Lûqa 20 - Kitabo Mûqades

Hukmê Îsay

¹ Rojê, wexto ki Îsay Keyedê Ellay di wahzî dayê ew mijdîyana Hukumdareyda Ellay milet rê vatê, tayn serê kahînan, Alîmê Kitaban ew Pîlê Yawudîyan amey uja

² ew înan Îsay rê va: “Ma rê vaj, kamcî hukma tî yê nê girwan kenê? No hukum kamî dayo to?”

³ Îsay zî înan rê wuna va: “Ezo şima ra pers kena, vajê mi rê,

⁴ Yehyay îzindê kamîya waftîz kerdê, êdê Ellaya yazî êdê merdimana?”

⁵ Înan xo mîyabeyn di qisey kerdî, va: “Eki ma vajim, ‘Êdê Ellaya’, O do vajo, ‘Winî yo se, şima çi emelê Yehyay nêkerdê?’

⁶ Naqor ma vajim, ‘Êdê merdimana’, wexta na milet pêro do ma sî kero, çiki heminan emel kerdê ki Yehya jew pêxember bi.”

⁷ Soyin di înan va: “Ma nêzanim kamcî hukma Yehyay waftîz kerdê.”

⁸ Wexta Îsay va: “Winî yo se, ez zî şima rê nêvana ezo kamcî hukma nê girwan kena.”

Mesela Reşberandê Xiraban

⁹ Bahdo Îsa ageyra milet ew înan rê na mesel va: “Wextê di jew mêrdekî xo rê rez ronayê, bahdo rezê xo nîme dayê reşberan ew xeylê mihal şîyê raywaney.

¹⁰ Bahdê şîrîya o jew koleyê xo rişeno reşberan hetek ki şîredê rezî ra nîmeyê ci bidê ey. Hima reşberî danê ey ro ew ey destveng peyser rişenê.

¹¹ Wexta no mêrdek jewna kolî rişeno, hima ê danê ey ro zî, ci huwenê ew ey zî destveng peyser qewirnenê.

¹² O fina hîrin, jewnay rişeno. Ê ey zî kotegî kenê, gûnî di verdanê ew rez ra erzenê teber.

¹³ “Wihêrê rezî vano: ‘Ez se kera? Ez do lajê xo yê qedrî û qîmetî birişa, ê do ey bihesibnê.’

¹⁴ “Senî ki reşberî vînenê lajê wihêrdê rezî yo yeno, ê pêjewbînan rê vanê: ‘No wihêrê mêrasî yo, bêrê, ma ey bikişim, wexta no mêras ma rê maneno!’

¹⁵ Ê ey rezî mîyan ra erzenê teber û kişenê. “Bahdê neya, no wihêrê rezî do se kero înan?

¹⁶ O do bîro, înan bikişo ew bahdo rezê xo bido jewnay.” Mileta ki nê qisey aşnawitî, înan va: “Ella nêkero!”

¹⁷ Îsa weyna înan ra ew wuna va: “Nê qiseyê ki Qisandê Mibarekan mîyan di estê, vajê mahneyê nînan çiçî yo: ‘Sîya ki wustayan va, na sî tebay rê nêbena, A sî bî sîya koşî.’

¹⁸ “Kamo ki na sîyer sero guno, o do lete letey bo, ew na sî kamî sero guno se, a do ey zeydê wela werdî kero.”

¹⁹ Nê Alîmanê Kitaban û serê kahînan zanayê ki Ey a mesela reşberan înan deyne vatê. Ay ra ê qayilî bî a çeq di Îsay tepêşê, hima milet ra tersayê.

Persê Vêrgîdê Qeyzerî

²⁰ Nay sera ê qayilî nêbî ki Îsay çimandê xo vera abirnê, qandê coy înan çend merdimê fesadî riştî Ey hetek ki Ey tim xeyal kerê ki hetanî Ey fek ra qiseyênda çewt biaşnawê. Winî ki Ey walî çim di neheq kerê, ew walî Ey tepişten do.

²¹ Qandê coy nê merdiman Îsay rê va: “Mehlîmê ma, ma zanê qiseyê ki tî yê kenê ew misnenê ma, ê pêro raştî yê. Wexto ki ti misnenê kes do senî rayda Ellay ra şiro, wexta bol merdimêndo ercîyaye bo zî, ti nêtersenê ew ti raşta ci vanê.

