Lûqa 18 - Kitabo Mûqades

Mesela Cenîyerda Vîya ew Hakîmî

¹ Îsay telebandê xo rê jû mesel va ki telebeyê ci tim û tim duay bikerê ew duayan ra qe nêedizyê.

² Ey înan rê va: “Jû sûk di jew hakîmê beno, no hakîm Ellay ra nêterseno ew merdiman zî qe nêhesibneno.

³ Fina na sûk di jû cenîya vîya bena. Na tim yena ê hakîmî hetek ew ey rê vana: ‘Merdimo ki mi gerrey kerdo, heqê mi ey ra bigî!’

⁴ “Xeylê mihal qe qaxuyê ey zî nêbeno, hima bahdo o xo bixo rê vano: ‘Ez Ellay ra nêtersena ew merdiman zî nêhesibnena,

⁵ hima na cenî do mi rehat nêverado, qandê coy ez do heqê na cenîyer bigîra. Eki ez nêgîra, a do tim û tim bîro ew mi zî înciraxî kero.’ ”

⁶ Wexta Rebbî wuna va: “Şima xeyal kerd, hakîmo ki qe heqê kesî nêdano, ey se va?

⁷ Ew êyê ki Ellayê xo rê abirnayê, şew û roj veyndanê Ey, O do zî heqê înan nêdo? O do înan rê vajo, şima bipawê?

⁸ Ez şima rê vaja, O do heqê înan rew bido. Hima wexto ki Lajê Însanî bîro, çi zano O do erdî sero îmano winayin bivîno.”

Duayê Ferîsî û Tahsîldarî

⁹ Tayn merdimê ki raşteyda xoya paye kenê ew merdimanê bînan xo ra cêr vînenê, Îsay qandê înan zî na mesel va:

¹⁰ “Wextê di, di merdimî şinê Keyedê Ellay ki duay bikerê, nînan ra jew Ferîsî beno ew o bînê ci zî tahsîldar beno.

¹¹ No Ferîsî pay vindeno û xo rê duay keno, vano: ‘Ella, to rê şukur bo ki ez zeydê merdimandê bînan xirxiz nîya, sextekar nîya ew zîna zî nêkena, ew no tahsîldaro ki uja di, ez zeydê ey zî nîya!

¹² Ezo hefte di, di rojî roje gêna ew qezencdê xo hemî ra zî zikatê xo dana.’

¹³ “Hima no tahsîldar, dûrî di vindeno ew qe finê zî azmîn ra nêweyneno, dano xo sêne ro ew vano: ‘Ella, ez merdimêndo gunakar a, mi rê rehma xo bik!’

¹⁴ “Ez şima rê vaja, no tahsîldar rehimda Ellaya ageyra keyedê xo, hima Ferîsî rehim nêdî. Çiki merdimo ki xo cor ra vîneno, o do bikewo, hima kamo ki xo cêr ra vîneno, o do zî berz bo.”

Qeçan Benê Îsay Hetek

¹⁵ Tayn merdimî qeçekê xo yê werdîkekî zî ardê ki Îsa destê xo seredê înan sera no. Telebanê Îsay senî ki no dî, qahrîyay înan ra.

¹⁶ Hima Îsay qeçekî veynday xo hetek ew va: “Veradê, wa qeçekî bîrê mi hetek, înan vero mevinderê! Çiki Hukumdareya Ellay, merdimê ki zeydê qeçkana yê, êdê înan a.

¹⁷ Şima rê raşta ci vaja: Kamo ki Hukumdareya Ellay zeydê jew qeçekîya qebul nêkero, o nêşeno bîro na Hukumdarey mîyan.”

Zengîney û Cinet

¹⁸ Jew merdimê hesibnayî Îsay ra pers kerd: “Mehlîmo min o rind, ez do se kera ki Ella emrê bêsoyinî bido mi?”

¹⁹ Îsay zî va: “Çi tî yê mi rê vanê rind? Ella tenya rind o, bê Ellay keso rind çinî yo!

