Lûqa 11 - Kitabo Mûqades

Dua Do Senî Bibo

¹ Îsay cayên di fina duay kerdê. Wexto ki duayê xo qedînê, jew telebeyê ci Ey rê va: “Rebbî, zeki Yehyay telebeyê xo misnay, ti zî ma winî bimisni ki ma do senî duay bikerim.”

² Îsay înan rê va: “Şima ki duay kenê, wuna vajê: “Pîyê ma, boka nameyê to mibarek bo. Hukumdareya to bîro.

³ Hirg roj nano ki ma rê lazim o, bidi ma.

⁴ Gunayanê ma ef ki, Çiki êyê ki ma rê neheqey kerda, Ma yê zî înan hemin ef kenê. Ma xirabeya mecerbin.”

⁵ Bahdo Îsay înan rê wuna va: “Şima ra jewê, nîmedê şew di şiro jew embazdê xo ew ey ra reca bikero, vajo: ‘Embazê mi, mi rê deyna hîrê nanî bidi,

⁶ çiki jew meymanê mi ray ra ameyo ew teba çinî yo ki ey rê rona, o bûro.’

⁷ Wexta qe embazê şima zerre ra wuna vano: ‘Mi rehat veradi, kêber kilîtkerde yo, ew qeçê min ê zî ca di, mi het di rakewte yê, ez qe nêşena werza û tebayê bida to.’

⁸ Ez şima rê vaja, qandê embazey o do nêwerzo, hima qandê bêrîyeyda ey, o do werzo ew çiçî lazim o, do bido ci.

⁹ “Ay ra ezo şima rê vana: Buwazê, o do şima deyo, bigeyrê ci, şima do bivînê, kêberî bicenê, o do şima rê abîyo.

¹⁰ Çiki kamo ki buwazo, o gêno. Kamo ki bigeyro ci, o vîneno ew kamo ki kêberî biceno, ey rê abîyeno.

¹¹ “Şima mîyan ra kamcî pî, eki qeçê ci ci ra mase buwazo, marr dano ci?

¹² Yazî jew hak buwazo, demaşkul dano ci?

¹³ Eki şima na zerrîda xiraba zanê ki qeçandê şima rê çiçî rind o ew ey danê înan, Pîyê şimayo ki azmîn di, kamo ki Ci ra Rihê Mibarekî buwazo, O do heqûnheq bol vêşî nêdo ci?”

Îsa û Rihê Xirabî

¹⁴ Rojê Îsay jew riho xirab o lal jew mêrdekî ra vet teber, a çeq di mêrdeko ki lal bi, ziwanê ey abîya ew qisey kerdî. Mileta ki uja di bî, ecêb mend.

¹⁵ Hima înan ra tayin vatê: “O yo rihanê xiraban hukumdê Belzebûlîya vejeno, Belzebûl serdarê heme rihandê xiraban o.”

¹⁶ Taynandê ci zî Îsa cerbinayê, înan waştê ki Îsa azmîn ra elematênda gird înan misno.

¹⁷ Îsay fikrê înan zanayê, qandê coy Ey înan rê wuna va: “Kamcî hukumdarey xo mîyan di bibo di hetî, a hukumdarey bena xirabe. Ew jew keye zî xo mîyan di bibo di hetî, o keye zî beno xirabe.

¹⁸ Naqor şima yê vanê, ezo hukumdê Belzebûlîya rihanê xiraban qewirnena, hima eki Şeytan zî xo mîyan di bîyo di hetî, o yo hewna senî şeno hukum bikero?

¹⁹ Ew eki ezo hukumdê Belzebûlîya rihanê xiraban qewirnena, merdimê şima yê hukumdê kamîya înan qewirnenê? Merdimê şima do bixo hesabê nê qisan şima ra pers kerê.

²⁰ Hima eki ezo destdê Ellaya rihanê xiraban qewirnena, winî bizanê ki Hukumdareya Ellay ameya şima ser.

²¹ Jewê hewna hendik hukmê ci esto, rextê ci ew tifinga ci ci dest di, o keyeyê xo paweno, tebayê ey zirar nêvîneno.

²² Hima jewna ki hukmê ci êdê ey ra vêşî yo, wexto ki o ame ew o kerd bindest, rext û tifinga ci ci ra girot û heme çîyê ci kerd vila.

²³ Kamo ki heta mi nîyo, o yo mi vero vindeno, ew kamo ki mina pîya nîyarêdano, o yo keno vila.”

Rihê Xirabî Senî Peyser Ageyrenê

²⁴ “Wexto ki jew merdimî ra riho xirab vijya teber, geyreno ki xo rê cayêndo rehat bivîno. Çimhal ki cayê nêvîneno, xo bixo rê vano: ‘Ez fina ageyra keyedê xo yo verên rind beno, keyeyo ki ez ci ra vijyaya!’

²⁵ Wexto ki peyser yeno keye, vîneno ki heme ca pak gezi bîyo ew arêbîyayo pêser.

²⁶ Ney sera o şino, hewtna teney rihê xirabîyê ki hewna ey ra zî arî yê, înan gêno yeno ew ê uja di roşenê. Ew soyin di, halê nê merdimî verî ra deha beno xirab.”

Werrekê A Cenîyer

²⁷ Îsay ki nê qisey kerdê, jû cenîyer şêligî mîyan ra veynda va: “Werrekê a cenîyer ki ti wegirotê, ardê dinya ew şit dayo to!”

²⁸ Îsay zî wuna va: “Raşta ci, werrekê înan, êyê ki goştareya qisandê Ellay kenê ew înan anê herun!”

