Yith 65 - JAM DE NHIALIC 2011

Nhialic Alui Kɔc Reec En Këtuc

¹ Go Bɛ̈nydït lueel an, “Yɛn aa cï rɔt guiir bä lɔ̈ŋ de kɔckï puk nɔm, ku akënkï lɔ̈ŋ. Yɛn aa cï rɔt guiir në biäk bïk a yök, ku akënkï cak bɛ̈n them. Jur akën a lɔ̈ŋ, cakaa nɔn ee Yɛn tɔ̈u ke ya cï rɔt guiir bä këden puk nɔm an, “Yakï, wek bä kony.

² Yɛn aaye rɔt guiir ë ceŋ bä kɔckï loor nïïm, kɔc ril nïïm ee awäc looi, ku loikï kakɛn kɔ̈k.

³ Ayek yɛn tɔ göth ë ceŋ ke ke cïï gup ee riɔ̈ɔ̈c. Ayek yiëth gäm miɔ̈c në duum yaath yiic, ku nyopkï wal ŋïr në yïk ke yiëth nïïm.

⁴ Wakɔ̈u ayek lɔ në kɔ̈k ku rɛ̈ŋ yiic, bïk lɔ jam në wëi ke kɔc cï thou. Ayek rïŋ ke kudhuur cï ŋuäc cam ku rïŋ ke läi cï ŋuäc ye näk yiëth.

⁵ Ku ëtɛ̈ɛ̈n ja lɛ̈k kɔc kɔ̈k an, “Yak röt mɛ̈ɛ̈c në wolɔ̈m, wok ɣeriic ka wek cï rɔ̈ŋ bäk wo jak! Yɛn cïï kɔc cït ee kakë duëër piŋ, agönhdï wo keek acït many cie liu.

⁶ “Yɛn cï këdï lueel në biäk de këtuc bïï luöi keek, ku gääkden acï gäär piny. Yɛn cïï kë cïk looi bï biɔɔn yic, abä ke cuööt

⁷ në biäk de awɛ̈ɛ̈cken, ku awɛ̈ɛ̈c ke kuarken. Acïk wal ŋïr nyop në kur ke yiëth nïïm, ku luelkï karɛc në biäkdï. Ka abä keek luöi këtuc rɔ̈ŋ ke kathɛɛr cïk looi.”

⁸ Aye Bɛ̈nydït lueel an, “Acïn raan ee enap piɛth riɔ̈ɔ̈k, ee mɔ̈u yen ye looi në keek. Ku yɛn aya yɛn cïï kɔckï bï riɔ̈ɔ̈k kedhie, yɛn bï kɔc ee ya luööi kony.

⁹ Yɛn bï athiɛɛidï gäm kɔc ke Yithriɛl, kɔc ke dhiën ë Juda ku kuatden abïk dɛk pinydiën de kur. Kɔckiën cä lɔc ee ya luööi abïk rëër ëtɛ̈ɛ̈n.

¹⁰ Abïk ɛn aa lam ku watkï thökken, ku ɣɔ̈kken bïk lɔ nyuäth në riaaŋ de Caron yic në biäk të lɔ aköl athɛ̈i, ku në wak de Agööth yic në biäk të lɔ aköl amiäk.

¹¹ “Ku abï wöc ke week, wek kɔc cï ya pɔ̈l, kɔc ee Dhiɔn biɔɔn, kuurdiën ɣeric. Ku lamkï Gad ku Meni, yiëth ke miɛtëguöp ku thök de pïïr ë raan.

¹² Abï aa thök de pïïrdu bä thon në tɔŋ, në biäk kɛ̈n wek cɔ̈tdï puk nɔm wään caal ɛn week, ku kɛ̈nkï piŋ wään jam ɛn wo week. Acäk lɔc bäk a rɛɛc thok ku luɔikï karɛc.

¹³ Ku ëtɛ̈ɛ̈n acä lɛ̈k week an kɔc bï a lam, ku yek wëlkï piŋ, abïk dɛk kacaam juëc ku kadekkï, ku wek bïï cɔk nɔ̈k ku rou. Abïk piɔ̈ɔ̈th miɛt, ku we bï gup yäär.

¹⁴ Abïk diɛt ke miɛt ë piɔ̈u ket ku we bï dhiau në jiɛth ë piɔ̈u.

¹⁵ Kɔckiën cï lɔc abïk rinkun të ye kë ye kɔc cieen. Yɛn Bɛ̈nydït Awärjäŋ yïn bä tɔ thou. Ku gäm kɔckiën ee ya lam rin cï piac cak.

¹⁶ Raan ëbɛ̈n tɔ̈u ee pinyë raan kɔɔr athiɛɛi, abï aa thieei, në Nhialic Adöt. Raan ee gutguut lueel, ee kuëëŋ në rin ke Nhialic yic. Agööth thɛɛr, abïk lɔ ku märkï kɔc nïïm.”

Piny cï Piac Cak

¹⁷ Aye Bɛ̈nydït lueel an, “Yɛn loi piny cï piac cak ku paannhial cï piac cak. Kathɛɛr wään cï röt looi abïk määr në kɔc nïïm taitai.

¹⁸ Jakï piɔ̈ɔ̈th miɛt, ku lak piɔ̈ɔ̈th yum aɣet athɛɛr në ka cä keek cak. Jeruthalem cä piac cak, abï yic thiäŋ ke miɛtëpiɔ̈u, ku kɔcke abïk piɔ̈ɔ̈th miɛt.

¹⁹ Yɛn guöpdï Yɛn bï thiäŋ wo miɛtëpiɔ̈u në biäk de Jeruthalem ke kɔcke. Abï ciën dhiëëu ëtɛ̈ɛ̈n, ku raan kɔɔr kuɔɔny.

²⁰ Mïthii ë dhiëth acïkï bï bɛ thou ke ke kor, ku kɔc kedhie abïk dɛ pïïr bäär. Kɔc bï pïïr në ruöön bɔt kek abï cït mïth dhuök. Na lɔ raan thon ke kën ee runkë cuööp, kënë abï aa kïn nyooth luöi cän keek luöi këtuc.

²¹ Kɔc abïk ɣööt yïk ku rëërkï thïn në gupken, abïk duumkɛn ke tiim ke enap com ku ciɛmkï kakɛn cï luɔk.

²² Acïkï bï yïk ku lɔ kɔc kɔ̈k rɛ̈ɛ̈r thïn, ku acïkï bï com ku lɔ kɔc kɔ̈k ke cam. Kɔckï abïk aa pïïr abïk dhiɔp cï tiim. Abïk kuɛth de kakɛn cïk looi cam në miɛtëpiɔ̈u.

²³ Kë bïk aa looi abï ya tiam ku mïthken acïn kërɛɛc bï keek aa yök. Abä ke thieei ku thiɛɛi kuatden ayï akööl bï bɛ̈n kedhie.

²⁴ Aɣet të ŋoot kek ke ke läŋ ɛn, yɛn bï lɔ̈ŋden puk nɔm.

²⁵ Aŋuööth ku thök abïk aa cam ëtök, kɔ̈ɔ̈r abïk nyuäth ë wal cï ɣɔ̈k ku karɛc ee mol piny acïï ke bï bɛ ya diɛɛr në wurïï. Në Dhiɔn kuurdiën ɣeric nɔm, abï ciën kë bïï kɔc bɛ riɔ̈ɔ̈c në biäk de karɛc.”