Yith 61 - JAM DE NHIALIC 2011

Wëlpiɛth ke Luäk

¹ Bɛ̈nydït Awärjäŋ acï ya thiɔ̈ɔ̈ŋ në wëike. Acï ya lɔc ku tooc ɛn bä wëlpiɛth yiɛ̈n kɔc kuanynyïïn, Bä kɔc jieth piɔ̈ɔ̈th bɛ̈n duut piɔ̈ɔ̈th, ku bä luny de kɔc cï peec bɛ̈n caal, ku lony kɔc cï mac.

² Acï ya tooc bä kɔc bɛ̈n lɛ̈k luɔi cï akööl bɛ̈n, kööl bïï Bɛ̈nydït kɔcke kony ku tiɛɛm kɔc ke aterden. Acï ya tuööc bä kɔc dhiau duut piɔ̈u ëbɛ̈n.

³ Bä kɔc dhiau në Dhiɔn tɔ mitpiɔ̈ɔ̈th, gäm miɛtëpiɔ̈u në nyin ë dhiëëuwic, Diɛt ke alɛɛc në nyin ë jiɛthëpiɔ̈uwic. Abïk ciët tiim ke ɣok de piathëpiɔ̈u, cïï Bɛ̈nydït ke com guöpde. Abïk yic aa looi, ku Nhialic abï dhuëëŋ yök ë baŋ ë kë cï looi.

⁴ Abïk pɛ̈ɛ̈nydït ɣɔn thɛɛr cï riɔ̈ɔ̈k nyɔk në yïk.

⁵ Kɔckï, alɛi abïk we luööi. Abïk thökkun aa tiit, ku loikï duumkun ayï duumkuön ke tiim ke enap.

⁶ Ku wek bï jɔ ŋic ke we ye bäny ke kake Bɛ̈nydït, lïïm ke Nhialicda, we bï dhuëëŋ de kajuëc ke juöör cam Ku jakkï röt leec nɔn ye kek kakun.

⁷ Ku ayärdun ku riɔ̈ɔ̈cduön ë guöp acïk thök. We bï rëër pinydun, ku kuɛthdun abï ŋuak nyin, miɛtëpiɔ̈ndun abï tɔ̈u aɣet athɛɛr.

⁸ Aye Bɛ̈nydït lueel an, “Yɛn nhiaar yic ku maan yaaŋ ku luɔi de karɛc. Yɛn bï kɔckï thieei në piɔ̈n piɛth ku luɔi män bï tɔ̈u athɛɛr wo keek.

⁹ Abïk dɛk kɛk në juööriic ëbɛ̈n, raan ëbɛ̈n raan lɔ keek tïŋ abïï ŋic nɔn ye kek kɔc cä keek thieei.”

¹⁰ Jeruthalem amit piɔ̈u në biäk de kë cïï Bɛ̈nydït looi. Cït man ye monythiëk lupɔ dik cieŋ, ku thiäŋ nyan thiak rɔt në adhɛ̈p ke thiëëk. Acïï Nhialic kum kɔ̈u në lupɔɔ ke piathëpiɔ̈u ku tiëm.

¹¹ Cït man ŋic wok luɔi ye kɔ̈th cï com goŋ, Bɛ̈nydït Awärjäŋ abï piathëpiɔ̈u ku lɛc tɔ loi rɔt, ku abïï juöör ëbɛ̈n leec.