Lûqa 22 - Kitabo Mûqades

Bêbexteya Yawuday

¹ Roşanê Nandê Bêmîrazîyo ki nameyê ci Pesax o, amebi nezdi.

² Serdarê kahînan û Alîmê Kitaban geyrayê rayê bivînê ki hele Îsay senî bikişê, çiki ê milet ra tersayê.

³ Wexta Şeytan kewt Yawuda Îsqaryotî mîyan, no diwês wekîlandê Îsay ra jewê ci bi.

⁴ Yawuda şi serdarandê kahînan û yizbaşîyan hetek ew înana qisey kerdî ki çi hesaba o do Îsay bido înan dest.

⁵ Înan kêf kerd ew qebul kerd ki perrey bidê ey.

⁶ Yawuday zî qebul kerd ew hinî geyrayê firsen ki cayêndo xewlet di Îsay bido înan dest.

Nanê Rojda Pesaxî

⁷ Roja Roşandê Nandê Bêmîrazî amê. Na roj di, gerek merdimî kavirê Pesaxî qurban kerdayê.

⁸ Îsay, Petrûs û Yûhannaya vernî di riştî sûk ew înan rê va: “Şima verî şirê ew ma rê nanê Pesaxî hadre kerê.”

⁹ Hima înan Ey ra pers kerd va: “Ti qayil ê ma kotî di nan hadre kem?”

¹⁰ Ey zî wuna va: “Şima ki resayê sûk mîyan, jew mêrdeko ki dorîyê aw wegiroto, şima do ey bivînê, o şiro kamcî keye se, heta o keye ey dima şirê.

¹¹ Bahdo wihêrdê ê keyî ra pers kerê ew vajê: ‘Mehlîm o vano, cayê meymanan kotî yo? Min û telebandê xoya do nanê Pesaxî uja di bûmi.’

¹² Wihêrê keyî do qatê corî di jew odeyêndo gird o weş şima misno, uja di şima nanî hadre kerê.”

¹³ Nê wirna telebey zî şî, heme çî zeki Îsay înan rê vatbi winî dî ew uja di nanê Pesaxî kerd hadre.

¹⁴ Wextê nanî ame ew Îsa wekîlandê xoya pîya sifre di ronişt.

¹⁵ Ey înan rê wuna va: “Hendik mi ezîyet nîyanto, ez bol qayil bîya nê nanê Pesaxî şimaya pîya bûra.

¹⁶ Ezo şima rê vana: Ez do hinî nanê Pesaxî fina nêwera hetanî Hukumdareyda Ellay di mahneyê Pesaxî bîro herun.”

¹⁷ Bahdo Ey tasa şerabî girot, Ellay rê şukur kerd ew înan rê va: “Na tas bigîrê ew xo mîyabeyn di bara kerê.

¹⁸ Ezo şima rê vana, hendik Hukumdareya Ellay nîyameya, ez do fina awda engûr ra nêşima.”

¹⁹ Bahdo Ey nan girot, Ellay rê şukur kerd ew kerd letey û da înan ew va: “No nan bedenê min o, bedenê mino ki deyayo oxirdê şima. Ney wuna bikerê û mi bîyarê xo vîrî!”

²⁰ Bahdê nandê şanî Ey tasa şerabî zî zeydê nanî girot û wuna va: “Na tas zî Qewlo Newe yo ew gûnîda mina mor beno, gûnîya mina ki oxirdê şima di do birijyo.

²¹ Naqor merdimo ki do mi rê bêbextey bikero, o yo mina pîya tîya sifre di ronişte yo.

²² Xora Lajê Însanî, raya ki belikerdî ya, O yo a ray ra şino, hima merdimo ki Ey rê bêbextey keno, wax bi ey rê!”

²³ Wexta wekîlan pêjewbînan rê va: “Ma mîyan di kam şeno na bêbextey bikero?”

Kam Gird o?

²⁴ Ew ê mîyabeyndê xo di pê vero şîyê ki înan ra kamcî do heminan sera bihesibyo.

²⁵ Hima Îsay înan rê wuna va: “Padîşayê nê dinyay qewmandê xo sero hukum kenê ew serdarê înan xeyrwer vajîyenê.

