Lûqa 12 - Kitabo Mûqades

Dirîyey Ra Xo Bipawê

¹ Fina hezarana merdimî çorşmedê Îsay di arêbîyaybî pêser, winî bolî bî ki înan pêjewbînî pay kerdê. Îsa sifte ageyra telebandê xo ew înan rê wuna va: “Amîndê Ferîsîyan ra xo bipawê, no amînê dirîye yo!

² Çîyo ki nimite yo, o do bivijyo duz ew çîyo ki mîyanikî yo, o pêro do bizane yo.

³ Qandê coy qiseyê ki şima tari di vatê, ê do pêro rojdihîr di biaşnawyê. Ew şima çiçî kêberan pey di jewerî goşa vato se, o do fekan ra vila bo.”

Metersê

⁴ “Ezo şima dostandê xo rê vana, êyê ki bedenî kişenê ew ey ra vêşî nêşenê teba bikerê, înan ra metersê!

⁵ Hima ez şima rê vaja, şima do kamî ra bitersê: Oyo ki verî ganê kesî gêno ew dima zî şeno kesî çekero cehnim, şima ey ra bitersê. Ezo şima rê vana, ey ra bitersê!

⁶ Kes panj mirîçikî, di quruşîya nêroşeno, winî nîya? Ew Ellay nînan ra qe jûwa ci xo vîra nêkerda.

⁷ Hima Ellay çim di, şima bol mirîçikan ra deha vêşî qedrî yê. Qandê coy metersê, porro ki seredê şima ya zî, o pêro amorde yo.

⁸ “Ez şima rê vaja: Kamo ki merdiman ver di mi qebul kero, Lajê Însanî do zî melekandê Ellay ver di do ey qebul kero.

⁹ Hima kamo ki merdiman ver di mi înkar kero, o do zî melekandê Ellay ver di winî înkar bo.

¹⁰ Kamo ki Lajdê Însanî rê kufir kerdo, o gunayê ey do ef bo. Hima kamo ki Rihdê Mibarekî rê kufir kerdo, o gunayê ey do ef nêbo.

¹¹ “Eki rojê şima ancenê sînagogan, hukumdaran û hakîman ver, wexta qaxu megîrê ki şima do uja di se vajê ew senî neheqey ra bireyê.

¹² Çiki qiseyê ki îcab kenê, a çeq di Riho Mibarek do ê qisan bîyaro şima vîrî.”

Axmaxo Ki Zengîneyda Xoya Paye Keno

¹³ Şêligî mîyan ra jewerî veynda Îsay, va: “Mehlîmê mi, birardê mi rê vaj, mêraso ki pêrdê ma ra mendo, wa ey mina bara kero.”

¹⁴ Îsay zî ey rê wuna va: “Ey merdim, kamî mêrasdê şima sero no heq dayo mi?”

¹⁵ Bahdo Îsay înan rê va: “Xo heme çimveyşaney ra bipawê! Çiki zengîney emrê însanî derg nêkena.”

¹⁶ Ew Îsay înan rê na mesel va: “Wextê di jew merdimêndo bol zengîn beno, erdê ci bol mexel dano

¹⁷ ew no merdim xo bixo rê vano ‘Ez do se kera? Cayê mi çinî yo ki ez do hendayê tenî kotî arêda pêser.’

¹⁸ Dima vano ‘Ez zana se kera, ez do embaranê xo birijna ew herunda înan di xo rê girdanê ci viraza! Ew ez do nê tenî ew zexiredê bînîya pîya heme embarandê xo di arêda pêser.

¹⁹ Wexta ez do gandê xo rê vaja: Ganê mi, to bol serran rê texmînê xo kerdo. Nika zerrîda weşa bûr, bişim ew bewnî kêfdê xo!’

²⁰ “Hima Ella ey rê wuna vano: ‘Ey axmax! Ganê to do emşo to ra peyser bigêrîyo! Çîyo ki to arêdayo, o do kamî rê bimano?’ ”

²¹ Bahdê na mesel Îsay şêligî rê va: “Êyê ki tim xo rê mal arêdanê pêser, hima Ellay het di tebayê ci çinî yo, soyinê înan wuna beno.”

Qaxu Megîrê

²² Îsay telebandê xo rê zî wuna va: “Ay ra ezo şima rê vana: Qaxuyê emirdê xo megîrê, mevajê ma do çiçî bûrê ew çiçî xo ra dim!

²³ Çiki no gan werdî ra qedr o, ew no beden zî çinay ra qedr o!

²⁴ Bewnîrê mirîçikan ra, ê ne karrenê, ne arêdanê, ne embarê ci, ne zî axurê ci estê, ew fina zî Ella înan keno mirdî. Ew şima ê mirîçikan ra bol qedrî yê!

²⁵ Şima ra kam pey qaxu-girotena şeno emrê xo deqeyê derg kero?

²⁶ Eki hukmê şima nêkekî rê zî çinî yo, winî şima yê çiçî rê qaxuyê çîdê bînî gênê?

²⁷ “Bewnîrê, vilikê gem senî benê girdî! Ê yê karê nêkenê ew rêştan nêrêşenê. Hima ez şima rê vaja: Silêman hend zengîneyda xoya fina zî zeydê jûwerda nînan çinayo weş xo ra nêdabi.

²⁸ Îmanê şima kemî yo, vaşo ki ewro vilik dano ew meşt çebîyeno adir, fina zî Ella çinayo wuna weş dano ey ra se, winî bizanê ki O do heqûnheq çina şima ra do.

²⁹ Qaxu megîrê ew mevajê ma do çiçî bûrê û bişimê.

³⁰ Miletê nê dinyay tim û tim nê çî dima şinê. Halbik Pîyê şima zano, şima mehtajê nînan ê.

