Yith 8 - JAM DE NHIALIC 2011

Wën de Yithaya Yen ee Kïït tëde Kɔc

¹ Go ë Bɛ̈nydït lɛ̈k ɛn an, “Nöm pam dït, ku gäär kɔ̈u në kïït dït nyïïn bïï ë raan ëbɛ̈n aa kueen an, ‘Ee këde Maɣercalal Ɣacebadh, të puk ë yen ë thoŋda an dap yak, dap rum.’

² Ku jɔt kɔc ee yith lueel kaarou, Yuria bɛ̈ny de ka ke Nhialic ku Dhekaria wën ë Jeberekia, ke ke bï aa cäätɔ.”

³ Ku la tëde tiiŋ tiët, na lɔ nïn wan ke tiiŋdï ë liac, na ɣɔn aacï dhiëth, go ë Bɛ̈nydït lɛ̈k ɛn an, “Cäkë an Maɣercalal Ɣacebadh, të puk ë yen ë thoŋda an, ‘Dap yak, dap rum.’

⁴ Të ŋoot ë meth ke koor kë kën guɔ cööt an, ‘Baba Mama,’ kajuëc ke Damathko ëbɛ̈n ku ka cï yak ë Thamaria ëbɛ̈n, abï keek jɔt ëbɛ̈n në melik de Athiriya.”

Melik de Athiriya Abɔ̈

⁵ Go Bɛ̈nydït bɛ jam ke yɛn

⁶ lueel an, “Në biäk cïï kɔckë jaai në pïïu piɛth ee bɛ̈n ë nyin de Cilo yic, ku lɛthë keek në melik Redhin nɔm kekë melik Peka wën ë Remalia,

⁷ Yɛn Bɛ̈nydït, Yɛn bï melik de Athiriya bɛ̈ɛ̈i kekë remdɛn ë tɔŋ ëbɛ̈n ke bï Juda bɛ̈n mak. Abïk bɛ̈n cï wɛ̈ɛ̈r ë Yuparat riŋ, ee wëk thiɔ̈ɔ̈ŋ abï ɣet ë yethok.

⁸ Abïk dap lɔ Juda ke cït amooldït ë pïïu ee ɣet ë kɔc yiëth, ku abï pinydun thiɔ̈ɔ̈ŋic ëbɛ̈n. Emanwɛl! Nhialic atɔ̈u ke wook. Abï ye wuök peer ku gël piny.”

⁹ Määtkï wenïïm ëtök në riɔ̈ɔ̈c wek kɔc cieŋ piny! Piëŋë yïn piny mec nu biäk tui. Cuɔckï röt thäärkï ku yak riɔ̈ɔ̈c! Ɣɛɛ, cuɔckï röt ku yak riɔ̈ɔ̈c!

¹⁰ Luɔikï guiɛɛrdun! Ku acïkï bï tiam. Jamkï në jamduön cäk tak! Ku acïnkï naamden, në luɔi tɔ̈u ë Nhialic ke wook.

Bɛ̈nydït Ayöök Tiët

¹¹ Bɛ̈nydït acï ya yɔ̈ɔ̈k në riɛldïïtde, luɔi cän kueer kuɛny ë kɔc yiic, bï kuany yic, go lueel an,

¹² “Du ee mɛt në kïït de kɔc yiic, ku du ee riɔ̈c në kë ye kek riɔ̈ɔ̈c.

¹³ Yak ŋic nɔn Yan Bɛ̈nydït de rɛm, Yɛn ɣeric, Yɛn abä wek dhil aa riɔ̈ɔ̈c.

¹⁴ Në biäk bïï yen aa tëɣeric arëët, Yɛn cït kuur ee kɔc tɔ kɔ̈th, ku Yɛn cït wïn ë dɛ̈p bï kɔc ke ciɛɛŋ de Juda ku kɔc ke ciɛɛŋ de Yithriɛl dɔm ku kɔc ke Jeruthalem.

¹⁵ Kɔc juëc abïk kɔ̈th, abïk wïïk ku abï ke duöm piny. Abïï keek dɔm ë wïn ë dɛ̈p.”

Yöök në biäk ë Jam në Kɔc cï Thou

¹⁶ Duötkï jamdï, ku tiɛtkï wëëtdï në kɔckiën ë piööcë yiic.

¹⁷ Bɛ̈nydït acï rɔt thiaan ë kɔcke, ku aya ŋɔ̈ɔ̈th, ku yɛn aa aŋäthdï tääu në Yeguöp.

¹⁸ Yakï wokë mïth cïï Bɛ̈nydït gäm ɛn. Bɛ̈nydït de rɛm tɔ̈u ë thööcde ë kuur ë Dhiɔn nɔm, acï wo tuöc kɔc ke Yithriɛl ke wo ye wël pïïr.

¹⁹ Ku kɔc abïk week yɔ̈ɔ̈k bäk wël aa lɔ luɔp yiic tëde kɔc ee cɔ̈ɔ̈r, ku kɔc ee thuëth, kɔc ee käŋ caar ku yek käŋ mɛɛk. Abïk lueel an, “Kɔc ayek wël luɔp tëde wëi ku jamkï në kɔc cï thou në nyin de kɔc pïr.”

²⁰ Ku abä lɛ̈k keek an, “Piɛŋkï kë wëët ë Bɛ̈nydït week! Duökï jam de tït ee piŋ, kë yek lɛ̈k week acïkï nuɛɛn duëër nyaai.”

Akööl ke Nuan

²¹ Kɔc abïk tai ë piny nɔm, abïk piɔ̈ɔ̈th jiɛth ku nɛ̈k cɔk keek. Në ŋɔ̈ɔ̈ŋden ku në agönhden yic, abïk melikden ku Nhialicden läm aciɛɛn. Ku aduëërkï tënhial woi,

²² ku lieckï piny, ku acïn däŋ bïk tïŋ ee nuan ku mɔ̈ɔ̈th, ku riɔ̈ɔ̈c de cuɔlëpiny copë ke thïn.