²⁰ Ti emranê Ellay zanê: ‘Ti do zîna nêkerê, kesî nêkişê, çîyê nêtirê, ti do zûr ra kesî sero şahdeyin nêdê ew mar û pêrdê xo rê hurmet bikerê!’ ”

²¹ Nê mêrdekî zî va: “Gencînda xo ra yo ki ezo nînan hemin ana herun.”

²² Îsay ki nê qisey aşnawitî, ey rê wuna va: “Hewna çîyêndê to kemî yo: Çiçî to esto se, hemî biroş ew perranê ci bidi feqîran ki ti wuna cinet di bibê wihêrê xezînî. Bahdo zî mi dima bê!”

²³ Senî ki mêrdekî nê qisey aşnawitî, bol mixul werd, çiki o bol zengîn bi.

²⁴ Îsa weyna ki o yo mixul weno, wexta wuna va: “Zengînan rê Hukumdareyda Ellay dekewten çend çetin o!

²⁵ Jew devî qulda derzîn ra ravêrnayen deha rehat o ki jew zengîn dekewo Hukumdareyda Ellay.”

²⁶ Êyê ki no aşnawitê înan va: “Winî yo se, ma kam şeno bireyo?”

²⁷ Îsay va: “Çîyo ki merdiman rê bêmikûn o, Ellay rê mikûn o.”

²⁸ Uja di Petrûsî va: “Ti zanê, ma terkê heme çîdê xo kerd ew to dima ameyim.”

²⁹ Îsay telebandê xo hemin rê wuna va: “Ez şima rê raşta ci vaja, kamo ki oxirdê Hukumdareyda Ellay di, keyeyê xo, cenîya xo, birarê xo, mar û pêrê xo ew qeçê xo veradayê,

³⁰ o do no dinya di çend û çend vêşîyê ci ew o dinya di zî emro bêsoyin bigîro.”

Îsa Fina Hîrin Qalê Merg û Weriştenda Xo Keno

³¹ Îsay diwês wekîlê xo veynday kişt ser ew înan rê va: “Ma do nika ray kewim, şim cor Yeruşalîm. Qiseyê ki pêxemberan qandê Lajdê Însanî yazi kerdê, uja di ê qisey pêro do bîrê herun.

³² O do bideyo destandê bêîmanan, êyê ki Ellay nêsilasnenê. Ê do Ey bihuwê, Ey rê ezîyet bikerê ew alû çekerê Ci,

³³ do Ey kotegî kerê ew bahdo bikişê. Naqor O do roja hîrin merg ra werzo.”

³⁴ Telebanê ci nê qisan ra qe teba fahm nêkerd. Mahneyê nê qisan înan ra nimyabi, qandê coy înan nêzanayê ki nê qisana Ey înan rê se vatbi.

Îsa Jew Merdimê Korî Keno Weş

³⁵ Wexto ki Îsa amebi nezdidê Erîha, uja di kinardê ray di jew merdimêndo kor ronişte bi ew parse kerdê.

³⁶ Senî ki ey hetek ra ravêrdî, ey vengê milet aşnawit ew pers kerd va: “Se bîyo?”

³⁷ Merdiman ey rê va: “Îsayo Nasirayij o ravêreno.”

³⁸ Wexta o qîra ew veynda: “Îsa, Lajê Dawidî! Mi rê rehma xo bik!”

³⁹ Êyê ki Îsay ver di şîyê, qahrîyay ey ra ki wa vengê xo nêvejo, hima o qe deha vêşî qîra va: “Lajê Dawidî, mi rê rehma xo bik!”

⁴⁰ Îsa vinderd û emir kerd ki, wa ê mêrdekî bîyarê Ey hetek. Senî ki o ame nezdi, Îsay ey rê va:

⁴¹ “Tî yê mi ra çiçî wazenê to rê se kera?” Ey va: “Rebbî, ez qayil a çimê mi abîyê!”

⁴² Uja di Îsay ey rê va: “Wa çimê to bivînê! Îmanê to ti reynayê.”

⁴³ A çeq di, çimê mêrdekî herund' abîyay. Ey Ellay rê şukur kerd ew Îsay dima şi. Şêligî pêroy na keremata Ellay dî ew Ellay rê hemd û şukur kerd.