²⁶ Hima şima do wuna nêbê! Herunda ney di, şima ra kam gird o, wa o zeydê werdî bo, ew kamo ki serdarey keno, wa o zî zeydê xizimkarî bo.

²⁷ Vajê, kam gird o? Oyo ki sifre di roşeno, yazî oyo ki xizimkarey keno? Merdimo ki sifre di roşeno, o gird o, winî nîya? Hima ez zî şima mîyan di zeydê jew xizimkarîya ya.

²⁸ Ew şima zî, çi wext ki ez kewta teng, şima mina pîya damiş bîyê.

²⁹ Ay ra Hukumdareya ki Pêrê mi daya mi, ezo zî a Hukumdarey dana şima ki

³⁰ sifredê mi di ew Hukumdareyda mi di, şima do mina pîya bûrê û bişimê. Ew şima do textî sero roşê ew diwês ezbetandê Îsraîlî rê hukumdarey bikerê.”

Qiseyê Ki Îsa Telebandê Xo Rê Soyin Di Vano

³¹ Îsay va: “Sîmon, Sîmon, çimakerde bi, Şeytanî îzin giroto ki, wa şima zeydê xelîya pirojin ro do.

³² Hima mi qandê to duay kerdî ki ti îmanê xo vinî nêkerê, ew çimhal ki ti amey ray ser, wexta biraranê xo zî îman di pêt ki!”

³³ Hima Petrûsî Îsay rê wuna va: “Ya Rebbî, ez hadre ya toya pîya şira zîndan zî, merg zî.”

³⁴ Îsay zî ey rê wuna va: “Petrûs, ez to rê vaja, emşo hendik dîkî nêveyndayo, ti do hîrê finî mi înkar kerê ki tî yê mi nêsilasnenê.”

³⁵ Bahdo Îsay înan ra pers kerd va: “Wexto ki mi şima bê perran, bê pûl, veyşan teyşan ew bê postalî riştê ray se, wexta qe kemaneya şima bî?” Înan zî va: “Nê, qethîna çîyêndê ma kemî nêbî.”

³⁶ Wexta Îsay va: “Naqor neya tepya, cizdanê kamî ew tewreyê kamî esto se, wa bigîro xo hetek. Ew şemşêrî kamî çinî yo se, wa ebaya xo biroşo ew perrandê aya xo rê jew şemşêr bigîro.

³⁷ Çiki qandê mi senî yazi bîyo, o do bîro ca: ‘O mahkûmana jew hesibîya.’ Ew ezo şima rê vana, hirg qiseyo ki qandê mi yazi bîyo, gerek bîro ca.”

³⁸ Teleban va: “Ya Rebbî, tîya di, di teney şemşêrî estê.” Hima Îsay înan rê va: “Hend bes o!”

Kerredê Zeytûnan Di Şewa Soyinî

³⁹ Bahdo Îsa sûk ra vijya ew zeydê hirg fina, şi Kerredê Zeytûnan. Hima telebey zî Ey dima bî.

⁴⁰ Wexto ki Îsa resa uja, înan rê va: “Duay bikerê ki wextê cerbinayen di şima nêxapeyê!”

⁴¹ Bahdo Îsa teleban ra tenekê kewt dûrî ew saqandê xo sero ronişt û duay kerdî:

⁴² “Pîyê mi, eki ti zî qayil ê, na tasa tal mi ra dûrî fîn. Fina zî wa meramê mi nê, wa meramê to bîro herun!”

⁴³ A çeq di, azmîn ra jew melekî xo misna Ey ew dayax dê Ey.

⁴⁴ Tew amê Ey ser ew Ey deha vêşî duay kerdî. Ariqê ci zeydê çilkda gûnîya kewtê erdî ser.

⁴⁵ Wexto ki Îsa duay ra werişt û ame telebandê xo hetek, ê mixulan ra şîbî hewna.

⁴⁶ Ey înan rê va: “Çi şima rakewtê? Werzê ew duay bikerê ki şima nêxapeyê!”

Îsa Tepêşyeno

⁴⁷ Îsay hewna qisey kerdê ki jû find' şêligêndo bol vera înan ame. Vernî di Yawuda bi, o zî diwês wekîlandê Îsay ra jewê ci bi, ew o şi hetê Îsaya ki lew Eya no.

