Lûqa 17 - Kitabo Mûqades

Efkerdiş û Hukmê Îmanî

¹ Îsay fina telebandê xo rê wuna va: “Çîyo ki do însanî rayda Ellay ser bifîno, do heqûnheq bibo; hima wax bi o merdimo ki ney rê beno sebeb!

² Oyo ki nê werdîkekan ra jewerî ray ser bifîno, ez şima rê vaja, ê merdimî rê jû sîya ayrî girêdê ey mila ew ey çekerê dengizî mîyan, ey rê ney ra rindêrî yo.

³ Xo bipawê! Eki birayê to kewno guna, ey ci aqilni, ew eki o tewbe keno se, wexta ey ef ki.

⁴ Eki ey jew roj mîyan di to rê hewt finî nêhekey kerd ew hirg fin ame û va: ‘Ezo tewbe kena, mi ef ki!’, wexta gerek ti ey ef kerê.”

⁵ Wekîlan Rebbî rê va: “Îmanê ma vêşî ki!”

⁶ Rebbî zî înan rê va: “Eki îmanê şima hendê jew dendikdê simaqî gird bîyayê se, wexta şima şayê na tûwêr rê vajê: ‘Herr ra bivijyî ew şo xo dengizî mîyan di ron!’ Ew ay do zî goştareya şima bikerdayê.”

Heqê Xizimkarey

⁷ “Mesela, şima ra jewê koleyêndê ci bibo ew şiro erdî biramo yazî şiro mîyan ver, wexto ki o gem ra yeno keye, kamcînê şima ey rê vano: ‘Bê, sifre di roş, nan bûr.’

⁸ Hewna o do ey rê nêvajo, ‘Nanê şanî hadre ki, pêşmala xo girêdi ew mi rê xizmet biki ki hetanî ez bûra bişima! Bahdê mina ti zî şenê bûrê û bişimê.’

⁹ Yazî beno ki o koledê xo rê vajo ‘Ti berxudar bê!’ qandê karo ki to dayo ey ew ey zî ardo herun?

¹⁰ “Zeydê neya, wexto ki şima zî emrê Ellay heme ard herun, wexta xo bixo wuna vajê, ‘Ma qulê to yê nêercîyayey ê ew ma emrê to ard ca, çiki xora no deynê ma bi.’ ”

Des Merdimê Cizaminî

¹¹ Îsa wexto ki hetê Yeruşalîmîya şîyê, raya ey aredê Samerîye û Celîle ra ravêrdê.

¹² Uja di senî ame nezdidê jû dew, des teney merdimê cizaminî amey vera Ey ew dûrî vinderdî.

¹³ Înan venga dûrî ra veynda va: “Îsa, Begê ma! Ma rê rehma xo bik!”

¹⁴ Îsay ê dî ew înan rê wuna va: “Şirê kahînan hetek ew xo înan misnê!” Ew ê hewna ray ra bî, cizam ra bî weşî.

¹⁵ Nînan ra jewê ci vîneno ki bîyo weş, ey venga Ellay rê şukur kerd û embazandê xo hetek ra peyser ageyra.

¹⁶ Ame lingandê Îsay verd', rîyê xo na erda ew Ey rê va: “Ti berxudar bê!” Ew no jew Samerîyeyij bi.

¹⁷ Îsay va: “Şima des heme weş nêbîbî? Ê new teney bînî yê kotî di?

¹⁸ Bê nê xerîbî, kes peyser nîyame ki Ellay rê hemd û şukur bikero?”

¹⁹ Bahdo nê mêrdekî rê va: “Werz pay û şo keyedê xo, îmanê to ti reynayê.”

Hukumdareya Ellay Do Çimhal Bîro?

²⁰ Tayn Ferîsîyan Îsay ra pers kerd va: “Hukumdareya Ellay do çimhal bîro?” Îsay înan rê wuna va: “Wexto ki Hukumdareya Ellay bîro, kes do ay nêşo çimana bivîno.

²¹ Ew kes do nêşo vajo, bewnî, a ya tîya di, yazî a ya uja di! Çiki xora a ya nika ra şima mîyan di!”

²² Bahdo Îsay telebandê xo rê wuna va: “Winî rojê do bîro ki şima do bol qayilî bê rojandê Lajdê Însanî ra jew rojek bivînê, hima şima do nêvînê.

²³ Ew ê do şima rê vajê ‘Bewnîrê, Lajê Însanî yo uja di!’ Yazî ‘Bewnîrê, O yo tîya di!’ Hima şima înan dima meşirê uja.

²⁴ Çiki wexto ki virsik akewna, senî na kiştda dinyay ra heta a kiştda dinyay roşn dana se, Lajê Însanî do zî rojdê xo di winî bîro.

²⁵ Hima verî gerek O bol ezîyet banco ew no cisnê nikay do Ey nêhesibno.

²⁶ “Zey wextdê Nûhî, rojê Lajdê Însanî do zî winî bo.

²⁷ Hetanî roja ki Nûh nişt gemî, zeydê hirg rojîya merdimî wenê, şimenê ew jewjîyenê. Bahdo tofan ame ew ê pêro merdî.

²⁸ Wextdê Lûtî di zî winî bi. Merdiman werdê û şimitê, girotê û rotê, erdî karritê ew banî viraştê.

²⁹ Hima roja ki Lût Sodom ra vijya teber, azmîn ra adir û axuya varay ew merdimê a sûk pêro merdî.

³⁰ “A roja ki Lajê Însanî do biaso, a do zî zeydê ê rojan bo.

³¹ A roj di, merdimo ki a çeq di banî sero, wa cêr nêşiro qandê çîdê xo, ew zeydê neya, kamo ki gema, wa peyser keyedê xo nîyageyro.

³² Cenîyera Lûtî bîyarê xo vîrî!

³³ Jewo ki vajo, ez ganê xo bireyna, o do ey vinî kero, naqor jewo ki no dinya di ganê xo vinî kero, o do ganê xo bireyno.

³⁴ Ez şima rê vaja: Şewda nê rojî di, di merdimîyê ki jû ca di kewtey ê, jewê înan do bigêrîyo ew jewê ci do pey di bimano.

^35-36 Di cenîyê ki pîya distarî tahnenê, jûwa înan do bigêrîyo ew jûwa ci do bimano.”

³⁷ Teleban Îsay ra pers kerd va: “Rebbî, nê girwey do kotî bibê?” Ey zî înan rê va: “Leş kotî di bo, qertelî do zî uja di arêbîyê pêser.”