Lûqa 10 - Kitabo Mûqades

Hewtay Telebî Rê Wezîfe Deyeno

¹ Bahdo Rebbî telebandê xo ra hewtayna merdimî weçînay ew wezîfe da înan. Hirg sûk û cayo ki O do bixo bişîyayê, Ey ê hewtay tenî ra didi didi verdê xo riştî ujaya.

² Îsay înan rê wuna va: “Mexel bol o, hima emeley taynî yê. Qandê coy wihêrdê mexeli Rebbî rê reca bikerê ki, wa mexeldê xo rê emeley birişo.

³ Hadê, de şirê! Ezo şima zeydê kavirana rişena vergan mîyan.

⁴ Xo di çîyê meberê, ne pêlekê perran, ne tewreyê nanî, ne zî postalî xo di berê. Ray ra kesî rê silam medê ew mevinderê.

⁵ Çimhal ki şima kewnê jew keyî mîyan, sifte vajê ‘Nê keyî sero wa silametey bo!’

⁶ Eki uja di merdimo ki silametey ra hes keno esto se, silameteya şima do ey sero bimano. Eki çinî yo se, silametey do fina ageyro şima ser.

⁷ Keyeyo ki şima sifte şinê mîyan, uja di bimanê ew çiçî deyeno şima, ey bûrê û bişimê, çiki merdimo ki xeftîyayo qezencê xo keno heq. Keye bi keye megeyrê.

⁸ “Çimhal ki şima yenê jû sûk ew ê şima qebul kenê, wexta çiçî anê şima ver, ey bûrê.

⁹ Nêweşê ki a sûk d'ê, înan weş kerê ew merdiman rê vajê ‘Hukumdareya Ellay ameya şima ra nezdi!’

¹⁰ Hima eki şima yenê jû sûk ew uja di kes şima qebul nêkeno, wexta bivijyê teber ew kuçandê a sûk di wuna vajê

¹¹ ‘Tozê sûkda şimayo ki lingandê maya mendo, ma yê ey zî çimandê şima vero roşanenê. Hima nay bizanê ki Hukumdareya Ellay ameya nezdi!’

¹² Ezo şima rê vana: A roja ki Hukmê Ellay do bîro, halê a sûk do, haldê sûkda Sodomî ra deha bêter bo.

¹³ “Wax bi to ro, Xorazîn! Wax bi to ro, Beytsayda! Hend kerematê ki şima di bî, eki nê kerematî Sûr û Sayda di bibîyayê se, merdimanê ujay do rewnayo tewbe bikerdayê, ê do çuwalî xo ra dayê, wel xo sere ro kerdayê.

¹⁴ Qandê coy, Roja Hesabî di halê Sûrî ew êdê Saydayî do haldê şima ra rind bo!

¹⁵ Ma ti, sûka Kefernahûm, ti vana qay ti do bigêrîyê azmîn? Ti do birşîyê hetanî cehnimî bin!

¹⁶ “Kamo ki goştareya şima keno, o yo goştareya mi zî keno. Kamo ki şima qebul nêkeno, o yo mi zî qebul nêkeno. Kamo ki mi qebul nêkeno, Oyo ki ez rişta, o yo Ey zî qebul nêkeno.”

Hewtay Telebey Ageyray

¹⁷ Hewtay telebey kêfa peyser ageyray ew Îsay rê va: “Rebbî, senî ki ma nameyê to dayê, rihê xirabî zî emirdê ma bin di bî.”

¹⁸ Îsay înan rê va: “Mi dî ki Şeytan zeydê virsika azmîn ra kewt erd.

¹⁹ Bewnîrê, mi hukum da şima ki şima marran û demaşkulana lingandê xo bin di pay kerê ew hukmê şima zî hukumdê dişmenî hemî sera bo ew qe çîyê do şima rê zirar nêdo.

²⁰ Hima kêf mekerê ki rihî yê goştareya şima kenê, hima kêf bikerê ki nameyê şima Ellay hetek di yazi bîyo!”

Sebebê Kêfdê Girdî

²¹ A çeq di, Rihê Mibarekî Îsa kerd pirr ew Ey kêfa veynda Ellay: “Pîyê mi, Rebbîyê erdî û azmînî, to rê şukur bo, çiki to no çî merdimandê aqilan û zanayan ra nimit, hima êyê ki zeydê qeçkana teba nêzanê, to înan rê akerd. Xora meramê to zî no bi, Pîyê mi!

