîrî.

⁹ Ew ê mezel ra peyser ageyray sûk û nê girweyê ecêbî jewndes wekîlan rê ew ê bînan rê vatî.

¹⁰ Cenîyê ki wekîlan rê nê girwey vatîbî, ê Meyrema Mecdelij bî, Yohanna bî, maya Yaqûbî Meyrem bî ew ê cenîyê bînê ki nînana pîya bî.

¹¹ Hima nê qisey wekîlan rê zey istanik amey ew înan emel nêkerd.

¹² Naqor Petrûs werişt û vazda şi mezelî ser, xo namit ew weyna mezelî mîyan ki bê kefenî teba çinî yo. O uja ra abirya û şi, nê girwî rê ecêb mendbi.

Di Telebey ê Rayda Emmaûsî Di

¹³ Roja ki nê girwey bîbî, di telebeyê Îsay kewtî ray û şîyê hetê jû dewa. Na dew, nezdî di sehata Yeruşalîm ra dûrî bî ew nameyê na dew Emmaûs bî.

¹⁴ Ray ra, girweyê ki a roj bîbî, înan mîyabeyndê xo di qalê înan kerdê.

¹⁵ Ew çeqa ki înan nê qisey wuna vatê, Îsa bixo ame înan hetek û înana pîya ray ra şi.

¹⁶ Hima çimê înan girêdeyay bî ki ê Îsay nêsilasnê.

¹⁷ Îsay înan rê va: “Şima yê wuna xo mîyabeyn di ray ra qalê çiçî kenê?” Ê qahrîyay û herunda xo di vinderdî.

¹⁸ Ew nînan ra, oyo ki nameyê ci Kileopas o, ey Îsay rê va: “Yeruşalîmî mîyan di, girweyê ki nê rojan di bîyê, pêro pey hesîyay, ti tenya pey nêhesîyayê.”

¹⁹ Îsay va: “Çi girwey bîyê?” Înan zî va: “Girweyê ki amey Îsadê Nasirayijî sered'. O Ellay ew milet ver di, hem girwandê xoya hem zî qisandê xoya pêxemberêndo gird bi.

²⁰ Serdaranê kahînandê ma ew pîlanê ma mergê ey waşt ew va, Ey xaça dardi kerê.

²¹ Hima ma omid kerdê ki merdimo ki do Îsraîlî bireyno, no O bi! Ew ewro roja hîrin a ki nê girwey heme bîyê.

²² Ew mîyabeyndê ma ra tayn cenîyan zî ma vistî teşqele. Ê şefaqe rew werzenê şinê mezeldê Îsay ser ki

²³ meyitê ey uja di nîyo, peyser yenê ew vanê ‘Tayn melekî ma ra asay û va, Îsa weş o.’

²⁴ Nay sera mîyabeyndê ma ra çend merdimî şinê mezel ki cenîyan senî vato, winî yo, ew Ey uja di nêvînenê.”

²⁵ Wexta Îsay wuna va: “Şima hendayê bêfahmî yê! Ew qiseyê ki pêxemberan kerdê, zerrîya şima ê qisan rê çend çetin emel kena!

²⁶ Xora winî gerek nêbi ki Mesîhî do no ezîyet biantayê ew bahdo bişîyayê hekmetda Ellay?”

²⁷ Ew Îsay, Mûsay ra heta ê pêxemberandê bînan ra ew Mibarek Qisandê Ellay pêrin mîyan di, kotî di qalê Ey bîyo, Ey ê qisey heme înan rê kerdî eşkera.

²⁸ No hesaba dewa ki ê şîyê, resay a dew. Îsay winî kerd ki zeki qayil bi hewna tenekna dûrî şiro.

²⁹ Hima înan nêverda ew Ey ra reca kerd va: “Maya pîya biman! Xora şan o, roj o zî keno şiro awar.” Wexta Îsa şi keye ki înana pîya bimano.