²² Ma rê vaj: Ma vêrgî bidim Qeyzerdê Romay, yazî nêdim?”

²³ Hima Îsay dûzana înan fahm kerd.

²⁴ Ay ra Ey înan rê va: “Jew perreyo sêmin mi misnê!” Bahdo va: “Perrî sero, resm û yaziyê kamî esto?” Înan va: “Êdê Qeyzerî.”

²⁵ Wexta Îsay înan rê va: “Ey ma winî yo se, ê heqê Qeyzerî bidê Qeyzerî, ew heqê Ellay zî bidê Ellay!”

²⁶ Înan nêşa ki milet ver di Îsay fek ra qiseyênda çewt vejê. Naqor ciwabo ki Îsay da, ê hendik ecêb mendî ki winî înan nêzana se vajê.

Merg-Ra-Weriştiş Esto, Çinî yo?

²⁷ Bahdo tayn Sadûqî amey Îsay hetek. Înan emel nêkerdê ki merg-ra-weriştiş esto, qandê coy înan Îsay ra pers kerd va:

²⁸ “Mehlîmê ma, Mûsay Kitab di ma rê emir kerdo, vato ki: ‘Eki jew camêrdo jewjîyaye ocaxkor mireno se, birayê nê merdimî do cenîyera ey bigîro ki ezbeta birardê ci vinî nêbo.’

²⁹ Hima wextê di hewt biray bî. Sifteyênê ci xo rê jewjîya ew ocaxkor merd.

³⁰ Uja di, bahdoyênê ci cenîya birardê xo vîya girot, hima o zî ocaxkor merd.

³¹ Bahdê eya, birayê bînî fina hîrin a girot ew o zî winî bi. Hewt heme zî bê qeçek merdî.

³² Soyin di, na cenîyek zî merd.

³³ No hesaba Rojda Merg-ra-weriştişî di, na cenî do cenîya kamcînî bo? Çiki nê hewt heme zî aya jewjîyaybî.”

³⁴ Îsay înan rê wuna va: “Merdimê nê dinyay jewjîyenê ew jewjnenê.

³⁵ Hima êyê ki Ellay layiq dîyê, merg ra werzê ew dinyado newe di fina weşî bê, ê hinî nêjewjîyenê.

³⁶ Ew ê do nêmirê zî, çiki ê zeydê melekana yê. Ew êyê ki merg ra weriştê, ê qeçê Ellay ê.

³⁷ Mûsay zî na mesela merg-ra-weriştiş kerd eşkera. Çiki meselda birikdê telî di, Mûsa Rebbî rê vano ‘Ellayê Îbrahîmî, Ellayê Îshaqî ew Ellayê Yaqûbî!’

³⁸ Ella xora Ellayê merdan nîyo, herunda ney di O Ellayê weşan o, çiki Ey rê ê heme weşî yê.”

³⁹ Tayn Alîmanê Kitaban va: “Mehlîm, to raşt qisey kerdî.”

⁴⁰ Hinda kesî nêwetard ki Ey ra jûna qisa pers kero.

Mesîh Lajê Dawidî yo, Yazî Rebbîyê Dawidî yo?

⁴¹ Îsay înan hemin ra pers kerd: “Senî beno ki, Mesîh lajê Dawidî yo?

⁴² Çiki Qiral Dawid bixo kitabdo Mezmûran mîyan di wuna vano: ‘Rebbî, Mesîhdê mi rê va ki

⁴³ Ti kiştda mina raşta roş Hetanî ez dişmenanê to lingandê to bin di kera.’

⁴⁴ “Eki Dawid o, Mesîhî rê vano Rebbî se, O senî lajê Dawidî beno?”

Alîmandê Kitaban Ra Xo Bipawê

⁴⁵ Wexto ki milet pêroy goştarey kerdê, Îsay telebandê xo rê wuna va:

⁴⁶ “Xo Alîmandê Kitaban ra bipawê! Ê qayilî yê fîstanandê dergana şirê tîya uja, ew ê wazenê ki merdimî înan bol bihesibnê ew kuçan di silam bidê înan. Sînagogan di ê vernîda heminan di roşenê ew dahwetan di zî tim cayê rindî gênê.

⁴⁷ Nê milkê cenîyandê vîyayan wenê ew duayê dergî kenê ki milet bivîno ew înan bol bihesibno. Qandê coy ezabê nê winayinan do bol giran bo.”