Yith 64 - JAM DE NHIALIC 2011

¹ Eeŋö cïï yïn paannhial retic ku bä piny? Kur aduëërkï yïn tïŋ ku lɛthë keek në riɔ̈ɔ̈c.

² Aduëër ë ke lath cït pïïu cïï ë maany tuc tɔ piäär. Bä nyuöthë riɛldu kɔc ke aterdu ku tɔ juöör lɛthë ëbɛ̈n në yïnɔm!

³ Ade kööl cïï yïn kɔn bɛ̈n, ku loi kake riɔ̈ɔ̈c ka kënku keek kɔn tak, kur acïk yïn tïŋ ku lɛthë keek në riɔ̈ɔ̈c.

⁴ Acïn raan töŋ cï Nhialic cït yïn kɔn tïŋ ku acïn raan cï ye kɔn piŋ, raan ee ka cït ee kake luöi kɔc cï aŋäthden tääu ë yeguöp.

⁵ Wek ee kɔc loor nïïm kɔc ee miɛtëpiɔ̈u yök në luɔi de piathëpiɔ̈u, kɔc ee kathɛɛr tak në kueer kɔ̈ɔ̈rë keek bïk pïïr. Yïn aa göth we wook, ku lokku ke wo loi awɛ̈ɛ̈c, cakaa wään cï yïn göth aläl, wo cï bɛ̈n lɔ tueŋ në luɔi de awɛ̈ɛ̈c gɔl ee të thɛɛr ɣɔn.

⁶ Wok de gup awɛ̈ɛ̈c wodhie, cakaa nɔn ye luɔidan piɛth ŋoot ke rac. Në biäk de awɛ̈ɛ̈ckuɔ, wok cï ciët yïth ke tiim ee biɔɔr ku gɔp yom keek.

⁷ Acïn raan töŋ ee rɔt dɔ̈k yïn në lɔ̈ŋ, ku acïn raan ee lɔ tëde yïn ke kɔɔr kuɔɔny. Yïn cï rɔt thiaan në wook, ku nyääŋë wo piny në biäk de awɛ̈ɛ̈ckuɔ.

⁸ Ku yïn ee wääda, Bɛ̈nydït. Wok cït tiɔp tei ku yïn ee cuëny de töny. Ee yïn aa cak wook,

⁹ ka yïn du piɔ̈u go diu aläl we wook, ku du awɛ̈ɛ̈ckuɔ muk ë yïpiɔ̈u aɣet athɛɛr. Wok ee kɔcku, kokëpiɔ̈u we wook.

¹⁰ Pɛ̈ɛ̈nydïtkuön ɣer yiic acïtkï jɔ̈ɔ̈r, Jeruthalem acï nyääŋ piny ke cï riääk,

¹¹ Ku ɣöndan ɣeric läk, të wään ye kuarkuɔ yï piɔɔny thïn, acï riɔ̈ɔ̈k në mac. Ɣään piɛthkuɔ kedhie acï ke riɔ̈ɔ̈k.

¹² Bɛ̈nydït cïn kë cï yï gap piɔ̈u nhial në ee kake yiic kedhie? Cïn kë bä looi ku bä wook tɔ gum awär kë duëërku guum?