Lûqa 14 - Kitabo Mûqades

Îsa yo Keyedê Jew Ferîsî Di

¹ Jû Roja Şabatî, Îsa şi keyedê jew serdardê Ferîsîyan di nan bûro ew camêrdê ki keyedê Ferîsî di arêbîyaybî pêser, çimê heminan Îsay sero bî.

² Uja di Îsay ver di jew mêrdek bi ew no mêrdek nêweş bi, gandê ney di aw arêbîyayê pêser ew qol û saqeyê ci pêro masay bî.

³ Îsay Alîmê Kitaban û Ferîsîyan ra pers kerd: “Roja Şabatî di, kes jew nêweşî weş kero, no wuna rind o, yazî ar o, Qanûnê Ellay o se vano?”

⁴ Înan teba nêva. Wexta Îsay destê xo na nêweşî ser, o kerd weş ew rişt keye.

⁵ Bahdo Îsay înan rê wuna va: “Roja Şabatî bo zî, lajê şima yazî jew gayekê şima bîrrî mîyan ro guno, kam şima ra ey uja ra herund' nêvejeno?”

⁶ Nê qisan ser ra, înan nêşa çîyê vajê.

Meymandarey Di Cayo Weş Megeyrê

⁷ Îsa weyna ki meymanê ki dahwet bîyê, ê yê ravêrenê cordê sifrî ew geyrenê cado weş di roşê. Wexta Îsay înan rê na mesel va:

⁸ “Eki jew to nandê veyvî rê dahwet keno, wexta hend cordê salon di meroş. Beno ki ey jewna to ra hesibnayeyo dahwet kerdo.

⁹ Wexta wihêrê veyvî do bîro, to rê vajo, ‘Cayê xo bidi nê merdimî’, wexta ti do bişermayê ew werzê, şirê cêrdê heminan di roşê.

¹⁰ Qandê coy, eki jewî ti dahwet kerdê, şo cêrdê heminan di roş. Winî ki çimhal wihêrê keyî ame to rê vajo, ‘Dostê mi, bê wuna ravêr cor!’ Wexta êyê ki toya pîya sifre di roniştê, heminan ver di ti benê ercîyaye.

¹¹ Jewo ki xo heminan ra cor bizano, o do bikewo cêr, ew jewo ki xo cêr ra bizano, o do zî ercîyaye bo.”

¹² Îsa ageyra wihêrdê keyî ew ey rê wuna va: “Eki ti qayil ê şan di yazî dihîr di nan bidê, wexta biraran û merdimanê xo, yazî embazan û embiryanandê xo yê zengînan dahwet meki, çiki ê do zî to dahwet kerê ew peyser bidê to.

¹³ Hima herunda înan di, wexto ki ti dahwet danê, veyndi ê merdimê ki feqîrî yê, fercî yê, seqetî yê ew korî yê.

¹⁴ Wexta werrekê to, çiki ê nêşenê peyser bidê to. Hima roja soyinî di, wexto ki merdimê raştî merg ra weriştî, Ella bixo do to rê ewêzî bikero.”

Mesela Dahwetda Gird

¹⁵ Meymanê ki Îsaya pîya sifre di roniştey bî, înan ra jewerî, senî ki nê qisey aşnawitî, Îsay rê wuna va: “Êyê ki ê do Hukumdareyda Ellay di pîya nan bûrê, werrekê înan hemin!”

¹⁶ Îsay zî ey rê na mesel va: “Jew merdimî dahwetênda gird kerd hadre ew qandê nandê şanî veynda bol merdiman.

¹⁷ Wextê nanî, xizimkarê xo rişt ki meymanan rê vajo: ‘Hadê bêrê, heme çî hadre yo!’

¹⁸ “Hima pêro zeki qisanê xo jewî kerê, jewerî ey rê va: ‘Reca kena qusurdê mi mewnî, çiki mi jew erd giroto, gerek ez şira bewnîra ey.’

¹⁹ “Jewnay ci rê va: ‘Mi panj çitî gay girotî, ezo şina înan bicerbina, qusurdê mi mewnî.’

²⁰ “Naqor ê bînê ci zî wuna va: ‘Ez newe jewjîyaya, ay ra ezo nêşena bîra.’

²¹ “Wexto ki no xizimkar peyser ageyra ew hal û mesela nê merdiman begdê xo rê va, wihêrê keyî hêrs bi ew xizimkardê xo rê va: ‘Rew vazdi, şo kuçandê na sûk ra ew merdimê ki feqîrî, fercî, seqetî ew korî yê bivîn, bîya tîya!’

²² “No xizimkar peyser ame ew begdê xo rê va: ‘Begê mi, mi emrê to ard ca, hima hewna ca esto.’

²³ “Wexta wihêrî wuna va: ‘Winî yo se, şo rayda welatî ser, sînordê sûk ra, uja di ti kamî vînenê, reca bik bîya tîya ki, wa keyeyê mi pirr bo.’

²⁴ Ez şima rê vaja, ê merdimê ki verî dahwet bîbî, înan ra kes do şamîda mi ra tam nêkero!”

Telebey Do Heme Çî Bigîrê Çiman

²⁵ Wexto ki Îsa fina ray ra bi, bol milet eya pîya şîyê. Îsa ageyra înan ser ew wuna va:

²⁶ “Kam ki wazeno mi dima bîro, gerek o do mar û pêrê xo, cenîyera xo, qeçanê xo, war û biraranê xoya ew hetanî ganê xo bixo zî xo çim ra vejo, jewmbî nêşeno telebeyê mi bo.

²⁷ Kamo ki xaçê xo xo doşî nênano ew mi dima nîno, o nêşeno telebeyê mi bo.

²⁸ “Şima ra jew, wexto ki qayil bo banê virazo, o do verî hesab nêkero? Hele perreyê ci do bes bikero, nêkero?

²⁹ Çiki, eki hîmê banî rono ew nêşo biqedîno, wexta êyê ki bivînê, ê pêro do ey bihuwê ew wuna vajê,

³⁰ ‘Nê merdimî hîm rona ew nêşa peynîya ci bîyaro.’

³¹ “Yazî, hukumdaro ki qayil o jewna hukumdarîya lej bikero, o do verî qe texmîn nêkero ki, eceba o do bişo des hezarî merdimana, vîst hezarîya baş bikero, yazî nêkero?

³² Eki o do nêşo, qenê hendik hewna hukumdaro bîno dûrî di, ey rê xeber rişeno ew pers keno ki qandê umiş bîyayişî şertê ey çiçî yê.

³³ Şima ra zî, jewo ki heme çîyê xo xo çim ra nêveto, o merdim nêşeno telebeyê mi bo.”

Mesela Sol

³⁴ “Sol qedr a, hima eki sol tamê xo vinî kero, tamê ci senî do fina peyser bîro?

³⁵ A sol ne herr rê, ne zî zibilî rê bena, kes do ay çekero teber. Goşê ki aşnawenê, wa rind biaşnawê.”