Yith 9 - JAM DE NHIALIC 2011

¹ Abï ciɛ̈n kueer bï kek ban në kööl de nuan. Piny de dhiën ke Dhebulun ku Naptali ɣɔn cï kɔn biɔɔn guöp, ku wadäŋ abï dhuëëŋ yiɛ̈n ee pinyë, gɔl në Wɛ̈ɛ̈r Ɣer të lɔ aköl amiäk, lee piny de Jordan lɔŋ tui, ku ɣeet Galili guöpde, të rëër ë juöör thïn.

Bɛ̈ny Bɔ̈

² Kɔc ɣɔn cath ë mɔ̈ɔ̈thic acïk ɣɛɛrdït tïŋ. Aake rɛ̈ɛ̈r piny de atïïp ke thuɔɔu, ku ënɔɔnë ariɛɛu ë ɣɛɛr keek.

³ Yïn cï jur ŋuak nyin Bɛ̈nydït, ku acï ke tɔ mit piɔ̈ɔ̈th, në kë cïk looi cït man ye kɔc piɔ̈ɔ̈th miɛt në kööl ë tëm ë rap, ku nɔn ee kööl tek ë ka cï peec.

⁴ Në biäk cï yïn jonh cï ke duut dhuööŋ kɔ̈ɔ̈th ku thieec ɣɔn ye ke dui kët. Yïn ë juöör tiaam ɣɔn ee kɔcku yɔŋ ku rumkï keek, cït man wään tiɛɛm Yïn rem de tɔŋ de Midian.

⁵ Wɛɛr cieŋ ë kɔc ke ater bïï tɔŋ, ku lupɔɔkɛn de gup rim ëbɛ̈n abïï ke riɔ̈ɔ̈k në mac

⁶ Wok cï dhiëth meth! Wok cï gäm mɛwä! Ku yen abï aa bɛ̈nyda. Abï aa cɔɔl an, “Këdïït ë gäi, Mony riit kɔc piɔ̈ɔ̈th,” “Nhialic Awärjäŋ” “Wäärdan Athɛɛr” “Bɛ̈ny de Mät.”

⁷ Bäänyde abï lɔ ke dït ciɛɛŋde abï rëër ë mätic anande. Ku abï thööc muk cï kuɛɛrëdan Debid, ku bäänyde abï muk në piathëpiɔ̈u ku yic, gɔl ënɔɔnë aɣet thök de piny. Acïï Bɛ̈nydït de rɛm lueel nɔn bï yen e looi.

Bɛ̈nydït abï Yithriɛl Luöi Këtuc

⁸ Bɛ̈nydït acï löŋ de ciɛɛŋ de Yithriɛl guiir, acï löŋ de käu de Jakop lueel.

⁹ Abï ë kɔc ke Yithriɛl ëbɛ̈n ŋic ayï raan rɛ̈ɛ̈r ë pänydït ë Thamaria abï ee kënë ŋic. Ku keek ënɔɔnë aɣɛ̈ɛ̈ckï kenïïm. Ayek lueel an,

¹⁰ “Yïŋ de thoop ë wïïk piny, ku abuk bɛ yïk në kuur. Ku awïïk ke ŋaap acïk keek tɛm, ku abuk keek bɛ waar në tim de thidar.”

¹¹ Bɛ̈nydït ë kɔc ke aterden jat nhial bïk keek mak.

¹² Kɔc ke Thiriya të lɔ aköl amiäk ku Pilithiin të lɔ aköl athɛ̈i, acïk kethook ŋaam bïk Yithriɛl cuääl. Ku kënë aŋoot ke kën agönh ë Bɛ̈nydït tɔ thök, aŋoot ke nu ciin biic ke kɔɔr bï këtuc looi.

¹³ Kɔc ke Yithriɛl akënkï kepiɔ̈ɔ̈th puk, cakaa nɔn cï Bɛ̈nydït de rɛm ke luöi katuc, akënkï röt pɔ̈k En.

¹⁴ Në biäk de ee kënë Bɛ̈nydït abï bäny ke Yithriɛl luöi këtuc kekë kɔcke në kööl tökic, nɔm kekë yɔ̈l, kër ke aköt ku aguöt, abïï ke tɛɛm wei.

¹⁵ Bäny kek aye nɔm, ku tït ke Nhialic ee lueth töör kek aye yɔ̈l!

¹⁶ Kɔc wat kɔc acïk kɔc mɔ̈ɔ̈r taitai ku kɔc acïk nïïm mum.

¹⁷ Në biäk de ee kënë Bɛ̈nydït acïï wɛ̈ɛ̈t dhuökken bï tɔ poth, ku acïn kokdepiɔ̈u bïï nyuöth mïthkɛn abɛɛr ku diëër abɛɛr, në biäk cïï kɔc kedhie Nhialic kuc ku yek karɛc looi, raan ëbɛ̈n ee jamde pialëpiɔ̈u bɛ̈ɛ̈i bei në yethok. Cakaa yen ë tɔ̈u aya, agönh de Bɛ̈nydït abï ŋoot ke cïï thök, ku ciinde abï ŋoot ke nu biic ke kɔɔr bï këtuc looi.

¹⁸ Karɛc ye kɔc looi adëpkï cït many ee kuɔɔth ku thil riɔ̈ɔ̈k. Ee dëp cï roor cï ɣɔ̈k mac cïï tol tënhial paat ëbɛ̈n.

¹⁹ Në biäk de agönh ë Bɛ̈nydït de rɛm, guiëër ë löŋde adɛ̈p ë piny yic bɛ̈n ku riëëk kɔc, ku abï aa raan ke yenhde yetök.

²⁰ Wutic ëbɛ̈n kɔc abïk kacaam thii cïk aa yök aa gɔ̈ɔ̈p yiic ku camkï, ku cɔŋden acïï ke bï tɔ kueth. Acakaa mïthken abïk keek cuet!

²¹ Kɔc ke Manatha ku kɔc ke Eparaim abïk röt mak piɔ̈tkï, ku bekï mat ëtök ku mɛkkï Juda. Ku ŋoot agönh ë Bɛ̈nydït ke cïï thök, aŋoot ke nu ciin biic ke kɔɔr bï këtuc looi.