Lûqa 21 - Kitabo Mûqades

Sedqeyê Cenîyerda Vîya

¹ Îsa weyna û dî ki merdimê zengînî yê sedqeyê xo dekenê qutîda sedqî mîyan.

² Hima Ey jûna cenîyeka vîya fiqarî dî ew ay zî di quruşê baqirinî dekerdî qutî mîyan.

³ Uja di Îsay va: “Ez şima rê raşta ci vaja: Na fiqarîya vîya, ê bînan heminan ra vêşî day.

⁴ Çiki înan hemin, oyo ki zengîneyda ci ra vêşî maneno, tayn ey ra da. Naqor nay, qandê werdî çiçî yo nay dest di, ay o pêro da.”

Îsa Qalê Soyindê Nê Dinyay Keno

⁵ Tayn merdiman kêfa qalê Keyedê Ellay kerdê, çiki Keyeyê Ellay bol sîyandê weşana viraşte bi ew pey sêmina nexşî kerde bi.

⁶ Wexta Îsay wuna va: “Winî rojî do bîrê ki wexta no heme çîyo ki şima yê vînenê, nînan ra sî sîyer sero do nêmano, no pêro do xirabe bo.”

⁷ Înan zî pers kerd va: “Mehlîmê ma, nê girwey do çimhal bibê? Ew ma do çiçî ra bizanim ki wextê ci yo nê girwey do bibê?”

⁸ Îsay înan rê va: “Çimakerdey bê ki wa şima nêxapeynê. Çiki bolî do namedê mina bîrê ew vajê ‘Ez Mesîh a!’ Ew ê do vajê ‘Wext nezdî yo!’ Qethîna înan dima meşirê!

⁹ Çimhal ki şima aşnawenê herb o beno ew milet qarşî milet werzenê xo ser, xo pê şanê, wexta metersê! Verdê soyindê nê dinyay nê çî do bibê, hima fina zî soyin hewna nezdi nîyo.”

¹⁰ Bahdo Ey înan rê wuna va: “Jew qewm do jewna qewmîya ew jû hukumdarey do zî jûna hukumdareya herb bikero.

¹¹ Zelzeleyê girdî do bibê ew ca bi ca qitlixey, nêweşîn ew girweyê ecêbî do bibê ew azmîna zî hekmetê girdî do bibê.”

¹² “Hima verdê nê girwan hemin, ê do şima tepêşê ew şima rê zilim bikerê ew do şima berê mahkemada sînagogan ver ew çekerê hepis. Qandê namedê mi, ê do şima berê walîyan û qiralan ver.

¹³ Nê girwey do bîrê şima sere ki şima rê firsen bivijyo ew na mijdîyan rê şima şahîdîn bikerê.

¹⁴ Şima qethîna qaxu megîrê ki şima do se vajê ew senî xo bireynê.

¹⁵ Çiki ez do bixo winî hîkmet bida şima ki fekdê şima ra tayn qisey do bivejîyê ki hinî dişmenê şima do nêzanê se vajê ew nêşê şima vero vinderê.

¹⁶ Hima may û pîyê şima, war û birarê şima, merdim û embazê şima zî do şima bidê dest ew do şima ra tayin bikişê.

¹⁷ Qandê namedê mi, heme merdimî do şima rê dişmenî bê.

¹⁸ Hima fina zî, seredê şima ra jû têla porrî bile do vinî nêbo.

¹⁹ Damiş bê, wexta şima do ganê xo bireynê!”

Soyinê Yeruşalîmî

²⁰ “Çimhal ki şima weynenê çorçorşmeyê Yeruşalîmî dişmenan giroto, wexta bizanê ki na sûk do nezdi ra xirabî bo.

²¹ Wexta kamo ki Yawudîye di, wa biremo kerran ser. Êyê ki sûk mîyan di, wa bivijyê teberdê sûk ew êyê ki gema, wa nîyageyrê sûk mîyan.

²² Çiki ê rojî, rojê xişmî yê ew zeki Qisandê Mibarekan di yazi bîyo, o heme çî do bîro herun.

²³ Cenîyê ki ê rojan di winî halî yê ew êyê ki qeç lawnenê, wax bi înan rê! Çiki jew tengêndo gird do bîro welatî ser ew xişmê Ellay do bîro nê qewmî ser.

²⁴ Ê do şemşêrdo tuja bikişyê ew ê do sirgûnan di heme qewman rê bindestî bê. Naqor, Yeruşalîm zî do lingandê xerîban bin di pay bo, hetanî wextê nê miletandê xerîban pirr bo.”

Soyin Di Îsa Do Fina Bîro

²⁵ “Tîjî di, aşmî di ew istaran di nişanî do biasê, ew qewmê ki erdî sero yê, ê do ecêb bimanê, vengdê delxan û gumîda dengizî ra zahrê înan do ters ra biteqê.

²⁶ Merdimê ki nê felaketanê girdan pawenê, felaketîyê ki hewna do bîrê nê dinyay pêroy ser, xewf do merdiman pîze kewo, çiki hukmê ki azmîna yê, ê do herun ra biluwê.

²⁷ Ew bahdo ê do bewnîyê ki Lajê Însanî yo hekmetda girda ew nûrî mîyan di hewrî sero yeno.

²⁸ Hima çimhal ki nê girwey benê, wexta şima zerrî bigîrê, werzê ew seranê xo zî hewadê cor, winî bizanê ki reyayişê şima nezdî yo!”

²⁹ Bahdo Îsay înan rê va: “Bewnîrê na darda encîlan ra, yazî jûna dar ra.

³⁰ Eki şima vînenê ki perrî akerdê, wexta şima bixo zanê ki amnan nezdî yo.

³¹ Zeydê neya, çimhal ki şima dî ki nê girwey ê benê, wexta bizanê ki Hukumdareya Ellay nezdî ya.

³² Ez şima rê raşta ci vaja, hetanî nê girwey pêro nîrê herun, no cisn do vinî nêbo.

³³ Ew azmîn û erdîya do werte ra hewadeyê, hima qiseyê mi do qethîna do vinî nêbê.”

³⁴ “Hima, xo bipawê! Wa zerrîya şima çimveyşaneya, serxoşeya ew qaxudê hirg rojîya kor nêbo, winî ki na roj zeydê feqa jû find' şima sero nêguno.

³⁵ Çiki na roj, êyê ki na herr sero yê, do bîro înan heminan ser.

³⁶ Tim û tim çimakerdey bê ew duay bikerê ki şima damiş bê ki şima nê girwan ra bivijyê ew şima bişê Lajdê Însanî ver di pay vinderê.”

³⁷ Îsay rojdihîr Keyedê Ellay di wahzî dayê, naqor şew zî şîyê Kerredê Zeytûnan di kerdê şewra.

³⁸ Milet pêro şefaqe rew ameyê Keyedê Ellay ki goştareya ey bikerê.