Yith 63 - JAM DE NHIALIC 2011

Tiëm cïï Bɛ̈nydït Juöör Tiaam

¹ “Eeŋa ë kë bɔ̈yë në pänydïït de Bothera nu ë Edom? Ku eeŋa kë ceŋ lupɔ amujuŋë, raan ril laath ë riɛl.” Ee Bɛ̈nydït, raan dïït ril ee kɔc kony, abɔ̈ bïï tiëmde bɛ̈n lɛ̈k kɔc.

² “Ku eeŋö ye lupɔɔke thiɛth, cït kake ke raan lui të ye mɔ̈u dhiim thïn?”

³ Go Bɛ̈nydït bɛ̈ɛ̈r an, “Yɛn ee juöör ke piny nɔm dum yiic, cït man ë kë dhiim mɔ̈n de enap, ku acïn raan cï A bɛ̈n kony. Acä ke dum yiic në agönhdï, go riɛmden lupɔɔkï riɔk kedhie.

⁴ Acä lueel an kööl bän kɔckï luök acï bɛ̈n, aaye kööl bän kɔckɛn ke ater luöi këtuc.

⁵ Yɛn aacï gäi wën tiëŋ ɛn piny ke cïn raan kony ɛn. Ku agönhdï acï ya tɔ ril, guɔ tiam në guöpdï.

⁶ Në agönhdï yɛn juöör dum yiic ëbɛ̈n ku wɛɛr ke piny. Ku wäl riɛmdɛn de pïïrden piny.”

Piath de Bɛ̈nydït ke Yithriɛl

⁷ Yɛn bï jam në biäk de nhiëër agɔk de Bɛ̈nydït, Abä piɔɔny në biäk de kajuëc cï luöi wook ëbɛ̈n. Acï baai de Yithriɛl thieei aläl në biäk de kok de yen piɔ̈u ku nhiëërdɛn agɔk.

⁸ Go Bɛ̈nydït lueel an, “Ayek kɔckï acïkï yɛn bï math.” Ago keek kony

⁹ në nuɛɛnken yiic ëbɛ̈n. Aa cie tunynhial, ee Yen Bɛ̈nydït guöpde Yen aa kony keek. Në nhiëërde ku kok de piɔ̈nde acï ke bɛ̈n kony. Aa ye keek gël ë ceŋ në run wään cï tëëk,

¹⁰ ku acïk bɛ̈n rɛɛc ku tɔkï wëidït ɣerke göth. Ago Bɛ̈nydït ja aa raan de aterden ku thɛ̈ɛ̈r ke keek.

¹¹ Ku ëtɛ̈ɛ̈n acïk kenïïm bɛ̈n tak në kathɛɛr, në akööl ɣɔn ke Mothe, awun de Bɛ̈nydït, gokï aa thiëëc an, “Tɔ̈u Bɛ̈nydït ë nou ënɔɔnë, raan ɣɔn kony bäny ke kɔc ke në wɛ̈ɛ̈r yic? Tɔ̈u Bɛ̈nydït ë nou, raan ɣɔn cï wëidït ɣerke gäm Mothe?

¹² Tɔ̈u Bɛ̈nydït ë nou, raan ɣɔn cï kadït gɛ̈iyë tɔ looi ë Mothe në riɛlde, acï pïïu tekiic ku wɛt kɔcke në kueer thuth tɔ̈u ë pïïu thäär,

¹³ ke bï tiëmdïït de kɛk cïï bï thök bɛ̈ɛ̈i ë yeguöp. Aake wɛt Bɛ̈nydït, ku ciɛthkï ke ke ril cök cï jöŋgöör ë jɔ̈ɔ̈ric, ku ciɛthkï ke ke cïï kɔ̈th.”

¹⁴ Acït man ye ë ɣɔ̈k kuaath ë wak de yic wal, yen acïï Wëi ke Bɛ̈nydït kɔc ke tɔ lɔ̈ŋ. Acï kɔcke wat ku tɔ rinke yök dhuëëŋ.

Lɔ̈ŋ de kokdepiɔ̈u ku Kuɔɔny

¹⁵ Bɛ̈nydït, woi wook paannhial, tëduön ɣeric rëër yïn thïn ku në dhuëëŋdu yic. Tɔ̈u diɛɛrduön ee yïn diɛɛr në biäkda ë nou? Tɔ̈u riɛldu ë nou? Tɔ̈u nhiëërdu ku kokdepiɔ̈ndu ë nou? Du wo biɔn gup.

¹⁶ Yïn ee wääda. Kuɛɛrëdan Abraɣam ku Jakop akënkï wook ŋic, ku Yïn Bɛ̈nydït, yïn ee wäärda, raan ee wo kony ë ceŋ.

¹⁷ Eeŋö yïn wo tɔ mär kueerdu? Eeŋö yïn wo tɔ ril nïïm abuk röt yal wei në kueerdu yic? Bä ciëën, në biäk de kɔc ee yïn luööi, ku në biäk de dhiëën ee kaku.

¹⁸ Wook, wok kɔckuön ɣer yiic, wok cïï ë kɔc ke aterda cuɔp wei, në kaam thiin akäŋ: acïk tëduön ɣeric duöm piny.

¹⁹ Yïn ee wo luööi cït kë kën kɔn aa bɛ̈nyda, abuk ciët ka kën kɔn aa kɔcku.