Lûqa 23 - Kitabo Mûqades

Îsay Anê Walî Pîlatosî Ver

¹ No meclîs pêro werişt ew Îsa girot û berd walîdê Pîlatosî hetek.

² Înan gerreyê ey kerd ew va: “Ma rind zanê ki no merdim o qewmê ma ray ser fîneno ew nêverdano ki ê vêrgî bidê Qeyzerî. Ew xo bixo rê zî vano: ‘Ez Mesîh a, yanê ez jew qiral a.’ ”

³ Hima Pîlatosî Îsay ra pers kerd va: “Ti qiralê Yawudîyan ê?” Îsay zî va: “Zeki tî yê vanê, winî yo.”

⁴ Nay sera, Pîlatosî serdarandê kahînan rê ew şêligî rê wuna va: “Ezo nê merdimî di sucê nêvînena.”

⁵ Hima înan vera eksey kerd û wuna va: “No yo heme cadê Yawudîye di fikrê xo keno vila ew qewmî ray ser fîneno, O Celîle ra kewt ray û heta tîya fikrê xo kerd vila.”

Îsay Rişenê Hêrodesî Hetek

⁶ Senî ki Pîlatosî no aşnawit, va: “No merdim Celîle ra yo?”

⁷ Senî ki o pey hesya no merdim o hukumdareyda Hêrodesî bin di, wexta O rişt Hêrodesî hetek, çiki ê rojan di Hêrodes zî Yeruşalîm di mendê.

⁸ Hêrodesî senî ki Îsa dî, bol kêf kerd. Çiki ey girwandê Îsay ra bol aşnawitbi, qandê coy o rewna qayil bi ki Îsaya bîro pê hetek ew hekmetênda Îsay xo çimîya bivîno.

⁹ Hêrodesî Îsay ra bol qisey pers kerdî, hima Ey qe ciwab nêda.

¹⁰ Serdarê kahînan û Alîmê Kitabanê ki uja di bî, bol gerreyê ey kerdê.

¹¹ Hêrodes zî cendirmandê xoya pîya Ey huwa, ebayênda bol weş dê pira ew fina peyser rişt Pîlatosî hetek.

¹² Hetanî wexta Hêrodes û Pîlatosîya dişmenê pê bî, hima a roj tepya ra, ê bî embazê pê.

Qerarê Pîlatosî

¹³ Hima Pîlatosî serdarê kahînan, pîlê qewmî ew şêlig arêda pêser û înan rê wuna va:

¹⁴ “Şima no merdim ard mi hetek ew şima va: ‘O yo nê qewmî ray ser fîneno.’ Naqor mi çimandê şima ver di Ey ra pers kerd ew zeki şima gerreyê ey kerdê, mi nê merdimî di qe sucêndo winî nêdî.

¹⁵ Yanê, Hêrodesî zî Ey di sucê nêdî ki fina O peyser rişt ma rê. Bewnîrê, Ey tebayêndo xirab nêkerdo ki mergî heq kero.

^16-17 Ay ra ez do Ey kotegîkerden da ew verada.”

¹⁸ Wexta pêro pê fekî ra qîray û va: “Nê merdimî werte ra vinî ki! Ma rê Barabasî serbest veradi!”

¹⁹ Barabas zî, wexto ki sûk mîyan di vera hukmatî sere-hewadabi, o zî ê merdimana pîya bi, ew ey zî jewna merdim kiştbi, qandê coy kewtbi hepis.

²⁰ Pîlatos qayil bi Îsay verado, qandê coy ey qeyret kerd ki şêliga fina qisey bikero.

²¹ Hima ê qîray û wuna va: “Ey xaça dardi ki! Ey xaça dardi ki!”

²² Naqor Pîlatosî fina hîrin înan rê va: “Nê merdimî çi xirabîn kerda? Mi Ney di qe sucê nêdî ki no mergî heq kero. Ay ra ez do Ey kotegîkerden da ew verada.”

²³ Hima înan eksey kerd ew hukma qîray ki Îsa xaça dardi bo. Soyin di, vengê înan hukum kerd.

²⁴ Ew Pîlatosî qerar da ki meramê înan bîyaro ca.

²⁵ O merdimo ki înan waştê veradeyo, oyo ki hukmatî vero sere-hewadabi ew merdim kiştbi, Pîlatos o merdim hepis ra verada. Noqor Îsa zî meramdê înan rê kerd qurban.

Îsay Benê Ki Xaça Dardi Kerê

²⁶ Wexto ki cendirman Îsa berdê teberdê sûk, jew merdim gem ra raştê înan ame, nameyê ey Sîmon bi ew o Kîrene ra bi. Înan o tepişt ew xaçê Îsay na doşîda ey ser ki o ey wegîro ew Îsay dima şiro.

²⁷ Şêligêndo gird Îsay dima şîyê. Înan mîyan di bol cenîyan dayê xo ro ew Ey rê lorî kerdê, bermayê.

²⁸ Hima Îsa ageyra ew înan rê wuna va: “Şima, keyneyê Yeruşalîmî, qandê mi mebermê! Şima xo rê qandê xo û qeçandê xo bibermê!