³¹ Şima verî Hukumdareyda Ellay dima şirê, wexta nê pêro do xora bideyê şima.

³² “Bola werdîkek, ti meters! Çiki Pîyê şima yo zerrî ra Hukumdareya xo dano şima.

³³ Çiçî şima esto, ey biroşê ew perranê ci bidê feqîran! Xo rê pêleko ki kihan nêbeno ew axret di zengîneya ki nêqedîyena, ay arêdê pêser. Uja di xirxiz çinî yo bitiro ew pepikî çinî yê ki bûrê.

³⁴ Çiki xezîneyê şima kotî d'o se, zerrîya şima do zî uja di bo.”

Qandê Ê Dinyay Hadrey Bê

³⁵ “Wa mundîya şima piştî bo ew çilaya şima zî a ci vistî bo!

³⁶ Zeki xizimkarî ki axayê ci şîyo veyve ew ê yê raya ey pawenê, winî ki çimhal axayê ci kêberî biceno se, ê bişê ey rê kêberî akerê.

³⁷ Werrekê ê xizimkaran ki axayê ci wexto ki peyser yeno, hewna ê ayay ê ew ê yê raya axay pawenê! Ez şima rê raşta ci vaja: O do wexta verbanik girêdo xoya ew xizimkaran veyndo sifre û do bixo înan rê xizmet bikero.

³⁸ Eki axa nîmedê şew di, yazî şefaqî rew yeno ew xizimkaranê xo hewna ayay vîneno se, werrekê înan!

³⁹ “Hima nay bizanê: Eki jew wihêrê keyî bizano xirxiz çimhal yeno, wexta o nêverdano xirxiz keyedê ci mîyan kewo.

⁴⁰ Şima zî tim winî hadrey bê! Çiki, çeqa ki şima yê Ey qe nêpawenê, Lajê Însanî do a çeq di bîro.”

⁴¹ Petrûsî pers kerd va: “Rebbî, tî yê na mesel ma wekîlan rê tenya vanê, yazî tî yê ma heminan rê vanê?”

⁴² Rebbî zî ey rê wuna va: “Xizimkarêndo raşt û biaqil kam o? Wihêrê ci do nê xizimkarî xizimkarandê bînan sera kehya kero ew o zî wextdê ci di nan û aw bido înan.

⁴³ Werrekê ê xizimkarî, wexto ki wihêrê ci yeno keye, ey karî sero vîneno!

⁴⁴ Ez şima rê raşta ci vaja: Wihêrê ci do malê xo hemî bido ey dest.

⁴⁵ Hima eki no xizimkar xo pîze di vajo ‘Axayê mi do hewna berey bîro.’ Qandê coy o do bûro, bişimo, serxoş bo ew xizimkarandê bînan ro do.

⁴⁶ Wexto ki axayê ci peyser ageyra, qe no xizimkar a roj û sehat nêzano. Axayê ci do ey rind koteg ro do, bahdo ey çekero bêîmanan mîyan ew o do înana pîya ezabê xo banco.

⁴⁷ “Xizimkaro ki meramê axadê xo rind zano, hima fina zî hadre nîyo ew meramê ey nêkeno, o do bol ezab banco.

⁴⁸ Hima jewêno ki nêzanayiş ra girweyê çewtî keno ew kotegî keno heq, o do tayn kotegî bûro. Çiki kamî rê vêşî deyayo, o do ey ra vêşî buwazîyo. Kamî rê bol çî amanet deyayo, nê merdimî ra fina hend çî do peyser buwazîyo.”

Wextê Qerarî

⁴⁹ “Ez ameya ki erdî sero jew adir wekera, kaşka wa nika ra kil nê adirî kewtayê!

⁵⁰ Hima gerek ez verî xo waftîz kera, ew hetanî no waftîz bîro ca, tenganeya mi bol gird a!

⁵¹ Şima yê vanê qay ez ameya ki silametey bîyara erdî ser? Nê, ezo şima rê vana, ez ameya ki merdiman pê ra abirna.

⁵² Neya tepya, eki jew keye di panj merdimî estê, ê do di hetî bê, hîrê teney do kişta jewî di bê ew di teney do zî kişta bînî di bê.

⁵³ Pî do fikrê lajî ew laj do zî êdê pêrdê xo qebul nêkero. May do fikrê keyner ew keyna do zî êdê mar qebul nêkero. Vistrû do fikrê veyver ew veyv do zî êdê vistrûwer qebul nêkero.”

Hendik Firsen o To Destid'

⁵⁴ Îsa fina ageyra milet ew şêligî rê wuna va: “Wexto ki şima weynenê rojawan ra jew hewr o şino cor, şima a çeq di vanê ‘Yaxer o yeno’ ew winî beno.

⁵⁵ Naqor, vayê veraroj ra yeno, şima vanê ‘O do germ bo’ ew o zî winî beno.

⁵⁶ Şima dirî yê! Çiki şima weynenê erd û azmîn senî aseno, fahm kenê, vanê, ayam do wuna bo. Ew senî beno, şima yê mahneyê nê wextî nêzanê?

⁵⁷ “Şima yê hewna çi bixo nêzanê ki çiçî raşt o?

⁵⁸ Jewêno ki ti ci rê deyndar ê ew ey ti dayê mahkema, çend to dest ra yeno, hendik tî yê ray ra, eya umiş bi. Eki ti winî bîrê hakîmî ver, hakîm do to bido qerdîyanî dest ew o do zî to çekero hepis.

⁵⁹ Ez to rê vaja, hetanî ti quruşê soyinî zî nêdê, hinî ti uja ra nêşenê bivijyê!”