⁴⁸ Hima Îsay ey rê wuna va: “Yawuda, tî yê Lajê Însanî jew lewa danê dest?”

⁴⁹ Naqor êyê ki Îsay hetek di bî, senî ki fahm kerd milet qandê çiçî ameya, înan Îsay rê va: “Rebbî, şemşêra piro dim?”

⁵⁰ Ew a çeq di înan ra jewê ci şi şemşêrdê xoya da xizimkardê serdardê kahînan ro û goşê ci yo raşt cikerd.

⁵¹ Hima Îsay va: “Vinderê! Bes o!” Ew Îsay destê xo na goşdê xizimkarî ser û goşê ci kerd weş.

⁵² Bahdo Îsay serdarandê kahînan rê ew êyê ki Keyedê Ellay di nobet pawenê, serdarandê înan rê ew pîlandê ci rê, êyê ki heme ameybî, Îsay înan rê wuna va: “Şima çi wuna şemşêr û çuwana ameyê? Zeki şima jew mahkûmî dim kewê.

⁵³ Ez xora hirg roj şimaya pîya Keyedê Ellay di bîya ew şima destê xo mina nêna. Hima na sehata şima ya, yanê sehata hukumdê tarî ya.”

Petrûs Îsay Înkar Keno

⁵⁴ Înan Îsa tepişt ew girot berd keyedê serdardê kahînan. Petrûs zî dûrî ra înan dima şîyê.

⁵⁵ Wertedê hewşî di adir wekerde bi ew ê çorşmedê ci di roniştey bî. Petrûs zî ame û înan hetek di ronişt.

⁵⁶ Uja di jû xizimkar roşneyda adirî di senî ki Petrûs dî, o silasna, ay va: “No zî Eya pîya bi!”

⁵⁷ Hima Petrûsî înkar kerd, va: “Cenî, ez Ey nêsilasnena!”

⁵⁸ Bahdê gamekna, jewnay o silasna ew va: “Ti zî înan ra yê!” Hima Petrûsî va: “Nê merdim, ez înan ra nîya!”

⁵⁹ Nezdî jû sehata tepya, fina jewnay va: “Eynî raşt a, no zî înana pîya bi, çiki no zî Celîleyij o!”

⁶⁰ Naqor Petrûsî wuna va: “Merdim, ezo nêzana tî yê qalê çiçî kenê.” Ew a çeq di hewna Petrûsî qisey kerdê, dîkî veynda.

⁶¹ Wexta Rebbî xo pey di açarna û weyna Petrûsî ra, ew a çeq di qiseyê Rebbî amey Petrûsî vîrî: “Emşo hendik dîkî nêveyndayo, ti do hîrê finî mi înkar kerê.”

⁶² Petrûs uja ra şi teber ew zerrî ra berma.

⁶³ Naqor camêrdê ki Îsa pawitê, huwayê Îsay ew dayê Ey ro.

⁶⁴ Înan rîyê ey pişt ew Ey ra pers kerd va: “Nek ti pêxember ê, de vaj, newe kamî day to ro?”

⁶⁵ Bê nînan hewna înan Ey rê bol nengî zî çînay.

Îsa yo Meclîsdê Yawudîyan Ver Di

⁶⁶ Senî ki roj akewt, pîlê qewmdê Yawudîyan, serdarê kahînan ew Alîmê Kitaban arêbîyay pêser ew Îsa zî ard nê meclîsdê înan ver.

⁶⁷ Înan Ey rê va: “Ti Mesîh ê? Eki winî yo, ma rê vaj!” Ey zî va: “Eki ez şima rê vaja, şima xora emel nêkenê,

⁶⁸ ew ez şima ra qiseyê pers kera, şima ciwab nêdanê.

⁶⁹ Hima hinî neya tepya, Ellayo ki heme çî sera yo, Lajê Însanî do kişta Eya raştî di roşo.”

⁷⁰ Wexta pêrin va: “Winî yo se, ti Lajê Ellay ê?” Ey înan rê wuna va: “Zeki şima va, ez O ya.”

⁷¹ Înan va: “Hinî ma rê şahîdey çi îcab kena? Xora ma bixo fekdê ey ra aşnawit!”