²² “Pêrê mi heme hukum da destandê mi. Kes nêzano Laj kam o, Pî tenya zano. Ew kes nêzano Pî kam o, hima Laj tenya zano ew êyê ki Laj qayil o ki bizanê, ê zî zanê Pî kam o.”

²³ Bahdo ageyra telebandê xo, înan tenya rê wuna va: “Girweyê ki şima dî, çimê ki nînan vînenê, werrekê înan.

²⁴ Çiki ezo şima rê vana: Girweyê ki şima yê nika vînenê, bol pêxemberî ew bol hukumdarî qayilî bî nînan bivînê, hima înan nêdî. Qiseyê ki şima yê nika aşnawenê, ê qayilî bî nînan biaşnawê, hima înan nîyaşnawitî.”

Mesela Embiryandê Rindî

²⁵ Jew Alîmê Kitaban qayil bi Îsay bicerbino, qandê coy ame Îsay hetek ew Ey ra çîyê pers kerd: “Mehlîmê mi, ez do se kera ki şira cinet ew hetan û hetan Ellaya pîya ba.”

²⁶ Îsay ey rê va: “Mibarek Qanûn di senî yazi bîyo? To uja di çiçî wend?”

²⁷ Alîmê Kitaban wuna va: “Ti do Rebbî, Ellayê xo, heme zerrîda xoya û gandê xoya, heme hukum û aqildê xoya bisîn! Ew ti ki senî xo sînenê, embiryananê xo zî winî bisîn!”

²⁸ Îsay zî va: “Tî yê raşt vanê, wuna bik, ti do nêmirê.”

²⁹ Hima ey fina pers kerd ki bixo neheq nêbo ew naqor zî va: “Embiryanê mi kam o?”

³⁰ Wexta Îsay ey rê na mesel va: “Jew mêrdek Yeruşalîm ra şîyê cêr, hetê Erîhaya. Ray ra qaşqûnî ey tepêşenê, heme çîyê ci gênê, danê piro ew ey winî nîm-merg erdo veradanê, şinê.

³¹ A çeq di zî jew kahîn a ray ra ravêreno, o nê mêrdekî erdo-kewte vîneno, hima o a kişta ray ra ravêreno, şino.

³² Jewna mêrdek, ezbeta Lewî ra reseno uja, o zî ey erdo vîneno ew zeydê ê bînîya ravêreno, şino.

³³ Naqor jewna a ray ra yeno, no jew Samerîyeyij o. Senî ki o nê mêrdekî erdo dirbetin vîneno, zerrîya ci ey veşena.

³⁴ No şino ey hetek, ruwen û şeraba saweno dirbetandê ci ew pêşeno. Bahdo ey nano herdê xo ser ew ey ano jew xan ew weyneno ey.

³⁵ Şefaqêrî Samerîyeyij di teney perreyê sêminî vejeno, dano wihêrdê xanî ew ey rê vano: ‘Rind bewnî ney! Eki nînan ra vêşî mesrefê to şino, wexto ki ez peyser ageyrena, dana to.’ ”

³⁶ Îsay pers kerd: “Tî yê se vanê? Nê hîrê raywanan ra kamcînî no mêrdeko ki qaşqûnan dest kewtbi, ey rê embiryaney kerd?”

³⁷ Alîmê Kitaban va: “Oyo ki ey rê rehim kerd ew qeyret kerd.” Wexta Îsay ey rê va: “Eki winî yo, ti zî şo ew eynî winî bik!”

Îsa yo Keyedê Marta û Meyrem Di

³⁸ Wexto ki Îsa û telebandê xoya raywanî bî, amey jû dew. Uja di jû cenîyek, nameyê ci Marta bî, ew ay Îsa dahwet kerd keyedê xo.

³⁹ Jû waya nay zî, nameyê ci Meyrem bî, Meyrem lingandê Rebbî bin di roniştbî ew goştareya qisandê ey kerdê.

⁴⁰ Naqor Marta kewtbî teşqele ki nan hadre kero. Bahdo amê Îsay hetek ew Ey rê va: “Rebbî, qe tî yê teba nêvanê? Waya mina xizmet di mi tenya verdana, ay rê vaj ki, wa mi rê qeyret bikero.”

⁴¹ Rebbî ay rê va: “Marta, Marta, tî ya qaxuyê bol çî gêna ew kewna teşqele.

⁴² Halbik jew çî tenya lazim o, Meyrem xo rê rindê ci weçîna, ew o do ay ra nêgêryo.”