²⁹ Çiki winî rojî yê yenê ki ê do vajê: ‘Werrekê ê cenîyê ki ocaxkorî yê, rehîmê ci qe qeç dinya nîyardo ew pistinê ci nêlawneyayê.’

³⁰ Ê do wexta koyan rê vajê: ‘Ma sero gunê!’ Ew kerran rê zî vajê: ‘Serê ma bigîrê!’

³¹ Eki darda terrn rê wuna bikerê, wexta darda wişk rê do se kerê?”

Îsay Dardi Kenê

³² Îsaya pîya dîna merdimê mahkûmî berdê ki înan zî xaça dardi kerê.

³³ Wexto ki ê amey cayo ki ci rê vanê Qafika Serî, uja di înan Îsa pey mêxana xaçî kerd ew ê wirna mahkûmî zî, jewê ci kişta raşt di, jewê ci zî kişta çep di mêxî kerdî.

³⁴ Îsay qandê cendirman duay kerdî, va: “Pîyê mi, înan ef ki, çiki ê yê nêzanê ê yê se kenê!” Ew cendirman çinadê ey sero peşk çekerd û mîyabeyndê xo di kerd bara.

³⁵ Ew şêlig pêro, uja di vinderde bi ew temaşeyê înan kerdê. Naqor serdarî zî Îsay huwayê ew vatê: “Ey ê bînî reynay, eki O raşta Mesîh o ew Ellay O weçînayo, de newe zî wa xo bireyno!”

³⁶ Cendirmey zî şî Îsay hetek ew huway Ey, siska tirş dê Ey û Ey rê va:

³⁷ “Eki ti raşta Qiralê Yawudîyan ê se, de xo bireyn!”

³⁸ Seredê Îsay sera zî jew texte dardi bi, eya wuna yazi kerdbi: NO QIRALÊ YAWUDÎYAN O

³⁹ Nê suclîyê ki Îsaya pîya xaça dardi bîbî, înan ra jewê ci Îsay rê nengî çinay ew wuna va: “Ti Mesîh nîyê? De xo bixo zî bireyn, ma zî bireyn!”

⁴⁰ Wexta o suclîyo bîn qahrîya ey ra, va: “Ti qe Ellay ra nêtersenê? Tî yê zî zeydê maya ezab ancenê.

⁴¹ Qenê min û toya, ma no ceza kerdo heq ew ma yê cerîmeyê sucandê xo ancenê, hima Ney qe tebayêndo xirab nêkerdo ki.”

⁴² Bahdo ageyra Îsay ew Ey rê va: “Ya Îsa, wexto ki ti amey Hukumdareyda xo, boka ti mi bîyarî xo vîrî!”

⁴³ Îsay zî ey rê wuna va: “Ez to rê raşta ci vaja, ti do ewro mina pîya cinetid' bê.”

Mergê Îsay

^44-45 Wextê dihîr, sehat des û didi di, tîjî roşnayîya xo kerd vinî. Dihîr ra hetanî sehat hîrê, serê welatî heme bi tari. Ew perdeyo ki Keyedê Ellay di bi, werte ra bi di letey.

⁴⁶ Îsay venga veynda û va: “Pîyê mi, ezo rihê xo teslîmê to kena!” Bahdê nê qisana Ey gan da.

⁴⁷ Hima yizbaşî senî ki nê girwey pêro çimandê xoya dî, ey Ellay rê hemd û şukur kerd ew va: “Heqeta zî no merdim merdimêndo raşt bi.”

⁴⁸ Êyê ki uja di arêbîyaybî pêser, şêligî pêroy senî ki nê girwey dî, înan day xo sêne ro ew ageyray keyandê xo.

⁴⁹ Hima silasnayeyê Îsay ew cenîyê ki Celîle di sifte ra Ey dima şîyê, ê heme tayn dûrî vinderdîbî ew temaşeyê girwan kerdî.

Mezelkerdena Îsay

⁵⁰ Meclîsî mîyan di jew mêrdek bi ew nameyê ey Wûsib bi, no merdimêndo rind ew rayda Ellay di bi.

⁵¹ Wûsib sûka Arîmatya ra bi ew na sûka êdê Yawudîyan bî. Ey Hukumdareya Ellay pawitê ew ey qerarê Meclîsî qebul nêkerdbi.

⁵² No şi Pîlatosî hetek, ey ra reca kerd ew meyitê Îsay waşt.

⁵³ Bahdo ey meyit xaç ra rona, pişt kefen ra ew mezelî mîyan di rona. No mezel kerrî mîyan di viraşte bi ew hewna kes nê mezelî mîyan nêkerdbi.

⁵⁴ A roj, roja ki milet qandê Şabatî hadrey kerdê, a roj bî ew bol tayn mendibi ki Rojda Şabatî kewê.

⁵⁵ Cenîyê ki Celîle ra Îsaya pîya ameybî, ê zî Wûsibî dima şî. Înan mezel dî ew weynay meyitê Îsay uja di senî ronayo.

⁵⁶ Bahdo ê ageyray keyandê xo ew ruwen û vaşo ki boya ci weş a, o kerd hadre. Ew Roja Şabatî, Ellay senî emir dayo se, qe kesî karê nêkerdê.