Milet Nişanî Nêvînena

²⁹ Çorşmedê Îsay di milet verî ra bîyê bol, wexta Ey wuna va: “No cisno, cisnêndo xirab o, o yo nişanê wazeno, hima bê nişandê Yûnis Pêxemberî, jûna nişan do nêdêyo!

³⁰ Yûnis senî miletda Nînova rê bi nişan, Lajê Însanî do zî nê cisnî rê winî nişan bo.

³¹ Rojda Hesabî di, hukumdara ki verarojî di hukumdarey kerdbî, a do merdimandê nê cisnîya pîya werzo ew a do nê cisnî mahkûm kero. Çiki na Hukumdara Verarojî, tax o kijdê dinyay ra amê tîya ki goştareya hîkmetdê Silêmanî bikero. Halbik Oyo ki nika tîya hewna Silêmanî sera yo!

³² Roja Hesabî, mileta Nînova zî do werzo ew nê cisnî mahkûm kero. Çiki senî Yûnisî înan rê wahzî day, înan tewbe kerd. Ew Oyo ki Yûnis Pêxemberî sera yo, O yo nika tîya di!”

Mesela Roşney

³³ “Qe jew merdim, çila fîneno a ci se, a çiler nênimneno ew lênî bina nêronano. Vera ney, çiler cado berza ronano ki kam yeno zerre, wa roşnî bivîno.

³⁴ Çim roşnîya bedenî ya. Eki çimê to rind vînenê, wexta bedenê to pêro beno roşn, naqor çimê to rind nêvînenê, wexta bedenê to pêro beno tari.

³⁵ Winî rind xeyal bik ki roşnîya ki to di, wa tari nêbo!

³⁶ Eki bedenê to pêro roşn o ew cayêndê ci tari nîyo, o do pêro roşn bo zeydê çilaya ki roşn dana to.”

Wax Bi Şima Rê, Alîmê Kitaban û Ferîsî!

³⁷ Çeqa ki Îsay qiseyê xo qedînay, jew Ferîsî O dahwet kerd keyedê xo ki pîya nan bûrê. Îsa şi keyedê ey ew sifre di ronişt.

³⁸ Nê Ferîsî senî dî ki Îsay verdê nanî destê xo nêşitî, ecêb mend.

³⁹ Wexta Rebbî ey rê wuna va: “Şima Ferîsî, şima teberê tas û sihanan kenê pak, hima zerreyê şima xirabey û çimveyşaneya pirr o.

⁴⁰ Şima bêaqilî yê! Zeki Ellay teberê kesî viraşto, ma zerrî zî Ellay nêviraşto?

⁴¹ Naqor çîyo ki tas mîyan di, şima ey bidê feqîran, wexta heme çîyê şima beno pak!

⁴² “Wax bi şima rê, şima Ferîsî! Şima nehnî ra, vaşdê sedefî ra ew heme zerzewat ra zikatê xo danê Ellay. Hima heqê jewnay nêdanê ew Ellayê xo nêsînenê. Hima lazim o ki şima nê çî bîyarê herun ew ê çîyê bînî zî pey goş nêkerê!

⁴³ Wax bi şima rê, şima Ferîsî! Şima sînagogan di cayê rindî gênê, ew çarşi di şima qayilî yê milet şima rê silam bido.

⁴⁴ Wax bi şima rê! Mezelê ki cayê ci beli nîyê, şima manenê înan! Merdimê ki sera ravêrenê zî nêzanê ki ê mezelî yê.”

⁴⁵ Uja di jew Alîmê Kitaban Îsay rê wuna va: “Mehlîmê ma, tî yê nê qisana ma rê xedir kenê.”

⁴⁶ Îsay va: “Wax bi şima rê zî, Alîmê Kitaban! Baro ki nêwegêryeno, şima merdiman rê vanê, ey wegîrê, hima şima bixo qandê nê barî gişta xo zî nêlûnenê.

⁴⁷ Wax bi şima rê, çiki şima mezelanê pêxemberan virazenê, halbik kalikanê şima ê pêxemberî kiştî.

⁴⁸ No wina şima yê sucê kalikandê xo rê şahîdey kenê ew înan qebul kenê. Çiki kalikanê şima ê pêxemberî kiştî ew şima yê zî mezelanê înan virazenê.

⁴⁹ Qandê coy Hîkmeta Ellay wuna vato: ‘Ez do înan rê pêxemberî ew wekîlî birişa, hima ê do taynanê ci bikişê ew taynanê ci zî eskence kerê.’

⁵⁰ No hesaba siftedê dinyay ra hetanî nika çend pêxemberî kişyayê,

⁵¹ Habîlî ra hetanî Zekeryay, Zekeryayo ki mîyabeyndê sekûda qurbanî û Keyedê Ellay di kişyayo, gûnîya nînan hemin do no cisn ra pers bo. Ezo şima rê vana, no cisn ra o do pers bo.

⁵² Wax bi şima rê, Alîmê Kitaban! Kêbero ki kes heme çî fahm keno, şima kilîtê ê kêberî girot û berd. Şima bixo o kêber ra zerre nêşîyê ew êyê ki qayilî bî şirê zerre, şima ê zî nêverday zerre.”

⁵³ Wexto ki Îsa no keye ra vijya şi, Alîmê Kitaban û Ferîsîyana tim xeyalê ey kerdê ew Ci ra bol qisey pers kerdê ki

⁵⁴ Ey fek ra qiseyênda çewt vejê ew Ey neheq kerê.