Yith 7 - JAM DE NHIALIC 2011

Jam lëkë Melik Aɣadh

¹ Na ɣɔn aacï melik Aɣadh wën ë Jotham, ku ye wën ë wën Yudhia jɔ aa melik de Juda, go tɔŋ thɔ̈ɔ̈r yï Redhin melik de Thiriya, kekë Peka wën ë Remalia melik de Yithriɛl, acïk Jeruthalem mak, ku akënkï bɛ̈n lëu në pɛ̈c.

² Na lɔ jam ɣet tëde melik de Juda, luɔi cïï rem de tɔŋ de Thiriya ɣëët në aken de Yithriɛl nɔm, go riɔ̈ɔ̈c kekë kɔcke abïï ke lath aläl cï tiim lɛthë yom keek.

³ Go Bɛ̈nydït lɛ̈k Yithaya an, “Jɔt wënduön Ciir Jacup, ku lɔ kaŋ melik Aɣadh nɔm. Abä lɔ yök në kueer ye kɔc ee lupɔɔ kɔɔc luui thïn, të ye awuöl thok thök, awuöl ee pïïu bɛ̈ɛ̈i të thöny.

⁴ lɛ̈kë yen bï yïn ke cïï nin, ku ë pɛ̈l rɔt piny ke cïï riɔ̈c ku cïï piɔ̈u jeth. Agönh de Redhin melik de Thiriya kekë Peka wën ë Remalia melik de Yithriɛl, acïn kë bïk lëu acïtkï many de tiim kaarou tol thook tei.

⁵ Kɔc ke Thiriya ku kɔc ke Yithriɛl në melikden wën ë Remalia, acïk kiɛɛr rac mat.

⁶ Akɔɔrkï bïk Juda lɔ peec ku lek kɔc riääc ke kɔc ë ke bï röt mät keek, ku jɔkï wën ë Tabeel dɔm ke ye melik.

⁷ Ku acïï Bɛ̈nydït lueel an, “Kënë acïï rɔt bï looi.

⁸ Në biäk de ŋö? Thiriya acïï be riɛl awär pänydïïtde Damathko, ku Damathko acïï be riɛl awär melik Redhin. Ku në biäk de Yithriɛl, në run kathiërdhetem ku dhïc yiic, abï dhiac ka bï riääk ka cï bï bɛ aa jur.

⁹ Yithriɛl acïï ril në Thamaria pänydɛn dït, ku Thamaria acïï ril në melik Peka wën ë Remalia. “Na cïï gämdun ee kɔ̈ɔ̈c ke wek cïï bï kɔ̈ɔ̈c.”

Kïn de Emanwɛl

¹⁰ Bɛ̈nydït ë jam däŋ bɛ tuöc Aɣadh an:

¹¹ “Thiëc Bɛ̈nydït Nhialicdu, bï yï nyuöth kë bï yïn En aa ŋic. Aduëër nu të thuth cït paan ë thuɔɔu, ku nɔn nu paannhial ya.”

¹² Go Aɣadh bɛ̈ɛ̈r an, “Yɛn cïï Bɛ̈nydït bï thiëëc në kë bï nyuöth ɛn, yɛn ë jaai në luɔi bän Bɛ̈nydït them.”

¹³ Go Yithaya bɛ̈ɛ̈r an, “Piɛŋkï ënɔɔnë wek kuat ë melik Debid. Arac aläl tëde week bäk kɔc tɔ bäp piɔ̈ɔ̈th, ku kaarkï bäk Nhialic tɔ bäp piɔ̈u aya?

¹⁴ Apiɛth tei, Nhialic guöpde, abï yï nyuöth kë bï yïn en ŋic: Nyan dhuec abï mɛwä dhiëëth ku abïï cäk an, Emanwɛl, të lueelë yen në thoŋda, ee “Nhialic atɔ̈u ke wook.”

¹⁵ Aɣet të le yen käŋ aa pɔ̈ɔ̈c në kaam de këpiɛth kekë kërac, ku kɔc abïk aa cam në ca ku miök de kiëc.

¹⁶ Ayï të ŋoot ee kaamë wei, piiny ke meliik ee we riääcë kaarou, abïï ke nyääŋ piny.

¹⁷ “Bɛ̈nydït abï yïn yiɛ̈n nuɛɛn, yïn wekë baai de wuur, ku kɔc ke dhiën de melik ëbɛ̈n, ayek akööl ke nuan rac, acïn kë thöŋ ke yen gɔl në akööl ɣɔn bïï ë Yithriɛl bei në Juda yic, abï melik de Athiriya lɔ bɛ̈ɛ̈i.

¹⁸ “Të le ee köölë bɛ̈n, Bɛ̈nydït abï lou ke ye kïn bï rem de tɔŋ de Rip cït luaŋ tɔ bɔ̈ në nyïïn mec ke Kiir kɔ̈ɔ̈th, ku në luɔi bï ë rem de tɔŋ de Athiriya tɔ bɔ̈ pinyden cï kiëc.

¹⁹ Ku abïk bɛ̈n ku piɔ̈ɔ̈tkï në kur nïïm ku wëk yiic ku kɔ̈k ke kur yiic ku abïk roor thiɔ̈ɔ̈ŋ yic ëbɛ̈n ayï të ye puur.

²⁰ “Në aköölkë Bɛ̈nydït abï rem de tɔŋ de melik de Athiriya nu ë wɛ̈ɛ̈r ë Yuparat lɔŋ tui riɔp, ku abï we muut nïïm, ku muut nhïm nu ë we nɔ̈k ku nhïm nu ë we gup.

²¹ “Në aköölkë yiic, raan abï nɔm dɛk dɔu ku thök kaarou,

²² abïk tuu në ciɛk bï keek aa lëu baai. Ɣɛɛ, kɔc lik cï döŋ apïïr abïk aa cam ë ca ku miök de kiëc.

²³ “Ku në aköölkë të ye dom ë tiim piɛth luɔk në agum de tim ëbɛ̈n, ku ye tim ëbɛ̈n agum de atek yök, abï döŋ ke ye të bïï roor rɔt jɔt thïn ku kuɔɔth.

²⁴ Kɔc abïk aa lɔ yäp thïn ke ke muk dhɛ̈ŋ ku wiɛth, wut abï thiäŋ ke roor ëbɛ̈n ku kuɔɔth.

²⁵ Kur nïïm kedhie të wään kɔc com ku puurkï thïn, abï aa roor cïn raan bï lɔ thïn. Abï aa të ye ɣɔ̈k ku thök nyuäth thïn.”