³⁰ Bahdo, senî O înana pîya sifre di ronişt, Ey nan girot, Ellay rê şukur kerd, nan kerd bara ew da înan.

³¹ Wexta çimê înan abîyay, înan O silasna ew jû find' O çimandê înan vera bi vinî.

³² Ew înan pêjewbînan rê va: “Wexto ki ma ray ra Eya pîya bî ew Ey Qiseyê Mibarekî ma rê kerdî eşkera, wexta zerrîya ma kêfa ra weş nêbî?”

³³ Ew a sehat di, ê wirna weriştî pay ew ageyray Yeruşalîm. Uja di înan jewndes wekîlî ew êyê ki înana pîya bî, ê pêro pîya dî

³⁴ ew înan rê va: “Reb raşta merg ra werişto ew Sîmon Petrûsî ra zî asayo.”

³⁵ Ew nê wirna zî ray ra se bîyo ew wexto ki Îsay nan bara kerdo înan, O senî silasnayo, heme çî înan rê va.

Îsa Telebandê Xo Hemin Ra Aseno

³⁶ Hewna înan nê qisey kerdê ki Îsa bixo ame înan mîyan ew va: “Şima rê silametey bo!”

³⁷ Naqor ê ters ra bî wişkî, çiki înan va, qay ê yê rihê merdî vînenê.

³⁸ Ew Ey înan rê va: “Çiçî rê şima yê hendayê tersenê ew senî wuna şîfe kewno şima zerrî?

³⁹ Bewnîrê destandê mi ra ew lingandê mi ra, raşta ez bixo ya! Destê xo mina nê ew bivînê, çiki jew rihî di goşt û estîya nêbenê ew zeki şima yê vînenê, mi di ê estê.”

⁴⁰ Bahdê nê qisana, ey dest û lingê xo misnay înan.

⁴¹ Naqor înan kêf ra hewna emel nêkerdê ew winî ecêb mendîbî, wexta Ey înan rê va: “Şima di tebayê werdî esto?”

⁴² Înan jew lete maseyo sûrkerde da Ey.

⁴³ Ew Ey çimandê înan ver di o girot û werd.

⁴⁴ Bahdo Ey înan rê va: “Wexto ki hewna ez şima hetek di bîya, mi şima rê wuna vatbi, ‘Qanûndê Mûsay di, qisandê pêxemberan û Mezmûran mîyan di, qandê mi çiçî yazi bîyo se, ê qisey pêro gerek bîrê ca.’ ”

⁴⁵ Uja di Ey fahmê înan akerd ki ê Qisanê Mibarekan fahm bikerê,

⁴⁶ înan rê va: “Xora wuna yazikerde yo: Mesîh do ezîyet banco, bimiro ew roja hîrin O do merg ra werzo.

⁴⁷ Namedê Mesîhîya wahzî do bideyê, merdimî do veyndeyê tewbe winî ki gunayê înan ef bê. Nê wahzî do Yeruşalîm ra sifte bikerê ew qewmandê bînan pêrin mîyabeyn di bideyê.

⁴⁸ Şima şahîdê nê girwan hemin ê.

⁴⁹ Ew ez do, zeki Pêrê mi wahd kerdo, şima rê cordê coran ra hukum birişa. Hima şima na sûk di bipawê ki hetanî şima no hukma pirrî bê.”

Îsa Çimandê Pêrinan Ver Di Vijyeno Azmîn

⁵⁰ Îsay telebeyê xo berdî teberdê sûk, hetanî nezdidê Beytanya ew Ey destê xo hewaday û ê mibarek kerdî.

⁵¹ Senî ki Ey ê mibarek kerdî, înan hetek ra abirya û Ellay O girot azmînî ser.

⁵² Înan Ey rê secde kerd ew kêfêndo girda ageyray Yeruşalîm.

⁵³ Ê tim û tim Keyedê Ellay di bî ew înan Ellay rê hemd û şukur kerdê.